ಚಿನ್ನ, ಬೆಳ್ಳಿ ದರಗಳು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿವೆ. ರಸ್ತೆಯಲ್ಲಿ ಚಿನ್ನ ತುಂಬಿದ್ದ ಬ್ಯಾಗ್ ಸಿಕ್ಕಿದರೆ ಬಿಡುವುದುಂಟೆ?. ಆದರೆ ತಮಿಳುನಾಡಿನ ಚೆನ್ನೈನಲ್ಲಿ ಪದ್ಮ ಎಂಬ ಪೌರಕಾರ್ಮಿಕ ಮಹಿಳೆ ತೋರಿದ ಪ್ರಾಮಾಣಿಕತೆಯ ಬಗ್ಗೆ ಈಗ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಯಾಗುತ್ತಿದೆ.
ಚೆನ್ನೈ ಪೌರಕಾರ್ಮಿಕ ಮಹಿಳೆ ಪ್ರಾಮಾಣಿಕತೆಯಿಂದ 45 ಲಕ್ಷ ರೂ. ಮೌಲ್ಯದ ಚಿನ್ನವಿದ್ದ ಬ್ಯಾಗ್ ಅನ್ನು ಮರಳಿ ನೀಡಿದ್ದಾರೆ. ಚೆನ್ನೈನ ಟಿ.ನಗರದ ದೇವಾಲಯವೊಂದರ ಬಳಿ ಪದ್ಮ ಅವರಿಗೆ ಸುಮಾರು 45 ಲಕ್ಷ ಮೌಲ್ಯದ 45 ಸವರನ್ ಚಿನ್ನದ ಆಭರಣಗಳಿದ್ದ ಬ್ಯಾಗ್ ಸಿಕ್ಕಿತು.
ಅವರು ಅದನ್ನು ಕೂಡಲೇ ಪೊಲೀಸರಿಗೆ ಒಪ್ಪಿಸಿದರು, ನಂತರ ಆಭರಣವನ್ನು ಸುರಕ್ಷಿತವಾಗಿ ಅದರ ಮಾಲೀಕರಿಗೆ ಮರಳಿಸಲಾಗಿದೆ. ರಸ್ತೆ ಸ್ವಚ್ಛಗೊಳಿಸುವಾಗ ಪದ್ಮ ಅವರಿಗೆ ಸಿಕ್ಕ ಬ್ಯಾಗ್ ವಾಪಸ್ ನೀಡಿದ ವಿಚಾರ ಈಗ ಸುದ್ದಿಯಾಗಿದೆ.
ಚಿನ್ನ ತುಂಬಿದ್ದ ಬ್ಯಾಗ್ ಅನ್ನು ತನ್ನಲ್ಲೇ ಇಟ್ಟುಕೊಳ್ಳುವ ಬದಲು ಪದ್ಮ ಅವರು ತಕ್ಷಣ ತಮ್ಮ ಮೇಲಾಧಿಕಾರಿಗಳಿಗೆ ಮಾಹಿತಿ ನೀಡಿ, ಪೊಲೀಸರಿಗೆ ಹಸ್ತಾಂತರಿಸಿದರು. ಪೊಲೀಸರು ವಾರಸುದಾರರನ್ನು ಪತ್ತೆಹಚ್ಚಿ ಆಭರಣವನ್ನು ಮರಳಿಸಿದರು.
ಈ ಘಟನೆ ಇಂಟರ್ನೆಟ್ ಜಗತ್ತಿನಲ್ಲಿ ಎಲ್ಲ ಗಮನ ಸೆಳೆಯುತ್ತಿದೆ. ಜನವರಿ 11 ರಂದು ಆಭರಣ ಸಿಕ್ಕಿತು ಮತ್ತು ಅದೇ ದಿನ ಅದನ್ನು ಮರಳಿಸಲಾಯಿತು. ಪ್ರಾಮಾಣಿಕತೆ ತೋರಿದ ಪದ್ಮ ಅವರಿಗೆ ಸನ್ಮಾನ ಮಾಡಲಾಗಿದೆ.
ತಮಿಳುನಾಡು ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಅವರು ಪದ್ಮ ಪ್ರಾಮಾಣಿಕತೆಯನ್ನು ಮೆಚ್ಚಿ 1 ಲಕ್ಷ ರೂ. ನಗದು ಬಹುಮಾನ ನೀಡಿ ಗೌರವಿಸಿದರು. ಪೌರ ಕಾರ್ಮಿಕ ಮಹಿಳೆಯ ಕಾರ್ಯಕ್ಕೆ ನೆಟ್ಟಿಗರು ಮೆಚ್ಚುಗೆ ಸೂಚಿಸುತ್ತಿದ್ದಾರೆ.
ಲಲಿತಾ ಜ್ಯುವೆಲರಿ ಮಾಲೀಕರಾದ ಕಿರಣ್ ಕುಮಾರ್ ಸಹ ಪದ್ಮ ಮತ್ತು ಅವರ ಸಹೋದ್ಯೋಗಿಯನ್ನು ಆಹ್ವಾನಿಸಿ ಪ್ರಶಂಸಿಸಿದರು. ಅವರಿಗೆ ಸನ್ಮಾನ ಮಾಡಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, 10,000ಕ್ಕೂ ಹೆಚ್ಚು ಲೈಕ್ಸ್ ಪಡೆದಿದ್ದು, ವೈರಲ್ ಆಗಿದೆ.
ಇಂತಹ ಘಟನೆಯು ಭಾರತೀಯರ ಪ್ರಾಮಾಣಿಕತೆಯನ್ನು ಎತ್ತಿ ತೋರಿಸುತ್ತದೆ. ಇದು ಸಾಮಾನ್ಯ ಜನರ ಬಗ್ಗೆ ಇರುವ ತಪ್ಪು ಕಲ್ಪನೆಗಳನ್ನು ಹೋಗಲಾಡಿಸಿ, ದೇಶಕ್ಕೆ ಹೆಮ್ಮೆ ತರುತ್ತದೆ.
ಒಬ್ಬ ಸಾಮಾನ್ಯ ಕಾರ್ಮಿಕರ ನಿಷ್ಠೆ ಸಮಾಜಕ್ಕೆ ಹೇಗೆ ಸ್ಫೂರ್ತಿಯಾಗಬಲ್ಲದು ಎಂಬುದಕ್ಕೆ ಇದು ನಿದರ್ಶನ. ಇಂತಹ ಪ್ರಾಮಾಣಿಕತೆಯನ್ನು ಗುರುತಿಸುವುದು ಇತರರಿಗೂ ಜವಾಬ್ದಾರಿಯುತವಾಗಿ ನಡೆದುಕೊಳ್ಳಲು ಪ್ರೇರೇಪಿಸುತ್ತದೆ.
