ಭಾರತದಲ್ಲಿ 180 ದಿನಗಳಿಗಿಂತ ಹೆಚ್ಚು ಕಾಲ ಉಳಿಯಲು ಬಯಸುವ ವಿದೇಶಿ ಪ್ರಜೆಗಳು ಇನ್ನು ಮುಂದೆ ತಮ್ಮ ವೀಸಾ ಅವಧಿ ಮುಗಿಯುವ ಮುನ್ನವೇ ನೋಂದಣಿ ಮಾಡಿಕೊಳ್ಳಬೇಕೆಂದು ಕೇಂದ್ರ ಗೃಹ ಸಚಿವಾಲಯವು ವಲಸೆ ಮತ್ತು ವಿದೇಶಿಯರ ನಿಯಮಗಳು, 2025 ಅನ್ನು ತಿದ್ದುಪಡಿ ಮಾಡಿದೆ. 180 ದಿನಗಳು ಅಥವಾ ಅದಕ್ಕಿಂತ ಕಡಿಮೆ ಅವಧಿಯ ವೀಸಾದಲ್ಲಿ ಭಾರತಕ್ಕೆ ಆಗಮಿಸುವ ವಿದೇಶಿಯರು, ತಮ್ಮ ವಾಸ್ತವ್ಯವನ್ನು 180 ದಿನಗಳಿಗಿಂತ ಹೆಚ್ಚು ಕಾಲ ವಿಸ್ತರಿಸಲು ಬಯಸಿದರೆ, ಆ 180 ದಿನಗಳ ಅವಧಿ ಮುಗಿಯುವ ಮುನ್ನವೇ ನೋಂದಣಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಬೇಕು.
ಈ ಹಿಂದೆ ವಿದೇಶಿಯರು ಭಾರತಕ್ಕೆ ಬಂದ 180 ದಿನಗಳ ನಂತರ 14 ದಿನಗಳ ಒಳಗೆ ನೋಂದಣಿ ಮಾಡಿಕೊಳ್ಳಲು ಅವಕಾಶವಿತ್ತು, ಆದರೆ ಈಗ ಆ ನಿಯಮವನ್ನು ಬದಲಿಸಲಾಗಿದೆ.180 ದಿನಗಳಿಗಿಂತ ಹೆಚ್ಚಿನ ವೀಸಾ ಹೊಂದಿದ್ದರೂ, ಪ್ರತಿ ವಾಸ್ತವ್ಯವು 180 ದಿನಗಳನ್ನು ಮೀರಬಾರದು ಎಂಬ ಷರತ್ತು ಹೊಂದಿರುವವರಿಗೂ ಈ ಹೊಸ ನಿಯಮ ಅನ್ವಯಿಸುತ್ತದೆ. ಅಂತಹವರು ಭಾರತದಲ್ಲಿ ತಮ್ಮ ವಾಸ್ತವ್ಯವನ್ನು ಮುಂದುವರಿಸಲು ಬಯಸಿದರೆ, 180 ದಿನಗಳು ಪೂರ್ಣಗೊಳ್ಳುವ ಮುನ್ನವೇ ನೋಂದಣಿ ಮಾಡಿಕೊಳ್ಳಬೇಕು.
ತುರ್ತು ಪರಿಸ್ಥಿತಿ: ನಿಗದಿತ ವಾಸ್ತವ್ಯದ ಅವಧಿಯನ್ನು ಮೀರಿ ನೋಂದಣಿ ಮಾಡಿಕೊಳ್ಳಲು “ತುರ್ತು ಸಂದರ್ಭಗಳಲ್ಲಿ ಮಾತ್ರ” ಅನುಮೋದನೆ ನೀಡಲಾಗುವುದು ಎಂದು ಸರ್ಕಾರ ಸ್ಪಷ್ಟಪಡಿಸಿದೆ.
ಮಕ್ಕಳ ಜನನಕ್ಕೆ ಸಂಬಂಧಿಸಿದ ನಿಯಮಗಳಲ್ಲಿ ವಿನಾಯಿತಿ:
ವಿದೇಶಿ ಪೋಷಕರಿಗೆ ಭಾರತದಲ್ಲಿ ಜನಿಸುವ ಮಕ್ಕಳ ವಿಷಯದಲ್ಲಿ ಹೊಸ ನಿಯಮಗಳು ಸ್ವಲ್ಪ ಸಡಿಲಿಕೆ ನೀಡಿವೆ.
ಪೋಷಕರಲ್ಲಿ ಒಬ್ಬರು ಭಾರತೀಯ ಪ್ರಜೆಯಾಗಿದ್ದು, ಮಗು ಭಾರತೀಯ ಪೌರತ್ವವನ್ನು ಪಡೆಯಲು ಬಯಸಿದರೆ, ಹಿಂದಿನಂತೆ 30 ದಿನಗಳೊಳಗೆ ನೋಂದಣಿ ಅಧಿಕಾರಿಗಳಿಗೆ ಮಾಹಿತಿ ನೀಡುವ ಕಡ್ಡಾಯ ನಿಯಮ ಅನ್ವಯಿಸುವುದಿಲ್ಲ.
ಆದರೆ, ಮಗು ನಂತರದ ದಿನಗಳಲ್ಲಿ ಬೇರೆ ದೇಶದ ಪೌರತ್ವವನ್ನು ಪಡೆದರೆ, ವಿದೇಶಿ ಪೌರತ್ವ ಪಡೆದ 30 ದಿನಗಳೊಳಗೆ ಪೋಷಕರು ನೋಂದಣಿ ಅಧಿಕಾರಿಗೆ ಮಾಹಿತಿ ನೀಡಬೇಕು.
ಜೊತೆಗೆ, ಆಸ್ಪತ್ರೆಗಳು ಮತ್ತು ವೈದ್ಯಕೀಯ ಸಂಸ್ಥೆಗಳು ವಿದೇಶಿ ಪ್ರಜೆಗಳಿಗೆ ಚಿಕಿತ್ಸೆ ಅಥವಾ ವಸತಿ ಕಲ್ಪಿಸುವ ಕುರಿತಾದ ವರದಿ ಮಾಡುವ ಪ್ರಕ್ರಿಯೆಗಳಲ್ಲೂ ಸರ್ಕಾರ ಬದಲಾವಣೆ ತಂದಿದೆ.
