ಕಟ್ಟಡ ಕಾರ್ಮಿಕನ ಡಾನ್ಸ್​ ನೋಡಿದ ಶಾಹಿದ್​ ಕಪೂರ್​ ಫಿದಾ

ಕಟ್ಟಡ ಕಾರ್ಮಿಕನೊಬ್ಬನ ಡ್ಯಾನ್ಸ್​ ಶೈಲಿಯನ್ನು ಬಾಲಿವುಡ್​ನ ಖ್ಯಾತ ನಾಮರೂ ತಿರುಗಿ ನೋಡುವಂತೆ ಮಾಡಿದೆ.

ಕಲೆ ಯಾರ ಸ್ವತ್ತಲ್ಲ ಎಂಬ ಮಾತಿದೆ. ಈ ಮಾತಿಗೆ ತಕ್ಕಂತೆ ಕಟ್ಟಡ ನಿರ್ಮಾಣ ಕಾರ್ಮಿಕ ನೊಬ್ಬನ ಡ್ಯಾನ್ಸ್​ ನೋಡಿದರೆ ಎಂತವರೂ ಮನಸೋಲುವುದು ಖಂಡಿತ. ಕಟ್ಟಡ ನಿರ್ಮಾಣ ಸ್ಥಳದಲ್ಲೇ ಕೆಲಸಗಾರರ ಸಮ್ಮುಖದಲ್ಲಿ ಆತ ಡ್ಯಾನ್ಸ್​ ಪ್ರದರ್ಶನ ನೀಡುವುದನ್ನು ವಿಡಿಯೋದಲ್ಲಿ ನೋಡಬಹುದು.

ರೆಮೋ ಡಿಸೋಜಾ ಎಂಬ ಟ್ವಿಟ್ಟರ್​ ಬಳಕೆದಾರರು ವೀಡಿಯೊವನ್ನು ಹಂಚಿಕೊಂಡು “ದಯವಿಟ್ಟು, ಈ ವೀಡಿಯೊವನ್ನು ನೋಡಿ ಆನಂದಿಸಿ ಮತ್ತು ಪ್ರತಿಭೆ ಮತ್ತು ನೃತ್ಯ ಕೌಶಲ್ಯ ಗೌರವಿಸಿ” ಎಂದು ಬರೆದಿದ್ದಾರೆ. ಹಾಗೆಯೇ, ಹೃತಿಕ್​ ರೋಷನ್​, ಟೈಗರ್​ ಶ್ರಾಫ್, ಅಲ್ಲು ಅರ್ಜುನ್​, ಮಾಧುರಿ ದೀಕ್ಷಿತ್​, ಪ್ರಭುದೇವ ಸೇರಿ ದೇಶದ ಕೆಲವು ಅತ್ಯುತ್ತಮ ಡ್ಯಾನ್ಸರ್​ಗಳನ್ನು ಟ್ಯಾಗ್​ ಮಾಡಿದ್ದಾರೆ.

ವೀಡಿಯೊ ವೈರಲ್​ ಆಗಿದ್ದು, ಸಾಮಾಜಿಕ ಜಾಲತಾಣ ಬಳಕೆದಾರರು ಅವರ ಪ್ರತಿಭೆಗೆ ಸಂಪೂರ್ಣ ವಿಸ್ಮಿತರಾಗಿದ್ದಾರೆ. ಪ್ರಮುಖವಾಗಿ ನಟ ಶಾಹಿದ್​ ಕಪೂರ್​ ಕೂಡ ಕಟ್ಟಡ ಕಾರ್ಮಿಕನ ಡ್ಯಾನ್ಸ್​ನಿಂದ ಪ್ರಭಾವಿತರಾಗಿ ಟ್ವಿಟರ್​ನಲ್ಲಿ ಮೆಚ್ಚುಗೆಯ ಮಾತುಗಳನ್ನು ದಾಖಲಿಸಿದ್ದಾರೆ ಮತ್ತು ತಮ್ಮ ಅಭಿಮಾನಿಗಳೊಂದಿಗೆ ವೀಡಿಯೊವನ್ನು ಮರು ಹಂಚಿಕೊಂಡರು.

ಕಟ್ಟಡ ಕಾರ್ಮಿಕರೆಲ್ಲ ಸುತ್ತುವರಿದು ಪ್ರೋತ್ಸಾಹ ನೀಡುವುದು, ಕಟ್ಟಡ ಕೆಲಸಕ್ಕೆ ಬಳಸುವ ಪೈಪನ್ನೇ ಹಿಡಿದು ಮೈ ಬೆಂಡ್​ ಮಾಡುವುದು, ನೆಲದಿಂದ ಯಾವುದೇ ಸಹಾಯವಿಲ್ಲದೇ ಎದ್ದೇಳುವ ಸ್ಟೆಪ್​ ಎಂತವರನ್ನೂ ಮೈನವಿರೇಳಿಸುತ್ತಿದೆ.