ಬೆಂಗಳೂರು: ಇತ್ತೀಚಿನ ಇರಾನ್-ಇಸ್ರೇಲ್ ಯುದ್ಧದ ಕಾರ್ಮೋಡ ಜಾಗತಿಕವಾಗಿ ಕಚ್ಚಾ ತೈಲದ (Crude Oil) ಬೆಲೆಯಲ್ಲಿ ಭಾರಿ ಏರಿಳಿತ ಉಂಟುಮಾಡುತ್ತಿದೆ. ಪೆಟ್ರೋಲ್, ಡೀಸೆಲ್ ಬೆಲೆ ಏರಿಕೆಯಾದಾಗಲೆಲ್ಲಾ ನಮ್ಮ ಗಮನ ಕಚ್ಚಾ ತೈಲದತ್ತ ಹೋಗುವುದು ಸಹಜ. ಆದರೆ, ಸಮುದ್ರದ ಆಳದಿಂದ ತೆಗೆದ ಕಚ್ಚಾ ತೈಲ ನೇರವಾಗಿ ನಿಮ್ಮ ವಾಹನದ ಟ್ಯಾಂಕ್ ಸೇರುವುದಿಲ್ಲ ಎಂಬುದು ನಿಮಗೆ ಗೊತ್ತೇ?
ಕಚ್ಚಾ ತೈಲವನ್ನು ಸಂಸ್ಕರಣಾಗಾರಗಳಲ್ಲಿ (Refineries) ಶುದ್ಧೀಕರಿಸಿದಾಗ ಮಾತ್ರ ಅದು ಬಳಕೆಗೆ ಯೋಗ್ಯವಾಗುತ್ತದೆ. ಅಚ್ಚರಿಯ ವಿಷಯವೆಂದರೆ, ಒಂದು ಲೀಟರ್ ಕಚ್ಚಾ ತೈಲದಿಂದ ಪೂರ್ಣ ಪ್ರಮಾಣದ ಪೆಟ್ರೋಲ್ ಬರುವುದಿಲ್ಲ ಹಾಗಾದರೆ ಪೆಟ್ರೋಲ್ ಪಾಲು ಎಷ್ಟು? ಇಲ್ಲಿದೆ ಸಂಪೂರ್ಣ ವಿವರ.
1 ಲೀಟರ್ ಕಚ್ಚಾ ತೈಲದಿಂದ ಸಿಗುವ ಪೆಟ್ರೋಲ್ ಎಷ್ಟು?
ತಜ್ಞರ ಅಂದಾಜಿನ ಪ್ರಕಾರ, ಒಂದು ಲೀಟರ್ ಕಚ್ಚಾ ತೈಲವನ್ನು ಶುದ್ಧೀಕರಿಸಿದಾಗ ಸುಮಾರು 450 ರಿಂದ 500 ಮಿಲಿಲೀಟರ್ ಪೆಟ್ರೋಲ್ ಮಾತ್ರ ದೊರೆಯುತ್ತದೆ. ಅಂದರೆ ಅರ್ಧದಷ್ಟು ಮಾತ್ರ ಪೆಟ್ರೋಲ್ ಆಗಿ ಪರಿವರ್ತಿತವಾಗುತ್ತದೆ.
ಉಳಿದ ಅರ್ಧ ಲೀಟರ್ ತೈಲ ಏನಾಗುತ್ತದೆ?
ಪೆಟ್ರೋಲ್ ಹೊರತೆಗೆದ ನಂತರ ಉಳಿದ ಭಾಗವು ವ್ಯರ್ಥವಾಗುವುದಿಲ್ಲ. ಅದರಿಂದ ವಿವಿಧ ಉಪಯುಕ್ತ ಇಂಧನಗಳನ್ನು ತಯಾರಿಸಲಾಗುತ್ತದೆ:
ಡೀಸೆಲ್: ಸುಮಾರು 250 ರಿಂದ 300 ಮಿಲಿಲೀಟರ್.
ಇತರ ಉತ್ಪನ್ನಗಳು: ವಿಮಾನದ ಇಂಧನ (Aviation Fuel), ಅಡುಗೆ ಅನಿಲ (LPG), ಸೀಮೆಎಣ್ಣೆ ಮತ್ತು ಕೈಗಾರಿಕಾ ಇಂಧನಗಳು.
ಕೊನೆಯ ಹಂತ: ರಸ್ತೆಗೆ ಹಾಕುವ ಡಾಂಬರು ಕೂಡ ಕಚ್ಚಾ ತೈಲದ ಕೊನೆಯ ಉತ್ಪನ್ನವೇ ಆಗಿದೆ
ಬ್ಯಾರೆಲ್ ಲೆಕ್ಕಾಚಾರ ಹೇಗಿರುತ್ತೆ?
ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲವನ್ನು ಬ್ಯಾರೆಲ್’ಗಳಲ್ಲಿ ಅಳೆಯಲಾಗುತ್ತದೆ.
1 ಬ್ಯಾರೆಲ್ = 159 ಲೀಟರ್ ಕಚ್ಚಾ ತೈಲ.
ಈ 159 ಲೀಟರ್ ಅನ್ನು ಸಂಸ್ಕರಿಸಿದಾಗ ಅಚ್ಚರಿಯ ಎಂಬಂತೆ ಸುಮಾರು 170 ಲೀಟರ್ ವಿವಿಧ ಉತ್ಪನ್ನಗಳು ದೊರೆಯುತ್ತವೆ (ಇದನ್ನು ‘ಪ್ರಾಸೆಸಿಂಗ್ ಗೇನ್’ ಎನ್ನಲಾಗುತ್ತದೆ).
ಒಂದು ಬ್ಯಾರೆಲ್ನಿಂದ ಸುಮಾರು 70 ರಿಂದ 75 ಲೀಟರ್ ಪೆಟ್ರೋಲ್ ಪಡೆಯಬಹುದು.
ಜಾಗತಿಕ ಆರ್ಥಿಕತೆಯ ಚಕ್ರ
ಕಚ್ಚಾ ತೈಲ ಎಂಬುದು ಕೇವಲ ಇಂಧನವಲ್ಲ, ಅದು ನಮ್ಮ ದೈನಂದಿನ ಬಳಕೆಯ ನೂರಾರು ವಸ್ತುಗಳ ಮೂಲ ಆಧಾರ. ವಿಜ್ಞಾನ ಮತ್ತು ತಂತ್ರಜ್ಞಾನದ ಈ ಸಂಕೀರ್ಣ ಪ್ರಕ್ರಿಯೆಯೇ ಇಂದು ಜಾಗತಿಕ ಆರ್ಥಿಕತೆಯನ್ನು ಮುನ್ನಡೆಸುತ್ತಿದೆ. ಕಚ್ಚಾ ತೈಲದ ಪ್ರತಿ ಹನಿಯೂ ಯಾವುದೋ ಒಂದು ರೂಪದಲ್ಲಿ ನಮಗೆ ಬಳಕೆಯಾಗುತ್ತದೆ ಎಂಬುದು ವಿಶೇಷ.
