ಇಲ್ಲಿದೆ ಅಪರೂಪದ ಜೀವಿಯ ವಿಡಿಯೋ; ನೀವೂ ನೋಡಿ ಕಣ್ತುಂಬಿಕೊಳ್ಳಿ

ಈಗ ಅನ್ಯಗ್ರಹ ಜೀವಿಗಳ ಬಗ್ಗೆ ಹೆಚ್ಚಿನ ಸುದ್ದಿಯಾಗುತ್ತಿದೆ. ಈ ಚಿತ್ರದಲ್ಲಿ ಕಾಣುತ್ತಿರುವುದು ಕೂಡ ನೋಡಿದಾಕ್ಷಣ ಅನ್ಯಗ್ರಹದ ಜೀವಿಯೇ ಎಂದು ಎನಿಸಲಿಕ್ಕೆ ಸಾಕು. ಆದರೆ ಅಸಲಿಗೆ ಇದು ಬೇರೆ ಗ್ರಹಗಳ ಜೀವಿಯಲ್ಲ, ಬದಲಿಗೆ ನಮ್ಮದೇ ಭೂಮಿಯ ಮೇಲೆ ಇರುವ ಅಕ್ಟೋಪಸ್​.

ಇದರ ವೈಜ್ಞಾನಿಕ ಹೆಸರು ವಿಟ್ರೆಲೆಡೋನೆಲ್ಲಾ ರಿಕಾರ್ಡಿ, ಇದನ್ನು ಕನ್ನಡದಲ್ಲಿ ಹೇಳುವುದಾದರೆ ಗಾಜಿನ ಅಕ್ಟೋಪಸ್​ ಎನ್ನಬಹುದು. ಇದಕ್ಕೆ ಕಾರಣ, ಇದು ಪಾರದರ್ಶಕವಾಗಿದ್ದು, ಗಾಜಿನಂತೆಯೇ ಕಾಣಿಸುತ್ತದೆ. ಪ್ರಪಂಚದಾದ್ಯಂತ ಉಷ್ಣವಲಯದ ಮತ್ತು ಉಪೋಷ್ಣವಲಯದ ನೀರಿನಲ್ಲಿ ಕಂಡುಬರುವ ಅತ್ಯಂತ ಅಪರೂಪವಾದ ಜೀವಿ ಇದು. ಈ ಸುಂದರವಾದ ಜೀವಿಗಳು ಸಮುದ್ರದಾಳದಲ್ಲಿ ಇದ್ದು, ಸೂರ್ಯನ ಬೆಳಕು ಇವುಗಳಿಗೆ ತಲುಪುವುದಿಲ್ಲ.

ಇದರ ವಿಡಿಯೋ ಇದೀಗ ವೈರಲ್​ ಆಗಿದೆ. ಸಾಮಾನ್ಯ ಜನರು ಕಾಣುವುದು ಕಷ್ಟ ಎಂದುಕೊಂಡ ಈ ಜೀವಿಯನ್ನು ಎಲ್ಲರೂ ನೋಡುವ ಸಲುವಾಗಿ ‘ದಿ ಆಕ್ಸಿಜನ್ ಪ್ರಾಜೆಕ್ಟ್’ ಈ ಅಪರೂಪದ ಜೀವಿಯನ್ನು ಟ್ವಿಟರ್​ನಲ್ಲಿ ಹಂಚಿಕೊಂಡಿದೆ.

ಈ ವಿಡಿಯೋದಲ್ಲಿ ಅಕ್ಟೋಪಸ್​ನ ಕಣ್ಣುಗಳು, ಆಪ್ಟಿಕ್ ನರ ಮತ್ತು ಜೀರ್ಣಾಂಗಗಳು ಮಾತ್ರ ಅಪಾರದರ್ಶಕವಾಗಿವೆ. ಉಳಿದವುಗಳು ಪಾರದರ್ಶಕವಾಗಿದ್ದು, ಸುಂದರ ಚಿತ್ರದಂತೆ ಭಾವಿಸುತ್ತದೆ.

ವೀಡಿಯೊ ಇದಾಗಲೇ 20 ಸಾವಿರಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಮತ್ತು 440 ಲೈಕ್‌ಗಳನ್ನು ಪಡೆದುಕೊಂಡಿದೆ. ಅಪರೂಪದ ಮತ್ತು ನಿಗೂಢ ಪ್ರಾಣಿಯ ಸೌಂದರ್ಯಕ್ಕೆ ನೆಟ್ಟಿಗರು ಮಂತ್ರಮುಗ್ಧರಾಗಿದ್ದಾರೆ.

https://twitter.com/TheOxygenProj/status/1579150219354116097?ref_src=twsrc%5Etfw%7Ctwcamp%5Etweetembed%7Ctwterm%5E1579150219354116097