ವಿಕಲಚೇತನರೇ ನಡೆಸುತ್ತಿದ್ದಾರೆ ಈ ರೆಸ್ಟೋರೆಂಟ್; ಆತ್ಮೀಯತೆಗೆ ಫಿದಾ ಆದ ಗ್ರಾಹಕರು

ಕಿವುಡು, ಮೂಕರು ಸೇರಿದಂತೆ ಕೆಲವೊಂದು ನ್ಯೂನ್ಯತೆ ಇರುವವರು ಎಲ್ಲ ಸರಿಯಿರುವವರಿಗಿಂತಲೂ ಹೆಚ್ಚಿನ ಶಕ್ತಿ, ಸಾಮರ್ಥ್ಯ ಹೊಂದಿರುತ್ತಾರೆ ಎನ್ನುವುದು ಸುಳ್ಳಲ್ಲ. ಆದರೆ ಹಲವಾರು ಬಾರಿ ಇಂಥವರನ್ನು ಕಡೆಗಣಿಸಲಾಗುತ್ತಿದೆ. ಆದರೆ ಪುಣೆಯ ಒಂದು ರೆಸ್ಟೋರೆಂಟ್​ ಮಾತ್ರ ಇದೀಗ ಜನರ ಮನಸ್ಸನ್ನು ಗೆದ್ದಿದೆ. ಇದಕ್ಕೆ ಕಾರಣ, ಇಲ್ಲಿಯ ರೆಸ್ಟಾರೆಂಟ್ ಕಿವುಡ ಮತ್ತು ಮೂಕ ಸಿಬ್ಬಂದಿ ನಡೆಸುತ್ತಾರೆ,

ಇದರ ವಿಡಿಯೋ ವೈರಲ್​ ಆಗಿದ್ದು, ಶ್ಲಾಘನೆಗಳ ಮಹಾಪೂರವೇ ಹರಿದು ಬರುತ್ತಿದೆ. ಹೋಟೆಲ್​ಗೆ ಬರುವ ಅತಿಥಿಗಳನ್ನು ಸಿಬ್ಬಂದಿ ತಮ್ಮದೇ ಸಾಂಕೇತಿಕ ಭಾಷೆಯಲ್ಲಿ ಸ್ವಾಗತಿಸುವುದರೊಂದಿಗೆ ಈ ವಿಡಿಯೋ ಆರಂಭವಾಗುತ್ತದೆ. ನಗುಮುಖದ ಈ ಸ್ವಾಗತ ಎಂಥವರ ಮನಸ್ಸಿಗೂ ಹಿತ ನೀಡುತ್ತದೆ.

ನಂತರ ಅಲ್ಲಿರುವ ಮೆನುವಿನಲ್ಲಿ ಹೋಟೆಲ್​ನ ಆಹಾರ ಪದಾರ್ಥಗಳನ್ನು ಉಲ್ಲೇಖಿಸಲಾಗಿದ್ದು, ಯಾವ ಆಹಾರ ಬೇಕೆಂದರೆ ಹೇಗೆ ಸಂಕೇತದ ಮೂಲಕ ಸೂಚಿಸಬೇಕು ಎಂಬುದನ್ನು ಗ್ರಾಹಕರಿಗೆ ತಿಳಿಸಲಾಗಿದೆ. ಅದನ್ನು ನೋಡುವ ಗ್ರಾಹಕರು ಹಾಗೆ ಸನ್ನೆ ಮಾಡಿದರೆ, ನಿಮ್ಮ ಆಹಾರ ಕ್ಷಣದಲ್ಲಿ ಟೇಬಲ್​ ಮೇಲೆ ಬರುತ್ತದೆ.

ಈ ವೈರಲ್​ ವಿಡಿಯೋ ಸಮಾಜದ ಕಣ್ಣು ತೆರೆಸುವಂತಿದ್ದು, ಯಾರಿಗಾದರೂ ಛಾನ್ಸ್​ ಕೊಟ್ಟರೆ ಎಂಥ ಕೆಲಸವನ್ನಾದರೂ ನಿರ್ವಹಿಸಬಲ್ಲರು ಎಂಬುದನ್ನು ತೋರಿಸುವಂತಿದೆ ಎಂದು ಹಲವರು ಕಮೆಂಟ್​ ಮಾಡುತ್ತಿದ್ದಾರೆ.