ಸಿಗರೇಟ್​ ಮೂಲಕ ಬಾಯಿಯಿಂದಲೇ ಪಟಾಕಿ ಹೊಡೆಯುವವರನ್ನು ನೋಡಿದ್ದೀರಾ ? ಇಲ್ಲಿದೆ ನೋಡಿ ವೈರಲ್​ ವಿಡಿಯೋ

ಈಗ ಎಲ್ಲೆಲ್ಲೂ ದೀಪಾವಳಿಯ ಸಡಗರ. ಅದಕ್ಕಾಗಿಯೇ ಎಲ್ಲೆಡೆ ಪಟಾಕಿಯ ಸದ್ದು. ಆದರೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿರುವ ಈ ವಿಡಿಯೋದಲ್ಲಿ ಶೇರ್​ ಆಗಿರುವ ಪಟಾಕಿಯ ಸದ್ದು ಮಾತ್ರ ನೆಟ್ಟಿಗರನ್ನು ಕುತೂಹಲಕ್ಕೆ ತಳ್ಳಿದೆ.

ಐಎಫ್‌ಎಸ್ ಅಧಿಕಾರಿ ಸುಶಾಂತ್​ ನಂದಾ ಅವರು ಈ ವಿಡಿಯೋ ಶೇರ್​ ಮಾಡಿದ್ದಾರೆ. ಇದರಲ್ಲಿ ವ್ಯಕ್ತಿಯೊಬ್ಬ ಸಿಗರೇಟ್​ನಿಂದ ಪಟಾಕಿ ಪಟಪಟ ಎನ್ನಿಸುತ್ತಿರುವ ದೃಶ್ಯವನ್ನು ನೋಡಬಹುದಾಗಿದೆ. ಈತನನ್ನು ರಾಕೆಟ್​ ಮ್ಯಾನ್​ ಎಂದು ಅವರು ತಮಾಷೆ ಮಾಡಿದ್ದಾರೆ.

ಅಸಲಿಗೆ ಈ ವಿಡಿಯೋ ತೆಗೆದದ್ದು 2018ರಲ್ಲಿ. ಈ ವಿಡಿಯೋದಲ್ಲಿರುವ ವ್ಯಕ್ತಿ ಮೊಲ್ಲಾ ಸಂಜೀವ ರಾವ್. ಆಂಧ್ರಪ್ರದೇಶದ ವಿಶಾಖಪಟ್ಟಣಂನ ಹಳ್ಳಿಯವರು. ಆ ಸಮಯದಲ್ಲಿ ಸಣ್ಣ ಪಟಾಕಿ ಕಾರ್ಖಾನೆಯನ್ನು ನಡೆಸುತ್ತಿದ್ದ ಇವರು, ವೈಎಸ್ ಜಗನ್ ಮೋಹನ್ ರೆಡ್ಡಿ ಅವರ ಪ್ರಜಾ ಸಂಕಲ್ಪ ಯಾತ್ರೆಯ ವೇಳೆ ಅವರನ್ನು ಸ್ವಾಗತಿಸುವಾಗ ಸಿಗರೇಟ್​ ಮೂಲಕ ಪಟಾಕಿ ಹಾರಿಸಿದ್ದಾರೆ. ಅದರ ವಿಡಿಯೋ ಪುನಃ ಈಗ ವೈರಲ್​ ಆಗಿದೆ.

“ರಾವ್ ಅವರು ಕೇವಲ 20 ಸೆಕೆಂಡುಗಳ ಅವಧಿಯಲ್ಲಿ 11 ರಾಕೆಟ್‌ಗಳನ್ನು ಉಡಾವಣೆ ಮಾಡಿದರು. ನಾಸಾದ ಸಂಸ್ಥಾಪಕರು ಖಂಡಿತವಾಗಿಯೂ ಭಾರತದಿಂದ ಬಂದವರು” ಎಂದು ನಂದಾ ಹಾಸ್ಯಭರಿತವಾಗಿ ಶೀರ್ಷಿಕೆ ನೀಡಿದ್ದಾರೆ.