‘ಪುನೀತ್​ ನಿಧನ ವಾರ್ತೆ ಕೇಳಿ 2 ದಿನ ನಾನು ಮಲಗಿಯೇ ಇರಲಿಲ್ಲ ’ : ಗೆಳೆಯನ ಅಗಲಿಕೆಯ ನೋವು ಹಂಚಿಕೊಂಡ ತಮಿಳು ನಟ ವಿಶಾಲ್​

ಕರ್ನಾಟಕ ರತ್ನ ದಿವಂಗತ ಪುನೀತ್​ ರಾಜ್​ಕುಮಾರ್​​ ನಮ್ಮನಗಲಿ ಹಲವು ದಿನಗಳೇ ಕಳೆದರೂ ಸಹ ಈಗಲೂ ಅಭಿಮಾನಿಗಳ ಎದೆಯಲ್ಲಿ ಅಪ್ಪು ಜೀವಂತವಾಗಿದ್ದಾರೆ.

ಅಕ್ಟೋಬರ್​ 29ರಂದು ಬರಸಿಡಿಲಿನಂತೆ ಬಂದೆರಗಿದ ಈ ಸುದ್ದಿಯನ್ನು ಇನ್ನೂ ಕರುನಾಡಿಗೆ ಜೀರ್ಣಿಸಿಕೊಳ್ಳಲು ಸಾಧ್ಯವಾಗಿಲ್ಲ. ಅಭಿಮಾನಿಗಳು ಹಾಗೂ ತಾರೆಯರು ಇನ್ನೂ ಕೂಡ ಅಪ್ಪು ಅಗಲಿಕೆಯ ನೋವಿನಿಂದ ಹೊರಬಂದಿಲ್ಲ.

ಪುನೀತ್​ ರಾಜ್​ಕುಮಾರ್​ ಪರವಾಗಿ ಶಕ್ತಿಧಾಮವನ್ನು ಮುನ್ನೆಡೆಸುವ ಜವಾಬ್ದಾರಿಯನ್ನು ಹೊತ್ತಿರುವ ತಮಿಳು ನಟ ವಿಶಾಲ್, ಪುನೀತ್​ ಅಗಲಿಕೆಯ ವಿಚಾರವಾಗಿ ಮಾತನಾಡಿದರು. ಪುನೀತ್​ ಸಾವಿನ ಸುದ್ದಿ ಕೇಳಿದ ಬಳಿಕ ನಟ ವಿಶಾಲ್​ ಎರಡು ರಾತ್ರಿ ನಿದ್ರೆ ಮಾಡಿರಲೇ ಇಲ್ಲವಂತೆ..! ಪುನೀತ ನಮನ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದ ನಟ ವಿಶಾಲ್​ ಪುನೀತ್​ ಜೊತೆಗಿನ ಸ್ನೇಹದ ಬಗ್ಗೆ ಮಾತನಾಡಿದ್ರು.

ಪುನೀತ್​ ನಿಧನದ ವಾರ್ತೆ ಕೇಳಿದ ಬಳಿಕ ವಿಶಾಲ್​ 2 ದಿನಗಳ ಕಾಲ ನಿದ್ರಾಹೀನತೆಯಿಂದ ಬಳಲಿದ್ದರಂತೆ.

ಪುನೀತ್​ ರಾಜಕುಮಾರ್ ನಡೆಸಿಕೊಂಡು ಹೋಗ್ತಿದ್ದ ಶಕ್ತಿಧಾಮ ಅನಾಥಾಶ್ರಮದಲ್ಲಿ ಮಕ್ಕಳ ಶಿಕ್ಷಣದ ವೆಚ್ಚವನ್ನು ನಿಭಾಯಿಸುವ ಜವಾಬ್ದಾರಿಯನ್ನು ವಿಶಾಲ್​ ಹೊತ್ತುಕೊಂಡಿದ್ದಾರೆ.

ನಾನು ಎಲ್ಲರ ಗಮನ ಸೆಳೆಯಬೇಕು ಎಂದು ಈ ಶಕ್ತಿಧಾಮದ ಜವಾಬ್ದಾರಿಯನ್ನು ವಹಿಸಿಕೊಂಡಿಲ್ಲ. ಬದಲಾಗಿ ಪುನೀತ್​ ರಾಜ್​ಕುಮಾರ್​ರ ಸಮಾಜಸೇವೆ ಕಾರ್ಯ ಮುಂದುವರಿಯಬೇಕು ಎಂಬ ಆಶಯದಿಂದ ಇದೊಂದು ವಿನಮ್ರ ಪ್ರಯತ್ನ ಮಾಡುತ್ತಿದ್ದೇನೆ ಎಂದು ಹೇಳಿದ್ರು.

ಪುನೀತ್​ ರಾಜ್​ಕುಮಾರ್​ ನಿಧನದ ಬಳಿಕ ವಿಶಾಲ್​ 1800 ಅನಾಥ ಮಕ್ಕಳ ಜವಾಬ್ದಾರಿಯನ್ನು ಹೊರುವುದಾಗಿ ಭರವಸೆ ನೀಡಿದ್ದರು. ಗಿಡವನ್ನು ನೆಟ್ಟು ಅದಕ್ಕೆ ಪುನೀತ್​ ಎಂದು ಹೆಸರಿಡುವ ಮೂಲಕ ನಟನಿಗೆ ಅಂತಿಮ ನಮನ ಸಲ್ಲಿಸಿದ್ದರು. ಪುನೀತ್​ ರಾಜ್​ಕುಮಾರ್​ ನಿವಾಸಕ್ಕೂ ಆಗಮಿಸಿದ್ದ ವಿಶಾಲ್, ಶಿವರಾಜ್ ಕುಮಾರ್ ಸೇರಿದಂತೆ ಕುಟುಂಬಸ್ಥರಿಗೆ ಸಾಂತ್ವನದ ನುಡಿಗಳನ್ನಾಡಿದ್ದಾರೆ.