ರಾತ್ರಿ ಮಲಗುವಾಗ ಮೊಬೈಲ್ ಫೋನ್ ಅನ್ನು ದಿಂಬಿನ ಕೆಳಗೆ, ಹಾಸಿಗೆಯ ಮೇಲೆ ಅಥವಾ ತಲೆಯ ಪಕ್ಕದಲ್ಲಿ ಇಟ್ಟುಕೊಳ್ಳುವುದು ಇತ್ತೀಚಿನ ದಿನಗಳಲ್ಲಿ ಸಾಮಾನ್ಯ ಅಭ್ಯಾಸವಾಗಿದೆ. ನೋಟಿಫಿಕೇಶನ್ ನೋಡುವುದು, ಅಲಾರಾಂ ಇಡುವುದು ಅಥವಾ ಸಂದೇಶಗಳಿಗೆ ಉತ್ತರಿಸಲು ಅನುಕೂಲವಾಗಲಿ ಎಂದು ಹಲವರು ಹೀಗೆ ಮಾಡುತ್ತಾರೆ. ಆದರೆ ತಲೆಯ ಬಳಿಯೇ ಮೊಬೈಲ್ ಇಟ್ಟುಕೊಂಡು ಮಲಗುವುದು ನಿಜಕ್ಕೂ ಅಪಾಯಕಾರಿಯೇ ಎಂಬ ಪ್ರಶ್ನೆ ಎಲ್ಲರಲ್ಲೂ ಇದೆ.
ಮೊಬೈಲ್‌ನಿಂದ ಹೊರಹೊಮ್ಮುವ ರೇಡಿಯೋ ಫ್ರೀಕ್ವೆನ್ಸಿ ಶಕ್ತಿಯು ನಾನ್ ಅಯಾನೈಸಿಂಗ್ ವಿಕಿರಣವಾಗಿದ್ದು, ಇದು ಡಿಎನ್‌ಎ ಮೇಲಾಗಲಿ ಅಥವಾ ಆರೋಗ್ಯದ ಮೇಲಾಗಲಿ ತಕ್ಷಣಕ್ಕೆ ಯಾವುದೇ ಗಂಭೀರ ಹಾನಿಯನ್ನುಂಟು ಮಾಡುವುದಿಲ್ಲ ಎಂದು ಸಂಶೋಧನೆಗಳು ತಿಳಿಸಿವೆ. ಜಾಗತಿಕ ಆರೋಗ್ಯ ಸಂಸ್ಥೆ ಮತ್ತು ವಿಶ್ವದ ಪ್ರಮುಖ ಸಂಶೋಧನಾ ಸಂಸ್ಥೆಗಳ ಪ್ರಕಾರ, ಸಾಮಾನ್ಯ ಫೋನ್‌ನಿಂದ ಕ್ಯಾನ್ಸರ್‌ನಂತಹ ಗಂಭೀರ ಕಾಯಿಲೆಗಳು ಬರುತ್ತವೆ ಎಂಬುದಕ್ಕೆ ಯಾವುದೇ ಬಲವಾದ ಪುರಾವೆಗಳಿಲ್ಲ. ಆದರೆ ದಿಂಬಿನ ಕೆಳಗೆ ಫೋನ್ ಇಟ್ಟುಕೊಳ್ಳುವುದು ಮತ್ತು ಮಲಗುವ ಮುನ್ನ ನಿರಂತರವಾಗಿ ಬಳಸುವುದು ಖಂಡಿತವಾಗಿಯೂ ಅಪಾಯಕಾರಿ.
ಫೋನ್‌ನಿಂದ ಬರುವ ರೇಡಿಯೇಶನ್‌ಗಿಂತ ಹೆಚ್ಚಾಗಿ, ದಿಂಬಿನ ಕೆಳಗೆ ಇಟ್ಟು ಚಾರ್ಜ್ ಮಾಡುವುದರಿಂದ ಫೋನ್ ಬಿಸಿಯಾಗಿ ಬೆಂಕಿ ಹೊತ್ತಿಕೊಳ್ಳುವ ಅಪಾಯ ಹೆಚ್ಚಿರುತ್ತದೆ. ಜೊತೆಗೆ ರಾತ್ರಿ ವೇಳೆ ಸ್ಕ್ರೀನ್‌ನಿಂದ ಬರುವ ಬೆಳಕು, ನೋಟಿಫಿಕೇಶನ್‌ಗಳ ಶಬ್ದ ಮತ್ತು ಮಲಗುವ ಮುನ್ನ ಸೋಶಿಯಲ್ ಮೀಡಿಯಾ ಬಳಕೆಯು ನಿದ್ರೆಯ ಗುಣಮಟ್ಟವನ್ನು ಸಂಪೂರ್ಣವಾಗಿ ಹಾಳುಮಾಡುತ್ತದೆ. ಹೀಗಾಗಿ ಫೋನ್ ಅನ್ನು ದಿಂಬಿನ ಕೆಳಗೆ ಇಡುವ ಬದಲು ಸ್ವಲ್ಪ ದೂರದಲ್ಲಿರುವ ಟೇಬಲ್ ಮೇಲೆ ಇಡುವುದು, ಚಾರ್ಜ್ ಮಾಡುವಾಗ ಗಾಳಿಯಾಡುವ ಜಾಗದಲ್ಲಿಡುವುದು ಮತ್ತು ರಾತ್ರಿ ಏರ್‌ಪ್ಲೇನ್ ಮೋಡ್ ಅಥವಾ ಡೂ ನೋಟ್ ಡಿಸ್ಟರ್ಬ್ ಮೋಡ್‌ನಲ್ಲಿಡುವುದು ಉತ್ತಮ ಆರೋಗ್ಯಕ್ಕೆ ಸೂಕ್ತ.
