ನೀವು ಹೊಸ ಟಿವಿ, ಫ್ರಿಡ್ಜ್ ಅಥವಾ ಗ್ಯಾಸ್ ಸ್ಟೌವ್ ಮನೆಗೆ ತರಬೇಕು ಅಂದುಕೊಂಡಿದ್ದೀರಾ? ಜನವರಿ 1, 2026 ರಿಂದ ಜಾರಿಗೆ ಬರುವಂತೆ ಕೇಂದ್ರ ಸರ್ಕಾರವು ಗೃಹಬಳಕೆಯ ವಸ್ತುಗಳ ಖರೀದಿಯಲ್ಲಿ ದೊಡ್ಡ ಬದಲಾವಣೆ ತಂದಿದೆ. ಜನವರಿ 1 ರಿಂದ ಈ ಹೊಸ ನಿಯಮ ಅಸ್ತಿತ್ವಕ್ಕೆ ಬಂದಿದೆ.
ಇಲ್ಲಿಯವರೆಗೆ ಕೆಲವು ಕಂಪನಿಗಳು ಮಾತ್ರ ತಮ್ಮ ಉಪಕರಣಗಳ ಮೇಲೆ ‘ಸ್ಟಾರ್ ಲೇಬಲ್’ ಹಾಕುತ್ತಿದ್ದವು. ಆದರೆ ಈಗ ಬ್ಯೂರೋ ಆಫ್ ಎನರ್ಜಿ ಎಫಿಶಿಯನ್ಸಿ (BEE) ಹೊಸ ನಿಯಮದ ಪ್ರಕಾರ, ಪ್ರತಿ ಫ್ರಿಡ್ಜ್, ಟಿವಿ ಮತ್ತು ಗ್ಯಾಸ್ ಸ್ಟೌವ್‌ಗಳ ಮೇಲೆ ‘ಎನರ್ಜಿ ಸ್ಟಾರ್ ರೇಟಿಂಗ್’ ಇರುವುದು ಕಡ್ಡಾಯ. ಅಂದರೆ, ನೀವು ಖರೀದಿಸುವ ವಸ್ತು ಎಷ್ಟು ವಿದ್ಯುತ್ ಅಥವಾ ಗ್ಯಾಸ್ ಬಳಸುತ್ತದೆ ಎಂಬುದನ್ನು ಗ್ರಾಹಕರಿಗೆ ತಿಳಿಸುವುದು ಇನ್ನು ಮುಂದೆ ಕಡ್ಡಾಯವಾಗಲಿದೆ.
ಯಾವೆಲ್ಲಾ ವಸ್ತುಗಳು ಈ ವ್ಯಾಪ್ತಿಗೆ ಬರುತ್ತವೆ?
ಕೇಂದ್ರ ಸರ್ಕಾರವು ಈ ನಿಯಮವನ್ನು ಕೇವಲ ಫ್ರಿಡ್ಜ್‌ಗೆ ಸೀಮಿತಗೊಳಿಸದೆ, ವ್ಯಾಪ್ತಿಯನ್ನು ವಿಸ್ತರಿಸಿದೆ:
ಗೃಹಬಳಕೆಯ ವಸ್ತುಗಳು: ಟೆಲಿವಿಷನ್, ರೆಫ್ರಿಜರೇಟರ್ ಹಾಗೂ ಎಲ್‌ಪಿಜಿ ಗ್ಯಾಸ್ ಸ್ಟೌವ್‌ಗಳು.
ಕೈಗಾರಿಕಾ ಉಪಕರಣಗಳು: ಕೂಲಿಂಗ್ ಟವರ್‌ಗಳು ಮತ್ತು ಚಿಲ್ಲರ್‌ಗಳಿಗೂ ಇದು ಅನ್ವಯ.
ಸೌರಶಕ್ತಿ ಸಾಧನಗಳು: ಸೋಲಾರ್ ಇನ್ವರ್ಟರ್‌ಗಳ ಮೇಲೂ ಇನ್ನು ಸ್ಟಾರ್ ರೇಟಿಂಗ್ ಇರಲಿದೆ
ಹಿಂದೆ ಈ ಬಹುತೇಕ ವಸ್ತುಗಳಿಗೆ ಸ್ಟಾರ್ ರೇಟಿಂಗ್ ಪಡೆಯುವುದು ಕಂಪನಿಗಳ ಮರ್ಜಿಯಾಗಿತ್ತು (Voluntary). ಆದರೆ, ಜುಲೈ 2025 ರಲ್ಲಿ ಸಾರ್ವಜನಿಕರ ಅಭಿಪ್ರಾಯ ಸಂಗ್ರಹಿಸಿದ ನಂತರ, ಸರ್ಕಾರ ಈಗ ಇದನ್ನು ಕಡ್ಡಾಯಗೊಳಿಸಿದೆ. ಇದರಿಂದ ಗ್ರಾಹಕರಿಗೆ ತಾವು ಖರೀದಿಸುವ ವಸ್ತು ಎಷ್ಟು ವಿದ್ಯುತ್ ಅಥವಾ ಇಂಧನ ಬಳಸುತ್ತದೆ ಎಂಬ ಸ್ಪಷ್ಟ ಚಿತ್ರಣ ಸಿಗಲಿದೆ.
ಹಳೆಯ ಲಿಸ್ಟ್‌ನಲ್ಲಿ ಬದಲಾವಣೆ:
ಈಗಾಗಲೇ ಎಸಿ (AC), ಸೀಲಿಂಗ್ ಫ್ಯಾನ್, ಗೀಸರ್, ವಾಷಿಂಗ್ ಮೆಷಿನ್ ಮತ್ತು ಎಲ್‌ಇಡಿ (LED) ಬಲ್ಬ್‌ಗಳಿಗೆ ಸ್ಟಾರ್ ರೇಟಿಂಗ್ ಕಡ್ಡಾಯವಾಗಿತ್ತು. ಆದರೆ ಈಗ ಅವುಗಳ ಮಾನದಂಡಗಳನ್ನು (Norms) ಮತ್ತಷ್ಟು ಕಠಿಣಗೊಳಿಸಲಾಗಿದ್ದು, ಉಪಕರಣಗಳನ್ನು ಇನ್ನಷ್ಟು ವಿದ್ಯುತ್ ಉಳಿತಾಯ ಮಾಡುವಂತೆ (Energy Efficient) ವಿನ್ಯಾಸಗೊಳಿಸಲು ತಯಾರಕರಿಗೆ ಸೂಚಿಸಲಾಗಿದೆ.
ಗ್ರಾಹಕರಿಗೆ ಇದರಿಂದ ಏನು ಲಾಭ?
ಸಾಮಾನ್ಯವಾಗಿ ನಾವು ಕಡಿಮೆ ಬೆಲೆಗೆ ಸಿಗುವ ಎಲೆಕ್ಟ್ರಾನಿಕ್ ವಸ್ತುಗಳನ್ನು ಖರೀದಿಸುತ್ತೇವೆ. ಆದರೆ ಅವು ಭಾರಿ ಪ್ರಮಾಣದ ವಿದ್ಯುತ್ ಬಳಸುವುದರಿಂದ ಪ್ರತಿ ತಿಂಗಳು ಕರೆಂಟ್ ಬಿಲ್ ದೊಡ್ಡ ಹೊರೆಯಾಗುತ್ತದೆ.
ಬಿಲ್ ಉಳಿತಾಯ: ಹೆಚ್ಚಿನ ಸ್ಟಾರ್ (ಉದಾಹರಣೆಗೆ 5-ಸ್ಟಾರ್) ಇರುವ ವಸ್ತುಗಳು ಕಡಿಮೆ ವಿದ್ಯುತ್ ಬಳಸುತ್ತವೆ.
ಗುಣಮಟ್ಟದ ಖಾತರಿ: ಸ್ಟಾರ್ ಲೇಬಲ್ ಇರುವ ವಸ್ತುಗಳು ಸರ್ಕಾರದ ದಕ್ಷತೆಯ ಮಾನದಂಡಗಳನ್ನು ಪೂರೈಸಿರುತ್ತವೆ.
ಪರಿಸರ ರಕ್ಷಣೆ: ಕಡಿಮೆ ಇಂಧನ ಮತ್ತು ವಿದ್ಯುತ್ ಬಳಕೆಯಿಂದ ಪರಿಸರ ಮಾಲಿನ್ಯವೂ ತಗ್ಗುತ್ತದೆ
