ಡಿಸ್ಕವರಿ ಸಂಸ್ಥೆಯ “Declassified: Operation Sindoor” ಸಾಕ್ಷ್ಯಚಿತ್ರ ಆಗಸ್ಟ್ 15ರಂದು ಬಿಡುಗಡೆಯಾದ ಬಳಿಕ ಪಾಕಿಸ್ತಾನದಲ್ಲಿ ಚರ್ಚೆ ಜೋರಾಗಿದೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಪಾಕಿಸ್ತಾನ ಸೇನೆಯ ವಕ್ತಾರ ಲೆಫ್ಟಿನೆಂಟ್ ಜನರಲ್ ಅಹ್ಮದ್ ಶರೀಫ್, ಮಧ್ಯರಾತ್ರಿ 2 ಗಂಟೆಗೆ ಹೇಳಿಕೆ ನೀಡಿ ಸಾಕ್ಷ್ಯಚಿತ್ರವನ್ನು ತೀವ್ರವಾಗಿ ಟೀಕಿಸಿದ್ದಾರೆ.
ಮಂಗಳವಾರ ಮುಂಜಾನೆ ‘ಎಕ್ಸ್’ನಲ್ಲಿ ಪೋಸ್ಟ್ ಮಾಡಿರುವ ಅಹ್ಮದ್ ಶರೀಫ್, ಸಾಕ್ಷ್ಯಚಿತ್ರದಲ್ಲಿ ಭಾರತೀಯ ಸೇನೆಯ ಉನ್ನತ ನಾಯಕತ್ವ, ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ಸೇರಿದಂತೆ ಹಲವರ ಸಂದರ್ಶನಗಳಿವೆ. ಆದರೆ ಇದರಲ್ಲಿ “ವಿಷಯದ ಸೂಕ್ಷ್ಮತೆ ಮತ್ತು ಗಂಭೀರತೆ ಕಾಣುತ್ತಿಲ್ಲ” ಎಂದು ಆರೋಪಿಸಿದ್ದಾರೆ.
“ಆಯ್ದ ಸಂದರ್ಶನಗಳು, ಭಾವನಾತ್ಮಕ ನಿರೂಪಣೆ ಹಾಗೂ ಬಾಲಿವುಡ್ ಶೈಲಿಯ ಸಿನಿಮೀಯ ಮರುಸೃಷ್ಟಿಯ ಮೂಲಕ ನಡೆದ ಘಟನೆಗಳ ವಾಸ್ತವಾಂಶಗಳನ್ನು ಬದಲಾಯಿಸಲು ಮತ್ತು ಕಾರ್ಯಾಚರಣೆಯ ಫಲಿತಾಂಶವನ್ನು ಮರುಬರೆಯಲು ಪ್ರಯತ್ನಿಸಲಾಗಿದೆ” ಎಂದು ಅವರು ಹೇಳಿದ್ದಾರೆ.
ಏನಿದು ಆಪರೇಷನ್ ಸಿಂಧೂರ್?
ಏಪ್ರಿಲ್ 22ರಂದು ಪಹಲ್ಗಾಮ್ನ ಬೈಸರನ್ ಪ್ರದೇಶದಲ್ಲಿ ನಡೆದ ಭೀಕರ ಉಗ್ರ ದಾಳಿಗೆ ಪ್ರತೀಕಾರವಾಗಿ ಭಾರತವು ಮೇ 7ರಂದು ‘ಆಪರೇಷನ್ ಸಿಂಧೂರ್’ ಕಾರ್ಯಾಚರಣೆ ಆರಂಭಿಸಿತ್ತು. ಈ ದಾಳಿಯಲ್ಲಿ ಒಟ್ಟು 26 ಪ್ರವಾಸಿಗರು, ಓರ್ವ ನೇಪಾಳಿ ಪ್ರಜೆ ಸೇರಿದಂತೆ, ಮೃತಪಟ್ಟಿದ್ದರು. ಪಾಕಿಸ್ತಾನ ಮೂಲದ ಲಷ್ಕರ್-ಎ-ತೊಯ್ಬಾದ ಅಂಗಸಂಸ್ಥೆ ಎಂದು ಹೇಳಲಾಗುವ ಟಿಆರ್ಎಫ್ ದಾಳಿಯ ಹೊಣೆ ಹೊತ್ತಿತ್ತು.
ಈ ಕಾರ್ಯಾಚರಣೆಯ ಮುಂಚೂಣಿಯಲ್ಲಿದ್ದ ಭಾರತೀಯ ಸೇನೆಯ ಅಧಿಕಾರಿಗಳನ್ನೂ ಡಿಸ್ಕವರಿಯ ಸಾಕ್ಷ್ಯಚಿತ್ರದಲ್ಲಿ ತೋರಿಸಲಾಗಿದೆ.
ಪಾಕಿಸ್ತಾನದ ಸೇನಾ ವಕ್ತಾರ ಹೇಳಿದ್ದೇನು?
“ಭಾರತ ಇನ್ನೂ ಸತ್ಯವನ್ನು ಬಹಿರಂಗಪಡಿಸಿಲ್ಲ. ಬದಲಾಗಿ, ಸೇನಾ ವೈಫಲ್ಯವನ್ನು ಯಶಸ್ವಿ ಕಾರ್ಯಾಚರಣೆಯಂತೆ ಬಿಂಬಿಸಲು ಪ್ರಚಾರದ ವಿಡಿಯೋವೊಂದನ್ನು ಸಿದ್ಧಪಡಿಸಿದೆ” ಎಂದು ಶರೀಫ್ ಆರೋಪಿಸಿದ್ದಾರೆ.
“ಸಿನಿಮೀಯ ಮರುಸೃಷ್ಟಿಯಿಂದ ವಿಮಾನಗಳ ನಷ್ಟ, ಸೇನಾ ಸಿಬ್ಬಂದಿಯ ಸಾವು ಅಥವಾ ನಡೆದ ನೈಜ ಸೇನಾ ಸಂಘರ್ಷಗಳನ್ನು ಬದಲಾಯಿಸಲು ಸಾಧ್ಯವಿಲ್ಲ. ಯುದ್ಧಭೂಮಿಯ ಸೋಲನ್ನು ಸ್ವಯಂ ಘೋಷಿತ ವಿಜಯವನ್ನಾಗಿ ಮಾಡಲು ಸಾಧ್ಯವಿಲ್ಲ” ಎಂದು ಅವರು ಹೇಳಿದ್ದಾರೆ.
ಕಳೆದ ವರ್ಷದ ಭಾರತ–ಪಾಕಿಸ್ತಾನ ಸಂಘರ್ಷವನ್ನು ಪಾಕಿಸ್ತಾನ ‘ಮಾರ್ಕಾ-ಎ-ಹಕ್’ ಎಂದು ಕರೆಯುತ್ತದೆ. ಈ ಸಂಘರ್ಷದ ಒಂದು ವರ್ಷ ಕಳೆದರೂ ಭಾರತ ವಾಸ್ತವವನ್ನು ಒಪ್ಪಿಕೊಳ್ಳಲು ಸಿದ್ಧವಾಗಿಲ್ಲ ಎಂದು ಶರೀಫ್ ಆರೋಪಿಸಿದ್ದಾರೆ.
ಸಾಕ್ಷ್ಯಚಿತ್ರವು “ಅತಿಯಾಗಿ ನಾಟಕೀಯಗೊಳಿಸಿದ, ಬಣ್ಣ ಹಚ್ಚಿದ ಹಾಗೂ ವಾಸ್ತವಾಂಶಗಳಿಗೆ ವಿರುದ್ಧವಾದ ನಿರೂಪಣೆ” ಹೊಂದಿದೆ ಎಂದು ಅವರು ಟೀಕಿಸಿದ್ದಾರೆ. ಅದೇ ವೇಳೆ, ಪಾಕಿಸ್ತಾನವು ಪ್ರಾದೇಶಿಕ ಶಾಂತಿ ಮತ್ತು ಸ್ಥಿರತೆಗೆ ಬದ್ಧವಾಗಿದೆ ಎಂದು ಹೇಳಿದ ಅವರು, ತನ್ನ ದೇಶದ ಸಾರ್ವಭೌಮತ್ವ, ಭೌಗೋಳಿಕ ಸಮಗ್ರತೆ ಮತ್ತು ರಾಷ್ಟ್ರೀಯ ಹಿತಾಸಕ್ತಿಗಳನ್ನು ರಕ್ಷಿಸಲು ಪಾಕಿಸ್ತಾನದ ಸಶಸ್ತ್ರ ಪಡೆಗಳು ಸಂಪೂರ್ಣ ಸಿದ್ಧವಾಗಿವೆ ಎಂದು ತಿಳಿಸಿದ್ದಾರೆ.
“ಭವಿಷ್ಯದಲ್ಲಿ ಯಾವುದೇ ಸೇನಾ ದುಸ್ಸಾಹಸ ನಡೆದರೂ ಅದಕ್ಕೆ ದೃಢವಾದ, ನಿರ್ಣಾಯಕ ಮತ್ತು ತೀವ್ರ ಪ್ರತಿಕ್ರಿಯೆ ನೀಡಲಾಗುವುದು” ಎಂದು ಅಹ್ಮದ್ ಶರೀಫ್ ಎಚ್ಚರಿಕೆ ನೀಡಿದ್ದಾರೆ.
