ಸುರಕ್ಷಿತ ಹಾಗೂ ಆರೋಗ್ಯಕರ ಲೈಂಗಿಕ ಬದುಕಿಗೆ ಸಪ್ತ ಸೂತ್ರಗಳು….!

ದೈಹಿಕ ಆರೋಗ್ಯ ಹಾಗೂ ಮನಸ್ಸಿನ ಸಂತೋಷಕ್ಕೆ ಲೈಂಗಿಕ ಆರೋಗ್ಯ ಕೂಡ ಅತ್ಯಂತ ಅಗತ್ಯ. ಲೈಂಗಿಕವಾಗಿ ಹರಡುವ ಸೋಂಕುಗಳಿಂದ ದೂರವಿರಬೇಕು. ಸುರಕ್ಷಿತ ಲೈಂಗಿಕ ಜೀವನ ನಡೆಸಲು ನೀವು ಅಳವಡಿಸಿಕೊಳ್ಳಬೇಕಾದ ಅಭ್ಯಾಸಗಳು ಯಾವುವು ಅನ್ನೋದನ್ನು ನೋಡೋಣ.

ಲೈಂಗಿಕವಾಗಿ ಹರಡುವ ರೋಗಗಳು ಮತ್ತು ಸೋಂಕುಗಳು, ಪರಸ್ಪರ ಸಂಪರ್ಕದ ಮೂಲಕ ಒಬ್ಬ ವ್ಯಕ್ತಿಯಿಂದ ಇನ್ನೊಬ್ಬರಿಗೆ ಬರುತ್ತವೆ. ಸಾಮಾನ್ಯವಾಗಿ ಯೋನಿಯಿಂದ, ಮೌಖಿಕವಾಗಿ ಅಥವಾ ಗುದ ಸಂಭೋಗದ ಮೂಲಕ ಹರಡಬಹುದು. ಕೆಲವೊಮ್ಮೆ ನಿಕಟ ದೈಹಿಕ ಸಂಪರ್ಕದ ಮೂಲಕ ಹರಡುವ ಸೋಂಕು, ಮಹಿಳೆಯರಲ್ಲಿ ಬಂಜೆತನವನ್ನು ಉಂಟುಮಾಡಬಹುದು.

ಇದನ್ನು ತಡೆಯಲು ದಿನಕ್ಕೆ ಎರಡು ಬಾರಿ ಸ್ನಾನ ಮಾಡಿ. ಉಗುರು ಬೆಚ್ಚಗಿನ ನೀರನ್ನು ಬಳಸಿ ಜನನಾಂಗವನ್ನು ಸ್ವಚ್ಛಗೊಳಿಸಬಹುದು. ಗುದ ಪ್ರದೇಶವನ್ನು ಸಹ ಸ್ವಚ್ಛವಾಗಿಟ್ಟುಕೊಳ್ಳುವುದರಿಂದ ಹಾನಿಕಾರಕ ಬ್ಯಾಕ್ಟೀರಿಯಾಗಳನ್ನು ಹೊಡೆದೋಡಿಸಬಹುದು. ಆದರೆ ಸ್ಕ್ರಬ್ಬಿಂಗ್‌ ಮಾಡಬೇಡಿ. ಏಕೆಂದರೆ  ಅದು ಸೂಕ್ಷ್ಮ ಚರ್ಮವನ್ನು ಹಾನಿಗೊಳಿಸುತ್ತದೆ.

ಸೋಪ್ ಅನ್ನು ಬಾಹ್ಯವಾಗಿ ಬಳಸಬಹುದು, ಯೋನಿಯೊಳಗೆ ಅಲ್ಲ. ಯೋನಿಯು ಆಮ್ಲೀಯ pH ಅನ್ನು ಹೊಂದಿರುವುದರಿಂದ ಸಾಬೂನು ಅದನ್ನು ನಾಶಪಡಿಸುತ್ತದೆ. ಪ್ರಿ ಪ್ಯಾಕೇಜ್ಡ್‌ ಪರಿಮಳಯುಕ್ತ ಉತ್ಪನ್ನಗಳನ್ನು ಬಳಸಿ ಜನನಾಂಗಗಳನ್ನು ಸ್ವಚ್ಛ ಮಾಡಿದರೆ ಉರಿಯೂತ, ಕಿರಿಕಿರಿ ಮತ್ತು ಸುಡುವಿಕೆ ಉಂಟಾಗಬಹುದು.

ಹತ್ತಿಯ ಒಳ ಉಡುಪನ್ನು ಬಳಸಿ, ಅದು ಸಡಿಲವಾಗಿರಬೇಕು. ಖಾಸಗಿ ಅಂಗಕ್ಕೆ ಸ್ವಲ್ಪ ಗಾಳಿಯಾಡುವಂತಿರಲಿ. ಹತ್ತಿ ತೇವಾಂಶವನ್ನು ಸಹ ಹೀರಿಕೊಳ್ಳುತ್ತದೆ. ಮೂತ್ರ ವಿಸರ್ಜನೆಯ ಪ್ರತಿ ಕ್ರಿಯೆಯ ನಂತರ ನಿಮ್ಮ ಖಾಸಗಿ ಪ್ರದೇಶವನ್ನು ತೊಳೆಯುವ ಬದಲು ನಿಧಾನವಾಗಿ ಒರೆಸಿಕೊಳ್ಳಿ. ಒದ್ದೆಯಾದ ಒಳ ಉಡುಪುಗಳನ್ನು ಧರಿಸಿದರೆ ಶಿಲೀಂಧ್ರ ಸೋಂಕು ಉಂಟಾಗಬಹುದು.

ಸಂಭೋಗದ ಮೊದಲು ಸ್ನಾನ ಮಾಡಿ. ಲೈಂಗಿಕ ಅಭ್ಯಾಸಗಳಲ್ಲಿ ತೊಡಗಿಸಿಕೊಳ್ಳುವ ಮೊದಲು, ಜನನಾಂಗದ ಪ್ರದೇಶಗಳನ್ನು ತೊಳೆಯುವುದು ಸೂಕ್ತ. ನಿಮ್ಮ ಕೈ ಮತ್ತು ಮುಖವನ್ನು ಸಾಬೂನು ಮತ್ತು ನೀರಿನಿಂದ ತೊಳೆಯಿರಿ. ಲೈಂಗಿಕ ಚಟುವಟಿಕೆಗಳಲ್ಲಿ ತೊಡಗಿರುವಾಗ ಪುರುಷ ಕಾಂಡೋಮ್‌ಗಳು, ಸ್ತ್ರೀ ಕಾಂಡೋಮ್‌ಗಳು, ಗರ್ಭನಿರೋಧಕಗಳನ್ನು ಬಳಸಿ. ಇದು ಸಿಫಿಲಿಸ್, ಗೊನೊರಿಯಾ, ಕ್ಲಮೈಡಿಯ, ಹೆಪಟೈಟಿಸ್ ಬಿ ಮತ್ತು ಎಚ್ಐವಿ-ಏಡ್ಸ್ ಮುಂತಾದ ಲೈಂಗಿಕವಾಗಿ ಹರಡುವ ಸೋಂಕುಗಳನ್ನು ತಡೆಯಬಹುದು.

ಸೆಕ್ಸ್ ಆಟಿಕೆಗಳನ್ನು ಸ್ವಚ್ಛಗೊಳಿಸಿ. ಪ್ರತಿ ಬಳಕೆಯ ಮೊದಲು ಮತ್ತು ನಂತರ ಸ್ವಚ್ಛಗೊಳಿಸಬೇಕು. ಸುರಕ್ಷಿತ ಲೈಂಗಿಕ ಕ್ರಿಯೆಗಾಗಿ ಗರ್ಭನಿರೋಧಕಗಳಾದ ಕಾಂಡೋಮ್, ಜನನ ನಿಯಂತ್ರಣ ಮಾತ್ರೆಗಳು, ಮೌಖಿಕ ಗರ್ಭನಿರೋಧಕ ಮಾತ್ರೆಗಳು, ತುರ್ತು ಗರ್ಭನಿರೋಧಕ ಮಾತ್ರೆಗಳು, ಗರ್ಭಾಶಯದ ಒಳಗಿನ ಗರ್ಭನಿರೋಧಕ ಸಾಧನಗಳು, ಕಾಪರ್ T ಮತ್ತು ಚುಚ್ಚುಮದ್ದಿನ ಗರ್ಭನಿರೋಧಕಗಳನ್ನು ಬಳಸಬಹುದು. ಯಾವ ವಿಧಾನವು ನಿಮಗೆ ಹೆಚ್ಚು ಸೂಕ್ತವಾಗಿದೆ ಎಂಬುದನ್ನು ಕಂಡುಹಿಡಿಯಲು ನಿಮ್ಮ ಸ್ತ್ರೀರೋಗ ತಜ್ಞರನ್ನು ಸಂಪರ್ಕಿಸಿ.

ಸುರಕ್ಷಿತ ಲೈಂಗಿಕ ಅಭ್ಯಾಸಗಳಲ್ಲಿ ತೊಡಗಿಸಿಕೊಳ್ಳಿ. ಆಲ್ಕೋಹಾಲ್ ಮತ್ತು ಮಾದಕ ದ್ರವ್ಯಗಳನ್ನು ಸೇವಿಸಿ ಸೆಕ್ಸ್‌ ನಲ್ಲಿ ತೊಡಗಬೇಡಿ. ಬಹು ಲೈಂಗಿಕ ಪಾಲುದಾರರನ್ನು ಹೊಂದಿರದಿರುವುದು ಒಳ್ಳೆಯದು. ಸಂತಾನೋತ್ಪತ್ತಿ ವ್ಯವಸ್ಥೆಯು ಸಂಪೂರ್ಣವಾಗಿ ಅಭಿವೃದ್ಧಿ ಹೊಂದುವವರೆಗೆ ಸೆಕ್ಸ್‌ ನಿಂದ ದೂರವಿರುವುದು ಒಳ್ಳೆಯದು. ಆರೋಗ್ಯಕರ ಜೀವನ ಶೈಲಿಯನ್ನು ಅಳವಡಿಸಿಕೊಳ್ಳಿ, ಹಣ್ಣು ಮತ್ತು ತರಕಾರಿಗಳನ್ನು ಸೇವಿಸಿ. ನಿಯಮಿತವಾಗಿ ವ್ಯಾಯಾಮ ಮಾಡಿ. ಅತಿಯಾದ ಮದ್ಯ ಮತ್ತು ಧೂಮಪಾನವನ್ನು ತಪ್ಪಿಸಿ.