ಕ್ಷುಲ್ಲಕ ಕಾರಣಕ್ಕೆ ಯುವತಿಯಿಂದ ರಿಕ್ಷಾ ಚಾಲಕನಿಗೆ ಕಪಾಳಮೋಕ್ಷ…!

ನೋಯ್ಡಾದಲ್ಲಿ ಯುವತಿಯೊಬ್ಬರು ರಸ್ತೆ ನಡುವೆ ಇ-ರಿಕ್ಷಾ ಚಾಲಕನ ಕಾಲರ್​ ಹಿಡಿದು ಕಪಾಳಮೋಕ್ಷ ಮಾಡಿ, ನಿಂದಿಸಿ, ಕಿರುಚಾಡಿ ಆತನನ್ನು ಎಳೆದಾಡುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿದೆ.

ನೋಯ್ಡಾದ 2 ನೇ ಹಂತದ, ಸೆಕ್ಟರ್​ 110 ರ ಮಾರುಕಟ್ಟೆಯಲ್ಲಿ ಶನಿವಾರ ಬೆಳಿಗ್ಗೆ ಈ ಘಟನೆ ನಡೆದಿದೆ. ಇ-ರಿಕ್ಷಾದ ಒಂದು ಬದಿಯು ಯುವತಿಯ ಕಾರಿಗೆ ಢಿಕ್ಕಿಯಾಯಿತು. ನಂತರ ಕಾರಿನಲ್ಲಿದ್ದ ಯುವತಿ ತಾಳ್ಮೆ ಕಳೆದುಕೊಂಡು ಇ-ರಿಕ್ಷಾ ಚಾಲಕನಿಗೆ ಕಪಾಳಮೋಕ್ಷ ಮಾಡಲು ಪ್ರಾರಂಭಿಸಿದ್ದಾಳೆ. ಅಷ್ಟರಲ್ಲಿ ಕೆಲವು ಪ್ರತ್ಯಕ್ಷದಶಿರ್ಗಳು ಸ್ಥಳದಲ್ಲಿ ಜಮಾಯಿಸಿದ್ದರೂ ಯಾರೂ ಮಧ್ಯ ಪ್ರವೇಶಿಸಲಿಲ್ಲ.

ವಿಡಿಯೋ ವೈರಲ್​ ಆದ ನಂತರ ಯುವತಿ ವಿರುದ್ಧ ಕ್ರಮ ಕೈಗೊಳ್ಳುವಂತೆ ನೋಯ್ಡಾ ಪೊಲೀಸರ ಮೇಲೆ ಒತ್ತಡ ಹೆಚ್ಚಾಗಿದೆ. ಆಕೆಯಿಂದ ಪೆಟ್ಟುತಿಂದ ಸಂತ್ರಸ್ತ ಮಿಥುನ್​ ನೀಡಿದ ದೂರಿನ ಮೇರೆಗೆ ಪೊಲೀಸರು ಪ್ರಕರಣ ದಾಖಲಿಸಿದ್ದು, ಆರೋಪಿ ಕಿರಣ ಸಿಂಗ್​ರನ್ನು ಬಂಧಿಸಿದ್ದಾರೆ.

ರಿಕ್ಷಾ ಚಾಲಕನ ಮೇಲೆ ದೌರ್ಜನ್ಯ ಎಂದು ನೆಟ್ಟಿಗರು ಹರಿಹಾಯ್ದಿದ್ದಾರೆ. ಅಪಘಾತ ಆಕಸ್ಮಿಕ, ಆ ಯುವತಿ ದೂರು ಕೊಡಲಿ, ಅದರ ಬದಲು ದೌರ್ಜನ್ಯ ನಡೆಸುವುದು ಸರಿಯಲ್ಲ ಎಂದು ಟೀಕಾಪ್ರಹಾರ ಮಾಡಿದ್ದಾರೆ.