ʼವೈಟ್​ಹೆಡ್​ʼ ಸಮಸ್ಯೆ ಹೋಗಲಾಡಿಸಲು ಉಪಯೋಗಿಸಿ ಈ ಮನೆ ಮದ್ದು….!

ಸುಂದರವಾದ ಹಾಗೂ ಕಾಂತಿಯುತ ತ್ವಚೆಯನ್ನು ಹೊಂದಬೇಕು ಎಂಬ ಕನಸು ಯಾವ ಮಹಿಳೆಗೆ ಇರೋದಿಲ್ಲ ಹೇಳಿ..? ಸುಂದರ ತ್ವಚೆಯನ್ನು ಹೊಂದಬೇಕು ಅಂತಾ ಮಹಿಳೆಯರು ಸಾಕಷ್ಟು ಬ್ಯೂಟಿ ಟಿಪ್ಸ್​ಗಳನ್ನು ಅನುಸರಿಸುತ್ತಾರೆ. ಇನ್ನು ಕೆಲವರು ಬ್ಯೂಟಿ ಪಾರ್ಲರ್ ಹಾಗೂ ಬ್ಯೂಟಿ ಪ್ರಾಡಕ್ಟ್​ಗಳ ಮೇಲೆ ಸಾವಿರಾರು ರೂಪಾಯಿಯನ್ನು ವ್ಯಯಿಸುತ್ತಾರೆ. ಆದರೆ ಅನೇಕ ಬಾರಿ ಇವುಗಳು ತ್ವಚೆಯ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುವ ಸಾಧ್ಯತೆ ಇರುತ್ತದೆ.

ಮಹಿಳೆಯರಲ್ಲಿ ಸಾಮಾನ್ಯವಾಗಿ ಬ್ಲಾಕ್​ಹೆಡ್ಸ್ ಇಲ್ಲವೇ ವೈಟ್​ಹೆಡ್ಸ್ ಸಮಸ್ಯೆ ಕಾಣಿಸಿಕೊಳ್ಳುತ್ತದೆ. ಅದರಲ್ಲೂ ವೈಟ್​ಹೆಡ್​ ಸಮಸ್ಯೆ 11 ರಿಂದ 25 ವರ್ಷ ಒಳಗಿನವರಲ್ಲಿ ಸರ್ವೇ ಸಾಮಾನ್ಯವಾಗಿ ಕಂಡುಬರುತ್ತದೆ. ಇದಕ್ಕಾಗಿ ನೀವು ಹೆಚ್ಚು ಚಿಂತಿಸಬೇಕಿಲ್ಲ. ಮನೆ ಮದ್ದನ್ನು ಬಳಸಿ ಈ ಸಮಸ್ಯೆಯನ್ನು ಬೇರು ಸಮೇತ ಕಿತ್ತು ಹಾಕಬಹುದಾಗಿದೆ.

ವೈಟ್​ಹೆಡ್​ ಕೂಡ ಒಂದು ರೀತಿಯಲ್ಲಿ ಮೊಡವೆ ಸಮಸ್ಯೆ ಇದ್ದಂತೆಯೇ. ಇದು ಸಾಮಾನ್ಯವಾಗಿ ಮೂಗು, ಗಲ್ಲ, ಹಣೆ ಹಾಗೂ ಕಿವಿಯ ಬಳಿ ಹೆಚ್ಚಾಗಿ ಕಾಣಿಸಿಕೊಳ್ಳತ್ತದೆ. ಸತ್ತ ಕೋಶಗಳು ಹಾಗೂ ಎಣ್ಣೆ ಚರ್ಮದಿಂದ ಈ ಸಮಸ್ಯೆ ಉಂಟಾಗುತ್ತದೆ. ತ್ವಚೆಗೆ ಉಸಿರಾಡಲು ಸಾಧ್ಯವಾಗದೇ ಇದ್ದಾಗ ಈ ಸಮಸ್ಯೆ ಕಾಣಿಸಿಕೊಳ್ಳುತ್ತದೆ.

ಟೊಮ್ಯಾಟೋ : ತ್ವಚೆಯ ಆರೋಗ್ಯಕ್ಕೆ ಟೊಮ್ಯಾಟೋ ಬಳಕೆ ತುಂಬಾನೇ ಒಳ್ಳೆಯದು. ಇದರಲ್ಲಿ ವಿಟಾಮಿನ್​ ಸಿ ಅಗಾಧ ಪ್ರಮಾಣದಲ್ಲಿ ಇರುತ್ತದೆ. ಟೋಮ್ಯಾಟೋವನ್ನು ಕತ್ತರಿಸಿ ಮುಖಕ್ಕೆ ತಿಕ್ಕಿ. ಇದಾದ ಮೇಲೆ 5 ನಿಮಿಷ ಬಿಟ್ಟು ಮುಖ ತೊಳೆದುಕೊಳ್ಳಿ.

ಮೊಸರು : ವೈಟ್​ಹೆಡ್​ ತೆಗೆಯುವಲ್ಲಿ ಮೊಸರು ಕೂಡ ಪ್ರಮುಖ ಪಾತ್ರ ವಹಿಸುತ್ತದೆ. 2 ಚಮಚ ಮೊಸರಿಗೆ 1 ಚಮಚ ಓಟ್​ಮೀಲ್ ​ಹಾಕಿ ಮಿಶ್ರಣ ಮಾಡಿ. ಈ ಫೇಸ್​ಪ್ಯಾಕ್​ನ್ನು ಹಚ್ಚಿಕೊಂಡು 10 ನಿಮಿಷ ಹಾಗೆ ಬಿಡಿ. ಬಳಿಕ ಸ್ವಲ್ಪ ಮಸಾಜ್​ ಮಾಡಿಕೊಂಡು ಮುಖ ತೊಳೆದುಕೊಳ್ಳಿ.

ಮುಲ್ತಾನಿ ಮಿಟ್ಟಿ : ವೈಟ್​ಹೆಡ್​ನಿಂದ ಪಾರಾಗಲು ನೀವು ಮುಲ್ತಾನಿ ಮಿಟ್ಟಿಯನ್ನೂ ಬಳಕೆ ಮಾಡಬಹುದು. ಬಾದಾಮಿಯನ್ನು ಪುಡಿ ಮಾಡಿ ಇದಕ್ಕೆ ಸ್ವಲ್ಪ ಗ್ಲಿಸರಿನ್​ ಹಾಗೂ 1 ಚಮಚ ಮುಲ್ತಾನಿ ಮಿಟ್ಟಿ ಸೇರಿಸಿ. ಇದರಿಂದ ಮುಖವನ್ನು ಸ್ಕ್ರಬ್​ ಮಾಡಿ ಬಳಿಕ ತೊಳೆದುಕೊಳ್ಳಿ.