ರಸ್ತೆ ಮೇಲಿದ್ದ ಕಾರಿನ ಮೇಲೆ ಹುಡುಗರಿಗೆ ವ್ಯಾಮೋಹ: ಭಾವುಕರನ್ನಾಗಿಸುತ್ತೆ ಮಾಲೀಕ ಮಾಡಿದ ಕಾರ್ಯ

ಹಲವರಿಗೆ ತಾವು ಬಯಸಿರುವ ವಸ್ತುಗಳನ್ನು ಪಡೆದುಕೊಳ್ಳಲು ಸಾಧ್ಯವಾಗುವುದಿಲ್ಲ. ಅಂಥ ಸಂದರ್ಭಗಳಲ್ಲಿ ಯಾರ ಬಳಿಯಾದರೂ ಆ ವಸ್ತು ಇದ್ದರೆ ಅದನ್ನು ನೋಡುತ್ತಾ ಇರುವುದು ಹೊಸತೇನಲ್ಲ. ಆದರೆ ಹೀಗೆ ಬೇರೆಯವರ ವಸ್ತು ನೋಡುವಾಗ ಕಳ್ಳರಂತೆ ಮಾಲೀಕರಿಗೆ ಕಾಣಿಸುವುದೂ ಉಂಟು.

ಅಂಥದ್ದೇ ಒಂದು ವಿಡಿಯೋ, ಆದರೆ ಸ್ವಲ್ಪ ಡಿಫರೆಂಟ್​ ಆಗಿರುವ ಘಟನೆಯೊಂದು ಇದೀಗ ವೈರಲ್ ಆಗಿದ್ದು,​ ನೆಟ್ಟಿಗರು ಶ್ಲಾಘನೆಗಳ ಸುರಿಮಳೆಗೈಯುತ್ತಿದ್ದಾರೆ. ಈ ವಿಡಿಯೋವನ್ನು ಅನ್ಶು ಬಾತ್ರಾ ಎಂಬ ಬಳಕೆದಾರರು ಇನ್​ಸ್ಟಾಗ್ರಾಮ್​ನಲ್ಲಿ ಶೇರ್​ ಮಾಡಿಕೊಂಡಿದ್ದಾರೆ.

ಈ ವಿಡಿಯೋದಲ್ಲಿ ಇಬ್ಬರು ಹುಡುಗರು ದೂರದಿಂದ ರಸ್ತೆಯಲ್ಲಿ ನಿಂತಿದ್ದ ಕಾರನ್ನು ನೋಡುತ್ತಾ ನಿಂತಿರುವುದನ್ನು ನೋಡಬಹುದು. ಇಬ್ಬರೂ ಆ ಕಾರನ್ನು ನೋಡುತ್ತಿರುವಾಗ ಸಿಸಿಟಿವಿಯಲ್ಲಿ ಅದನ್ನು ಮಾಲೀಕರು ನೋಡಿಬಿಡುತ್ತಾರೆ. ಬೇರೆಯವರಾಗಿದ್ದರೆ ಬಹುಶಃ ಇವರು ಕಳ್ಳರು ಇರಬಹುದು ಎಂದುಕೊಳ್ಳುತ್ತಿದ್ದರೇನೋ.

ಆದರೆ ಅದರ ಮಾಲೀಕ ಹತ್ತಿರ ಬಂದು ವಿಷಯವೇನು ಎಂದು ಕೇಳುತ್ತಾನೆ. ಆಗ ಯುವಕರು ತಾವು ದಿನವೂ ಈ ರಸ್ತೆಯಲ್ಲಿ ಹೋಗುತ್ತಿದ್ದು, ನಮ್ಮ ಅಚ್ಚುಮೆಚ್ಚಿನ ಕಾರನ್ನು ನೋಡಿಕೊಂಡು ಹೋಗುತ್ತಿದ್ದೇವೆ. ಇದರ ಜೊತೆ ನಿಂತು ವಿಡಿಯೋ ಮಾಡಲು ಬಯಸುತ್ತಿದ್ದೇವೆ, ಆದರೆ ಹೆದರಿ ಸುಮ್ಮನಾಗುತ್ತಿದ್ದೇವೆ ಎನ್ನುತ್ತಾರೆ. ಆಗ ಕಾರಿನ ಮಾಲೀಕನಿಗೆ ಯುವಕರನ್ನು ನೋಡಿ ಅಯ್ಯೋ ಎನಿಸುತ್ತದೆ.

ಕೂಡಲೇ ಆತ, ಕಾರಿನ ಕೀಲಿಯನ್ನು ಕೊಟ್ಟು ಇದರ ಡೋರ್​ ತೆರೆದು ವಿಡಿಯೋ ಮಾಡಿಕೊಳ್ಳಿ ಎನ್ನುತ್ತಾನೆ. ಇಷ್ಟು ವಿಡಿಯೋ ಶೇರ್​ ಆಗಿದ್ದು, ಮಾಲೀಕನ ಕಾರ್ಯಕ್ಕೆ ಮೆಚ್ಚುಗೆಗಳ ಸುರಿಮಳೆಯಾಗಿದೆ.