ಯುವಕನೊಬ್ಬ ಲಾಕಪ್ನಲ್ಲಿ ಅನುಮಾನಾಸ್ಪದ ರೀತಿಯಲ್ಲಿ ಸಾವನ್ನಪ್ಪಿದ ಘಟನೆಯು ಉತ್ತರ ಪ್ರದೇಶ ಕಾಸ್ಗಂಜ್ನ ಸದಾರ್ ಕೋತ್ವಾಲಿ ಎಂಬಲ್ಲಿ ಸಂಭವಿಸಿದೆ. ಬಾಲಕಿಯೊಂದಿಗೆ ಓಡಿ ಹೋದ ಆರೋಪದ ಅಡಿಯಲ್ಲಿ ಈತನನ್ನು ವಿಚಾರಣೆಗೆಂದು ವಶಕ್ಕೆ ಪಡೆದಿದ್ದರು. ಇದೀಗ ಆತ ಲಾಕಪ್ನಲ್ಲೇ ಸಾವನ್ನಪ್ಪಿದ್ದು ಪೊಲೀಸರು ಇದನ್ನು ಆತ್ಮಹತ್ಯೆ ಎಂದಿದ್ದಾರೆ. ಆದರೆ ಯುವಕನ ಕುಟುಂಬಸ್ಥರು ಇದನ್ನು ಕೊಲೆ ಎಂದು ಆರೋಪಿಸಿದ್ದಾರೆ.
ಮೃತ ಯುವಕನನ್ನು ಚಾಂದ್ ಮಿಯಾನ್ ಎಂದು ಗುರುತಿಸಲಾಗಿದೆ. ನಾಗ್ಲಾ ಸಯ್ಯದ್ ಅಹ್ರೋಲಿ ನಿವಾಸಿಯಾದ ಅಲ್ತಾಫ್ ಎಂಬವರ ಪುತ್ರ ಚಾಂದ್ ಲಾಕಪ್ನಲ್ಲಿ ಶವವಾಗಿ ಪತ್ತೆಯಾಗಿದ್ದಾನೆ. ಈ ವಿಚಾರವಾಗಿ ಮಾತನಾಡಿದ ಅಲ್ತಾಫ್, ಸೋಮವಾರ ಸಂಜೆ ನಾನು ನನ್ನ ಮಗನನ್ನು ಪೊಲೀಸರ ವಶಕ್ಕೆ ಒಪ್ಪಿಸಿದ್ದೆ. ಇದಾಗಿ 24 ಗಂಟೆ ಕಳೆಯುವುದರ ಒಳಗೆ ಆತ ನೇಣು ಬಿಗಿದುಕೊಂಡು ಸಾವನ್ನಪ್ಪಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ ಅಂತಾ ಹೇಳಿದ್ರು.
ಇನ್ನು ಈ ವಿಚಾರವಾಗಿ ಮಾತನಾಡಿದ ಪೊಲೀಸರು, ಚಾಂದ್ ನಮ್ಮ ಬಳಿ ತನಗೆ ಶೌಚಾಲಯ ಹೋಗಬೇಕಿದೆ ಎಂದು ಹೇಳಿದ್ದ. ಶೌಚಾಲಯದ ಒಳಕ್ಕೆ ಹೋದವನು ಕೆಲ ಸಮಯ ಕಳೆದರೂ ಹೊರ ಬಾರದ್ದನ್ನು ಕಂಡು ಪೊಲೀಸರೇ ಒಳಗೆ ಹೋಗಿ ನೋಡಿದ್ದಾರೆ. ಈ ವೇಳೆ ಆತ ಶೌಚಾಲಯದ ಪೈಪ್ಗೆ ನೇಣು ಹಾಕಿಕೊಂಡಿದ್ದ. ಚಾಂದ್ ತಾನು ಧರಿಸಿದ್ದ ಜಾಕೆಟ್ನ ಸಹಾಯದಿಂದಲೇ ನೇಣು ಬಿಗಿದುಕೊಂಡಿದ್ದಾನೆ. ನೆಲದಿಂದ 2 ಅಡಿ ಎತ್ತರವಿರುವ ಪೈಪ್ಗೆ ಆತ ಕೊರಳೊಡ್ಡಿದ್ದಾನೆ ಎಂದು ಹೇಳಿದ್ದಾರೆ.
ವಿಷಯ ತಿಳಿಯುತ್ತಿದ್ದಂತೆಯೇ ಎಸ್ಪಿ ರೋಷನ್ ಪ್ರಮೋದ್ ಬೋಟ್ರೆ ಐವರು ಪೊಲೀಸರನ್ನು ಸೇವೆಯಿಂದ ಅಮಾನತುಗೊಳಿಸಿದ್ದಾರೆ. ಯುವಕನನ್ನು ಕೂಡಲೇ ಆಸ್ಪತ್ರೆಗೆ ದಾಖಲಿಸಲಾಯ್ತಾದರೂ ಆತ ಅಷ್ಟರಲ್ಲಾಗಲೇ ಸಾವನ್ನಪ್ಪಿದ್ದ. ಇದರಲ್ಲಿ ಪೊಲೀಸರ ನಿರ್ಲಕ್ಷ್ಯ ಎದ್ದು ಕಾಣುತ್ತಿದೆ. ಹೀಗಾಗಿ ಇನ್ಸ್ಪೆಕ್ಟರ್ ಸೇರಿದಂತೆ ಐವರನ್ನು ಅಮಾನತು ಮಾಡಿರೋದಾಗಿ ಹೇಳಿದ್ರು.
Loading ...