ದಾವಣಗೆರೆ: ದಾವಣಗೆರೆ ಜಿಲ್ಲೆ ನ್ಯಾಮತಿಯ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ(ಎಸ್.ಬಿ.ಐ.) ಶಾಖೆಯಲ್ಲಿ ಕಳ್ಳರು ಕಿಟಕಿ ಮೂಲಕ ಕನ್ನ ಹಾಕಿ ಬರೋಬ್ಬರಿ 12.95 ಕೋಟಿ ರೂಪಾಯಿ ಮೌಲ್ಯದ 17 ಕೆಜಿ ಚಿನ್ನಾಭರಣ ದೋಚಿದ್ದಾರೆ. ಭಾನುವಾರ ರಾತ್ರಿ ನಡೆದ ಘಟನೆ ಸೋಮವಾರ ಬೆಳಕಿಗೆ ಬಂದಿದೆ.
ಕಳ್ಳರು ಪತ್ತೆಗೆ ಪೊಲೀಸರು 5 ತಂಡ ರಚಿಸಿದ್ದಾರೆ. ಶನಿವಾರ ಮತ್ತು ಭಾನುವಾರ ಬ್ಯಾಂಕಿಗೆ ರಜೆ ಇದ್ದ ಕಾರಣ ದರೋಡೆ ನಡೆಸಲಾಗಿದೆ. ಕಳ್ಳರು ಅಕ್ಕಪಕ್ಕದಲ್ಲಿ ಮನೆಗಳು ಇಲ್ಲದ ಬ್ಯಾಂಕ್ ಶಾಖೆಯನ್ನು ಆಯ್ಕೆ ಮಾಡಿಕೊಂಡಿದ್ದಾರೆ.
ಬ್ಯಾಂಕ್ ನಲ್ಲಿದ್ದ ಮೂರು ಲಾಕರ್ ಗಳ ಪೈಕಿ ಒಂದು ಲಾಕರ್ ಮಾತ್ರ ತೆರೆಯಲು ಸಾಧ್ಯವಾಗಿದ್ದು, ಅದರಲ್ಲಿದ್ದ 12.95 ಕೋಟಿ ರೂಪಾಯಿ ಮೌಲ್ಯದ 17.25 ಕೆಜಿ ಚಿನ್ನಾಭರಣ, 30 ಲಕ್ಷ ರೂಪಾಯಿ ನಗದು ದೋಚಲಾಗಿದೆ. ಬ್ಯಾಂಕಿನ ಇನ್ನೆರಡು ಲಾಕರ್ ಗಳ ಬೀಗ ಮುರಿಯುವ ಪ್ರಯತ್ನ ಮಾಡಿದ್ದಾರೆ. ಕಳ್ಳರು ಬ್ಯಾಂಕಿನ ಸೈರನ್ ಕಿತ್ತು ಹಾಕಿದ್ದಾರೆ. ಸಿಸಿಟಿವಿ ಕ್ಯಾಮರಾದ ಡಿವಿಆರ್ ತೆಗೆದುಕೊಂಡು ಹೋಗಿದ್ದಾರೆ ಎಂದು ಬ್ಯಾಂಕಿನ ವ್ಯವಸ್ಥಾಪಕ ಸುನಿಲ್ ಕುಮಾರ್ ಯಾದವ್ ದೂರು ನೀಡಿದ್ದಾರೆ.
Loading ...