ತಮಿಳುನಾಡು ವಿಧಾನಸಭಾ ಚುನಾವಣೆ 2026ರ ವೇಳಾಪಟ್ಟಿ ಘೋಷಣೆಯಾಗಿದೆ. ರಾಜ್ಯದ 234 ಸ್ಥಾನಗಳಿಗೆ ಒಂದೇ ಹಂತದಲ್ಲಿ ಏಪ್ರಿಲ್ 23ರಂದು ಮತದಾನ ನಡೆಯಲಿದೆ. ಈ ಬಾರಿಯ ಚುನಾವಣೆಯಲ್ಲಿ ಕುತೂಹಲ ಮೂಡಿಸಿರುವುದು ಓ. ಪನ್ನೀರ್ಸೆಲ್ವಂ.
ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ಓ. ಪನ್ನೀರ್ಸೆಲ್ವಂ. ಒಂದು ಕಾಲದಲ್ಲಿ ಜಯಲಲಿತಾ ನಂಬಿಕಸ್ಥರು. ಆದರೆ ಬದಲಾದ ರಾಜಕೀಯ ಸನ್ನಿವೇಶದಲ್ಲಿ ಎಐಎಡಿಎಂಕೆ ಪಕ್ಷದಿಂದ ಉಚ್ಚಾಟನೆಗೊಂಡಿದ್ದ ಓ. ಪನ್ನೀರ್ಸೆಲ್ವಂ ಡಿಎಂಕೆ ಪಕ್ಷವನ್ನು ಸೇರಿ ಅಚ್ಚರಿ ಮೂಡಿಸಿದ್ದರು.
ಈಗ 2026ರ ತಮಿಳುನಾಡು ವಿಧಾನಸಭೆ ಚುನಾವಣೆಗೆ ಬೋಡಿನಾಯಕ್ಕನೂರು ಕ್ಷೇತ್ರದಿಂದ ಡಿಎಂಕೆ ಅಭ್ಯರ್ಥಿಯಾಗಿ ಓ. ಪನ್ನೀರ್ಸೆಲ್ವಂ ಕಣಕ್ಕಿಳಿಯಲಿದ್ದಾರೆ. ಈ ಕ್ಷೇತ್ರ ಓ. ಪನ್ನೀರ್ಸೆಲ್ವಂ ಪಾಲಿಗೆ ಹೊಸದಲ್ಲ. ಆದರೆ ಪಕ್ಷದ ಚಿಹ್ನೆ ಮಾತ್ರ ಹೊಸದು.
ಬೋಡಿನಾಯಕ್ಕನೂರು ವಿಧಾನಸಭಾ ಕ್ಷೇತ್ರದ ಮತದಾರರಿಗೆ ಈ ಬಾರಿಯ ಚುನಾವಣಾ ಕಣದಲ್ಲಿರುವ ಅಭ್ಯರ್ಥಿಯು ಹೊಸಬರಲ್ಲ. 2011ರಿಂದ ಸತತ ಮೂರು ಬಾರಿ ಅವರು ಆಯ್ಕೆ ಮಾಡಿ ಕಳಿಸಿದ ವ್ಯಕ್ತಿಯೇ ಆಗಿದ್ದಾರೆ.
ಆದರೆ, ಈ ಬಾರಿ ಓ. ಪನ್ನೀರ್ಸೆಲ್ವಂ ಅವರು ತಮ್ಮ ಹಳೆಯ ರಾಜಕೀಯ ವೈರಿಯಾದ (ಡಿಎಂಕೆ) ಮತ ನೀಡುವಂತೆ ಜನರಲ್ಲಿ ಮನವಿ ಮಾಡಲಿದ್ದಾರೆ. ಜೆ. ಜಯಲಲಿತಾ ಅವರ ಕಟ್ಟಾ ನಿಷ್ಠಾವಂತರಾಗಿದ್ದ ಮತ್ತು ತಮಿಳುನಾಡಿನ ಮುಖ್ಯಮಂತ್ರಿಯಾಗಿ ಹಲವು ಬಾರಿ ಸೇವೆ ಸಲ್ಲಿಸಿರುವ ಓ. ಪನ್ನೀರ್ಸೆಲ್ವಂ ಅವರು ಫೆಬ್ರವರಿಯಲ್ಲಿ ಡಿಎಂಕೆ ಪಕ್ಷವನ್ನು ಸೇರಿದ್ದರು.
ಸುಮಾರು 50 ವರ್ಷಗಳ ಕಾಲ ತಾವು ಸೇವೆ ಸಲ್ಲಿಸಿದ್ದ ಎಐಎಡಿಎಂಕೆ ಪಕ್ಷದಿಂದ 2022ರಲ್ಲಿ ಉಚ್ಚಾಟನೆಗೊಂಡ ನಂತರ, ಆ ಪಕ್ಷದ ಬಾಗಿಲುಗಳು ತಮಗೆ ಶಾಶ್ವತವಾಗಿ ಮುಚ್ಚಲ್ಪಟ್ಟ ಕಾರಣ ಅವರು ಡಿಎಂಕೆ ಸೇರುವ ನಿರ್ಧಾರ ಕೈಗೊಂಡರು.
ಜೆ. ಜಯಲಲಿತಾ ಅವರ ನಿಧನದ ನಂತರ ಪಕ್ಷದಲ್ಲಿ ಅಧಿಕಾರವನ್ನು ಕ್ರೋಢೀಕರಿಸುವಲ್ಲಿ ಯಶಸ್ವಿಯಾದ ಎಡಪ್ಪಾಡಿ ಕೆ. ಪಳನಿಸ್ವಾಮಿ ಅವರೊಂದಿಗಿನ ಭಿನ್ನಾಭಿಪ್ರಾಯವೇ ಈ ಬೆಳವಣಿಗೆಗೆ ಕಾರಣವಾಗಿತ್ತು.
ಜನಪ್ರಿಯವಾಗಿ ಒಪಿಎಸ್ ಎಂದೇ ಖ್ಯಾತರಾಗಿರುವ ಪನ್ನೀರ್ಸೆಲ್ವಂ ಅವರು ಈ ಹಿಂದೆ ಥೇಣಿ ಜಿಲ್ಲೆಯ ಪೆರಿಯಾಕುಲಂ ವಿಧಾನಸಭಾ ಕ್ಷೇತ್ರದಿಂದ ಎಐಎಡಿಎಂಕೆ ಅಭ್ಯರ್ಥಿಯಾಗಿ ಎರಡು ಬಾರಿ ಗೆಲುವು ಸಾಧಿಸಿದ್ದರು. ನಂತರ ಅದೇ ಜಿಲ್ಲೆಯ ಬೋಡಿನಾಯಕ್ಕನೂರು ಕ್ಷೇತ್ರಕ್ಕೆ ಸ್ಥಳಾಂತರಗೊಂಡ ಅವರು, 2011 ರಿಂದ ಡಿಎಂಕೆ ಅಭ್ಯರ್ಥಿಗಳನ್ನು ಸೋಲಿಸುವ ಮೂಲಕ ಸತತವಾಗಿ ಜಯಗಳಿಸುತ್ತಾ ಬಂದಿದ್ದಾರೆ.
ಶನಿವಾರ ರಾಜ್ಯದ ಆಡಳಿತ ಪಕ್ಷವಾದ ಡಿಎಂಕೆ ತಾನು ಸ್ಪರ್ಧಿಸುತ್ತಿರುವ 164 ಸ್ಥಾನಗಳಿಗೆ ಅಭ್ಯರ್ಥಿಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದ್ದು, ಬೋಡಿನಾಯಕ್ಕನೂರು ಕ್ಷೇತ್ರಕ್ಕೆ ಮತ್ತೊಮ್ಮೆ ಓಪಿಎಸ್ ಅವರ ಹೆಸರನ್ನು ಘೋಷಿಸಿದೆ.
75 ವರ್ಷದ ಈ ಹಿರಿಯ ನಾಯಕನಿಗೆ ಕ್ಷೇತ್ರದಲ್ಲಿ ಇಂದಿಗೂ ಬೆಂಬಲವಿದ್ದರೂ, ಎಐಎಡಿಎಂಕೆಯ ಎರಡು ಎಲೆ ಗುರುತಿನ ವಿರುದ್ಧ ಡಿಎಂಕೆಯ ಉದಯಿಸುವ ಸೂರ್ಯ ಚಿಹ್ನೆಗೆ ಮತ ಹಾಕುವಂತೆ ಮತದಾರರನ್ನು ಒಪ್ಪಿಸುವುದು ಅವರಿಗೆ ದೊಡ್ಡ ಸವಾಲಾಗಲಿದೆ.
ದಶಕಗಳಿಂದ ತಮಿಳುನಾಡು ರಾಜಕೀಯದ ಎರಡು ಪ್ರಮುಖ ಧ್ರುವಗಳಾಗಿರುವ ಎಐಎಡಿಎಂಕೆ ಮತ್ತು ಡಿಎಂಕೆಗಳು ತಮ್ಮದೇ ಆದ ನಿಷ್ಠಾವಂತ ಮತದಾರರನ್ನು ಹೊಂದಿವೆ ಎಂಬುದು ಈ ಪರಿಸ್ಥಿತಿಯನ್ನು ಮತ್ತಷ್ಟು ಸಂಕೀರ್ಣಗೊಳಿಸಿದೆ. ಈ ಕಾರಣದಿಂದಾಗಿ, ಒಂದು ಪಕ್ಷದ ಮತಗಳನ್ನು ಮತ್ತೊಂದು ಪಕ್ಷಕ್ಕೆ ವರ್ಗಾಯಿಸುವುದು ಅತ್ಯಂತ ಕಷ್ಟಕರವಾಗಲಿದೆ.
ಜೊತೆಗೆ, ಕ್ಷೇತ್ರದ ಜಾತಿ ಸಮೀಕರಣಗಳು ಸಹ ಫಲಿತಾಂಶದ ಮೇಲೆ ನಿರ್ಣಾಯಕ ಪ್ರಭಾವ ಬೀರಲಿವೆ. ಇಲ್ಲಿ ದೇವಾಂಗ ಮತ್ತು ತೇವರ್ ಸಮುದಾಯಗಳು ಪ್ರಮುಖ ಪಾತ್ರ ವಹಿಸುವ ಸಾಧ್ಯತೆಯಿದೆ. ಕಳೆದ ಚುನಾವಣೆಗಳಲ್ಲಿ ಓಪಿಎಸ್ ಅವರಿಂದಾಗಿ ಕೈತಪ್ಪಿದ್ದ ಈ ಕ್ಷೇತ್ರವನ್ನು ಮರಳಿ ಪಡೆಯಲು, ತೇವರ್ ಮತದಾರರಲ್ಲಿ ಅವರಿಗಿರುವ ಜನಪ್ರಿಯತೆಯ ಮೇಲೆ ಡಿಎಂಕೆ ಹೆಚ್ಚಿನ ಭರವಸೆ ಇಟ್ಟಿದೆ.
