ದೇಶದಲ್ಲೇ ಅತಿ ಕಡಿಮೆ ದರಕ್ಕೆ ವಿದ್ಯುತ್​ ಪೂರೈಸಲು ಮುಂದಾಗಿದೆ ಈ​ ಸರ್ಕಾರ..!

ವಿಧಾನಸಭಾ ಚುನಾವಣೆಯನ್ನು ಗಮನದಲ್ಲಿ ಇರಿಸಿರುವ ಪಂಜಾಬ್​ ಸಿಎಂ ಚರಣ್​ಜೀತ್​ ಸಿಂಗ್​ ಚನ್ನಿ ವಿದ್ಯುತ್​ ಬಿಲ್​ನಲ್ಲಿ ಮೂರು ರೂಪಾಯಿ ಕಡಿತಗೊಳಿಸಿ ಘೋಷಣೆ ಮಾಡಿದ್ದಾರೆ. ಇದರಿಂದ ಪಂಜಾಬ್​ ಜನತೆಗೆ ದೀಪಾವಳಿ ಬಂಪರ್​ ದೊರಕಿದಂತಾಗಿದೆ.

ಈ ಘೋಷಣೆಯನ್ನು ಮಾಡುತ್ತಾ ಮಾತನಾಡಿದ ಪಂಜಾಬ್​ ಸಿಎಂ ಚರಣ್​ಜೀತ್​ ಸಿಂಗ್​ ಚನ್ನಿ, ನಾವು ಎಲೆಕ್ಟ್ರಿಸಿಟಿ ದರ ಇಳಿಸುವ ಮುನ್ನ ಒಂದು ಸರ್ವೇಯನ್ನು ಮಾಡಿದ್ದೆವು. ಈ ಸರ್ವೇಯಲ್ಲಿ ಜನರಿಗೆ ಉಚಿತ ಎಲೆಕ್ಟ್ರಿಸಿಟಿ ಬೇಕಿರಲಿಲ್ಲ ಆದರೆ ಕಡಿಮೆ ದರದಲ್ಲಿ ವಿದ್ಯುತ್​ ಸಂಪರ್ಕ ಬೇಕು ಎಂದು ಹೇಳಿದ್ದರು ಎಂದಿದ್ದಾರೆ.

ಇದೀಗ 100 ವ್ಯಾಟ್​​ವರೆಗೆ ನಮ್ಮ ದರವು 1.19 ರೂಪಾಯಿ ಆಗಿದೆ. 100 ರಿಂದ 300 ಯನಿಟ್ಸ್​​ ಬಳಕೆ ಮಾಡುವವರಿಗೆ ಹೊಸ ವಿದ್ಯುತ್​ ದರದ ಪ್ರಕಾರ ಪ್ರತಿ ಯುನಿಟ್​ಗೆ 4 ರೂಪಾಯಿ ಬೀಳಲಿದೆ. ಈ ಹಿಂದೆ ಈ ದರವು 7 ರೂಪಾಯಿ ಇದ್ದಿತ್ತು. 300 ಯೂನಿಟ್​ಗೂ ಅಧಿಕ ವಿದ್ಯುತ್​ ಬಳಕೆಮಾಡುವವರು ಪ್ರತಿ ಯುನಿಟ್​ಗೆ 5 ರೂಪಾಯಿ ಪಾವತಿಸಬೇಕು. ಈ ಹೊಸ ದರ ಈಗಾಗಲೇ ಅನ್ವಯವಾಗಲಿದೆ ಎಂದು ಹೇಳಿದರು.

ಈ ಹೊಸ ಆದೇಶದಿಂದಾಗಿ ಪಂಜಾಬ್​ ಸರ್ಕಾರವು ಸಂಪೂರ್ಣ ದೇಶದಲ್ಲೇ ಜನತೆಗೆ ಅತಿ ಕಡಿಮೆ ದರದಲ್ಲಿ ಎಲೆಕ್ಟ್ರಿಸಿಟಿ ಒದಗಿಸುತ್ತಿರುವ ರಾಜ್ಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಈ ಹೊಸ ಆದೇಶದಿಂದಾಗಿ ಪಂಜಾಬ್​ ಸರ್ಕಾರದ ಖಜಾನೆಗೆ 3316 ಕೋಟಿ ರೂಪಾಯಿ ಹೆಚ್ಚುವರಿ ಹೊರೆ ಬಿದ್ದಂತಾಗಿದೆ.