ಶಿವಲಿಂಗಕ್ಕೆ ದಿನವಿಡೀ ಸಮುದ್ರದೇವನಿಂದಲೇ ಜಲಾಭಿಷೇಕ; ಈ ವಿಶೇಷ ದೇವಾಲಯ ಎಲ್ಲಿದೆ ಗೊತ್ತಾ….?

ಭಾರತದಲ್ಲಿ ಅನೇಕ ಪ್ರಸಿದ್ಧ ಶಿವ ದೇವಾಲಯಗಳಿವೆ. ಶ್ರಾವಣಮಾಸದಲ್ಲಿ ಬೋಲೆನಾಥನ ಆರಾಧನೆ ಮಾಡುವುದು ಬಹಳ ಶ್ರೇಷ್ಠ. ಜುಲೈ 22ರಿಂದ ಆಗಸ್ಟ್ 19ರವರೆಗೆ ಶ್ರಾವಣ ಮಾಸ ಆಚರಿಸಲಾಗುತ್ತಿದೆ. ಈ ಸಮಯದಲ್ಲಿ ಅತ್ಯಂತ ಪುರಾತನ ಹಾಗೂ ಸ್ವತಃ ಸಮುದ್ರದೇವನೇ ಪ್ರತಿಷ್ಠಾಪನೆ ಮಾಡಿದ ಶಿವಲಿಂಗ ದರ್ಶನ ಮಾಡಬಹುದು.

ಗುಜರಾತ್‌ ಬಳಿ ದಿಯುನಿಂದ 3 ಕಿಲೋಮೀಟರ್ ದೂರದಲ್ಲಿರುವ ಫುಡಾಮ್‌ನಲ್ಲಿರುವ ಗಂಗೇಶ್ವರ ಮಹಾದೇವ ದೇವಾಲಯವು ಬಹಳ ಅದ್ಭುತವಾಗಿದೆ. ಇಲ್ಲಿ ಶಿವಲಿಂಗವು ಸಮುದ್ರತೀರದಲ್ಲಿ ಬಂಡೆಗಳ ಮೇಲೆ ನೆಲೆಗೊಂಡಿದೆ. ಪ್ರತಿ ನಿಮಿಷಕ್ಕೊಮ್ಮೆ ಸಮುದ್ರದ ಅಲೆಗಳು ಇಲ್ಲಿನ ಬಂಡೆಗಳಿಗೆ ಅಪ್ಪಳಿಸಿ ಶಿವಲಿಂಗಕ್ಕೆ ಜಲಾಭಿಷೇಕ ಮಾಡುತ್ತವೆ.

5000 ವರ್ಷಗಳಷ್ಟು ಹಳೆಯ ಶಿವಲಿಂಗ

ಗಂಗೇಶ್ವರ ಮಹಾದೇವ ದೇವಾಲಯವು ಸುಮಾರು 5000 ವರ್ಷಗಳಷ್ಟು ಹಳೆಯದು. ಇದು ಮಹಾಭಾರತದ ಕಾಲಕ್ಕೆ ಸೇರಿದೆ ಎಂದು ನಂಬಲಾಗಿದೆ. ಈ ಶಿವಲಿಂಗವನ್ನು ಪಾಂಡವರು ತಮ್ಮ ವನವಾಸದ ಅವಧಿಯಲ್ಲಿ ನಿರ್ಮಿಸಿದರಂತೆ. ಈ ದೇವಾಲಯದಲ್ಲಿ 5 ಶಿವಲಿಂಗಗಳಿವೆ. ಸಮುದ್ರದ ಅಲೆಗಳು ಡಿಕ್ಕಿ ಹೊಡೆದು ಶಿವಲಿಂಗಕ್ಕೆ ಅಭಿಷೇಕ ಮಾಡಿದ ನಂತರ ಮತ್ತೆ ಸಮುದ್ರದಲ್ಲಿ ವಿಲೀನಗೊಳ್ಳುತ್ತವೆ. ಪ್ರತಿ ವರ್ಷ ಶಿವರಾತ್ರಿಯಂದು ಈ ದೇವಾಲಯದಲ್ಲಿ ಭವ್ಯವಾದ ಕಾರ್ಯಕ್ರಮವನ್ನು ಆಯೋಜಿಸಲಾಗುತ್ತದೆ. ಲಕ್ಷಾಂತರ ಭಕ್ತರು ಶಿವನ ದರ್ಶನಕ್ಕೆ ಬರುತ್ತಾರೆ. ಶಿವಲಿಂಗದ ಬಳಿಯ ಮೇಲ್ಭಾಗದಲ್ಲಿರುವ ಬಂಡೆಯ ಮೇಲೆ ಹಾವಿನ ಆಕಾರವನ್ನೂ ಕೆತ್ತಲಾಗಿದೆ.

ಸಮುದ್ರ ತೀರದಲ್ಲಿರುವುದರಿಂದ ಈ ದೇವಾಲಯವನ್ನು ‘ಸಮುದ್ರ ದೇವಾಲಯ’ ಎಂದೂ ಕರೆಯುತ್ತಾರೆ. ಇಲ್ಲಿ ನೆಲೆಗೊಂಡಿರುವ ಶಿವನನ್ನು ಗಂಗೇಶ್ವರ ಎಂದೂ ಕರೆಯುತ್ತಾರೆ. ಫದುಮ್ ಗ್ರಾಮದಲ್ಲಿರುವ ಈ ದೇವಾಲಯಕ್ಕೆ ಬೆಳಗ್ಗೆ 6 ರಿಂದ ರಾತ್ರಿ 8 ರವರೆಗೆ ಭಕ್ತರು ಭೇಟಿ ನೀಡಬಹುದು.

ಈ ದೇವಾಲಯದಲ್ಲಿ ಶಿವ ಮಾತ್ರವಲ್ಲ ಗಣೇಶ, ವಿಷ್ಣು ಮತ್ತು ಲಕ್ಷ್ಮಿ ಮಾತೆಯ ವಿಗ್ರಹಗಳನ್ನು ಸಹ ಸ್ಥಾಪಿಸಲಾಗಿದೆ. ದೇವಾಲಯ ಮತ್ತು ಅದರ ಸುತ್ತಮುತ್ತಲಿನ ಸೌಂದರ್ಯವೂ ಮನಮೋಹಕವಾಗಿದೆ.