ಟ್ವಿಟರ್ ʼಬ್ಲೂ ಟಿಕ್ʼ ಕುರಿತು ಬಳಕೆದಾರರಿಗೆ ಇಲ್ಲಿದೆ ಮಹತ್ವದ ಮಾಹಿತಿ

ಟ್ವಿಟರ್ ಬ್ಲೂ ಟಿಕ್ ಪಡೆಯಲು ಬಯಸಿದ್ದವರಿಗೆ ಹೊಸ ಅಪ್ ಡೇಟ್ ವೊಂದಿದೆ. ಟ್ವಿಟರ್ ಹೊಸ ಖಾತೆಗಳನ್ನು ಪ್ರಾರಂಭಿಸಿದಾಗ 90 ದಿನಗಳವರೆಗೆ ಬ್ಲೂ ಟಿಕ್ ಚಂದಾದಾರಿಕೆ ಸೇವೆಯನ್ನು ಖರೀದಿಸಲು ಸಾಧ್ಯವಿಲ್ಲ.

ಇದರರ್ಥ ಬಳಕೆದಾರರು ಹೊಸ ಖಾತೆಯನ್ನು ತಕ್ಷಣವೇ ಪರಿಶೀಲಿಸಲು ಸಾಧ್ಯವಾಗುವುದಿಲ್ಲ. ಇದು ವಂಚನೆಗಳು ಮತ್ತು ನಕಲಿ ಖಾತೆಗಳ ಸಾಧ್ಯತೆಗಳನ್ನು ಕಡಿಮೆ ಮಾಡುವ ಪ್ರಯತ್ನವಾಗಿರಬಹುದು.

ವರದಿಯ ಪ್ರಕಾರ ಹಳೆಯ ಯೋಜನೆಯು ಕಾಯುವ ಅವಧಿಯನ್ನು ನಿರ್ದಿಷ್ಟಪಡಿಸಿಲ್ಲ. ಆದರೆ ನವೆಂಬರ್ 9, 2022 ರಂದು ಅಥವಾ ನಂತರ ರಚಿಸಲಾದ Twitter ಖಾತೆಗಳು ಈ ಸಮಯದಲ್ಲಿ Twitter ಬ್ಲೂ ಟಿಕ್ ಗೆ ಚಂದಾದಾರರಾಗಲು ಸಾಧ್ಯವಾಗುವುದಿಲ್ಲ ಎಂದು ಹೇಳಿದೆ.

ಇತ್ತೀಚೆಗೆ ಟ್ವಿಟರ್ ಸಿಇಓ ಎಲೋನ್ ಮಸ್ಕ್ ಅವರು ಮೈಕ್ರೋ-ಬ್ಲಾಗಿಂಗ್ ಪ್ಲಾಟ್‌ಫಾರ್ಮ್ ಟ್ವಿಟರ್ ನ ಚಂದಾದಾರರಿಗೆ $8 ಚಂದಾದಾರಿಕೆ ಸೇವೆಯನ್ನು ನವೆಂಬರ್ 29 ರಿಂದ ಪರಿಶೀಲನೆಯೊಂದಿಗೆ ಮರುಪ್ರಾರಂಭಿಸಲಿದೆ ಎಂದು ಹೇಳಿದ್ದರು.

ಬ್ರ್ಯಾಂಡ್‌ಗಳು ಮತ್ತು ಸೆಲೆಬ್ರಿಟಿಗಳನ್ನು ಅನುಕರಿಸುವ ಹಲವಾರು ನಕಲಿ ಖಾತೆಗಳು ವೇದಿಕೆಯಲ್ಲಿ ಕಾಣಿಸಿಕೊಂಡ ನಂತರ ಮಸ್ಕ್ ಈ ಹಿಂದೆ ಬ್ಲೂ ಸೇವೆಯನ್ನು ಸ್ಥಗಿತಗೊಳಿಸಿದ್ದರು.