ಬೆಂಗಳೂರು: ಸ್ವಂತ ಮನೆಯೆಂಬುದು ಪ್ರತಿಯೊಬ್ಬ ಮಧ್ಯಮ ವರ್ಗದ ವ್ಯಕ್ತಿಯ ಜೀವಮಾನದ ಕನಸು. ಆದರೆ ಸಾಲ ಮತ್ತು ಇಎಂಐ (EMI) ಹೊರೆಗೆ ಹೆದರಿ ಸುಮ್ಮನಾಗುವವರೇ ಹೆಚ್ಚು. ಈಗ ಅಂತಹವರಿಗಾಗಿ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ಸಿಹಿ ಸುದ್ದಿ ನೀಡಿದೆ. ಕಳೆದ ವರ್ಷ ರೆಪೋ ದರವನ್ನು ಶೇ. 1.25 ರಷ್ಟು ಕಡಿತಗೊಳಿಸಿರುವುದು ಈಗ ಗೃಹ ಸಾಲದ ಬಡ್ಡಿದರ ಇಳಿಕೆಗೆ ಕಾರಣವಾಗಿದೆ.
ಬ್ಯಾಂಕ್ ಆಫ್ ಬರೋಡಾದಲ್ಲಿ ಕೇವಲ 7.20% ಬಡ್ಡಿ
ರೆಪೋ ದರ ಕಡಿತದ ಲಾಭವನ್ನು ಸಾರ್ವಜನಿಕ ವಲಯದ ಬ್ಯಾಂಕುಗಳು ಗ್ರಾಹಕರಿಗೆ ವರ್ಗಾಯಿಸುತ್ತಿವೆ. ಉದಾಹರಣೆಗೆ, ಬ್ಯಾಂಕ್ ಆಫ್ ಬರೋಡಾ ಪ್ರಸ್ತುತ ಶೇಕಡಾ 7.20 ರಷ್ಟು ಕನಿಷ್ಠ ಬಡ್ಡಿದರದಲ್ಲಿ ಗೃಹ ಸಾಲವನ್ನು ನೀಡುತ್ತಿದೆ. ಇದು ಮನೆ ಕಟ್ಟುವ ಅಥವಾ ಫ್ಲಾಟ್ ಖರೀದಿಸುವವರಿಗೆ ಸುವರ್ಣ ಅವಕಾಶವಾಗಿದೆ.ನೀವು 50 ಲಕ್ಷ ರೂಪಾಯಿ ಸಾಲ ಪಡೆಯಲು ಯೋಜಿಸಿದ್ದರೆ, ನಿಮ್ಮ ಮರುಪಾವತಿ ಅವಧಿಗೆ ಅನುಗುಣವಾಗಿ ಸಂಬಳ ಮತ್ತು ಇಎಂಐ ಈ ಕೆಳಗಿನಂತಿರುತ್ತದೆ:
ಸಾಲದ ಅವಧಿನಿಮ್ಮ ಮಾಸಿಕ ಸಂಬಳ (ಕನಿಷ್ಠ)ತಿಂಗಳ ಇಎಂಐ (ಸುಮಾರು)
30 ವರ್ಷಗಳು₹68,000 ₹34,000
25 ವರ್ಷಗಳು₹72,000₹36,000
20 ವರ್ಷಗಳು₹79,000₹41,000 (ಅಂದಾಜು)
ಸಾಲ ಪಡೆಯುವ ಮುನ್ನ ಇವುಗಳಿರಲಿ ಗಮನದಲ್ಲಿ:
ಬೇರೆ ಸಾಲಗಳಿರಬಾರದು: ಮೇಲೆ ತಿಳಿಸಿದ ಲೆಕ್ಕಾಚಾರವು ನಿಮಗೆ ಬೇರೆ ಯಾವುದೇ ಬಾಕಿ ಸಾಲಗಳು (ಉದಾಹರಣೆಗೆ ಕಾರ್ ಲೋನ್ ಅಥವಾ ಪರ್ಸನಲ್ ಲೋನ್) ಇಲ್ಲದಿದ್ದಾಗ ಮಾತ್ರ ಅನ್ವಯಿಸುತ್ತದೆ.
ಸಿಬಿಲ್ ಸ್ಕೋರ್ (CIBIL Score): ಕೇವಲ ಸಂಬಳವಿದ್ದರೆ ಸಾಲ ಸಿಗುವುದಿಲ್ಲ. ನಿಮ್ಮ ಹಳೆಯ ಸಾಲದ ಮರುಪಾವತಿ ದಾಖಲೆ ಅಥವಾ ಕ್ರೆಡಿಟ್ ಸ್ಕೋರ್ ಉತ್ತಮವಾಗಿರಬೇಕು. ಸ್ಕೋರ್ ಕಡಿಮೆ ಇದ್ದರೆ ಬ್ಯಾಂಕ್ ಸಾಲ ನಿರಾಕರಿಸಬಹುದು ಅಥವಾ ಹೆಚ್ಚಿನ ಬಡ್ಡಿ ವಿಧಿಸಬಹುದು.
ಆರ್ಥಿಕ ಶಿಸ್ತು: ನಿಮ್ಮ ಒಟ್ಟು ಸಂಬಳದ ಅರ್ಧದಷ್ಟು ಭಾಗ ಇಎಂಐಗೆ ಹೋದರೆ ಉಳಿದ ಹಣದಲ್ಲಿ ಮನೆ ನಿರ್ವಹಣೆ ಸಾಧ್ಯವೇ ಎಂಬುದನ್ನು ಮೊದಲೇ ಯೋಚಿಸಿ
