3 ತಿಂಗಳ ನಂತರ ಜೈಲಿನಿಂದ ಬಿಡುಗಡೆಯಾದ ಸಂಜಯ್ ರಾವುತ್

ಶಿವಸೇನಾ(ಉದ್ಧವ್ ಠಾಕ್ರೆ ಬಣ) ಮುಖಂಡ ಸಂಜಯ್ ರಾವುತ್ ಅವರು ಪತ್ರಾ ಚಾಲ್ ಭೂ ಹಗರಣ ಪ್ರಕರಣದಲ್ಲಿ ಬಂಧನಕ್ಕೊಳಗಾದ ಮೂರು ತಿಂಗಳ ನಂತರ ಮುಂಬೈನ ಪಿಎಂಎಲ್‌ಎ ನ್ಯಾಯಾಲಯ ಬುಧವಾರ ಜಾಮೀನು ಮಂಜೂರು ಮಾಡಿದೆ.

ಮುಂಬೈನ ಉಪನಗರ ಗೋರೆಗಾಂವ್‌ನಲ್ಲಿರುವ ಪತ್ರಾ ಚಾಲ್‌ನ ಪುನರಾಭಿವೃದ್ಧಿಗೆ ಮಂಜೂರು ಮಾಡಿದ ಹಣದಲ್ಲಿ ಅಕ್ರಮಗಳ ಆರೋಪದ ಮೇಲೆ ಆಗಸ್ಟ್‌ ನಲ್ಲಿ ಜಾರಿ ನಿರ್ದೇಶನಾಲಯವು ಅವರನ್ನು ಬಂಧಿಸಿತ್ತು.

ಈ ಪ್ರಕರಣದ ಎರಡನೇ ಆರೋಪಿ ಸಂಜಯ್ ರಾವತ್ ಜೊತೆಗೆ ಪ್ರವೀಣ್ ರಾವುತ್ ಕೂಡ ಪಿಎಂಎಲ್‌ಎ ನ್ಯಾಯಾಲಯದಿಂದ ಜಾಮೀನು ಪಡೆದಿದ್ದಾರೆ. ಸುಮಾರು 102 ದಿನಗಳ ನಂತರ ಸಂಜಯ್ ರಾವತ್ ಇಂದು ಜಾಮೀನು ಪಡೆದಿದ್ದಾರೆ. ನ್ಯಾಯಾಲಯವು ಆದೇಶವನ್ನು ಪ್ರಕಟಿಸಿದಾಗ, ಶಿವಸೇನೆ ಸಂಸದರ ಕುಟುಂಬ ಸದಸ್ಯರು ಮತ್ತು ಬೆಂಬಲಿಗರು ನ್ಯಾಯಾಲಯದ ಕೊಠಡಿ ಮತ್ತು ಕಾರಿಡಾರ್‌ನಲ್ಲಿ ಚಪ್ಪಾಳೆ ತಟ್ಟಿದರು.

ಏತನ್ಮಧ್ಯೆ, ಹೆಚ್ಚುವರಿ ಸಾಲಿಸಿಟರ್ ಜನರಲ್ ಜಾಮೀನು ಆದೇಶವನ್ನು ಅಲ್ಪಾವಧಿಗೆ ಜಾರಿಗೊಳಿಸಲು ತಡೆಯಾಜ್ಞೆ ಕೋರಿದ್ದಾರೆ, ಇದರಿಂದಾಗಿ ಇಡಿ ಮುಂಬೈನ ಪಿಎಂಎಲ್‌ಎ ನ್ಯಾಯಾಲಯದ ಆದೇಶದ ವಿರುದ್ಧ ಉನ್ನತ ನ್ಯಾಯಾಲಯದಲ್ಲಿ ಮೇಲ್ಮನವಿ ಸಲ್ಲಿಸಬಹುದು.

ಮುಂಬೈನ ಗೋರೆಗಾಂವ್‌ನಲ್ಲಿರುವ ಪತ್ರಾ ಚಾಲ್‌ನ ಮರುಅಭಿವೃದ್ಧಿ ಪ್ರಕರಣದಲ್ಲಿ ಅಕ್ರಮವಾಗಿ ಗಳಿಸಿದ ಮಧ್ಯವರ್ತಿ ಪ್ರವೀಣ್ ರಾವುತ್‌ನಿಂದ ಹಣದ ಒಂದು ಭಾಗವನ್ನು ಶಿವಸೇನಾ ನಾಯಕ ಸ್ವೀಕರಿಸಿದ ಆರೋಪವಿದೆ. ಆ ಹಣದಲ್ಲಿ ಸಂಜಯ್ ರಾವತ್ ದಾದರ್ ಮತ್ತು ಅಲಿಬಾಗ್‌ನಲ್ಲಿ ಆಸ್ತಿಗಳನ್ನು ಖರೀದಿಸಿದ್ದಾರೆ ಎಂದು ಆರೋಪಿಸಲಾಗಿದೆ.

ಸಂಜಯ್ ರಾವತ್ ಅವರು ಆಗಸ್ಟ್ 1 ರಿಂದ ನಿರಂತರವಾಗಿ ಮುಂಬೈನ ಆರ್ಥರ್ ರೋಡ್ ಜೈಲಿನಲ್ಲಿದ್ದರು. ಮಾಜಿ ಗೃಹ ಸಚಿವ ಅನಿಲ್ ದೇಶಮುಖ್ ಮತ್ತು ಮಾಜಿ ಸಚಿವ ನವಾಬ್ ಮಲಿಕ್ ಕೂಡ ಈ ಜೈಲಿನಲ್ಲಿದ್ದಾರೆ.