ಭಾರತದೊಂದಿಗೆ ನಂಟು, ಜಾಗತಿಕ ಸಾಧನೆ: ನೇಪಾಳದ ಬಿನೋದ್ ಚೌಧರಿ ಯಶಸ್ಸಿನ ಮಂತ್ರ !

ವಿಶ್ವದ ಶ್ರೀಮಂತ ವ್ಯಕ್ತಿಗಳ ಪಟ್ಟಿಯಲ್ಲಿ ಭಾರತದ ಮುಖೇಶ್ ಅಂಬಾನಿ, ಗೌತಮ್ ಅದಾನಿ, ಎಲೋನ್ ಮಸ್ಕ್, ಮಾರ್ಕ್ ಜುಕರ್‌ಬರ್ಗ್ ಅವರಂತಹ ಅನೇಕ ಉದ್ಯಮಿಗಳ ಹೆಸರುಗಳು ಕಾಣಿಸಿಕೊಳ್ಳುತ್ತವೆ. ಆದರೆ, ನೇಪಾಳದ ಉದ್ಯಮಿ ಬಿನೋದ್ ಚೌಧರಿ ಅವರು ತಮ್ಮ ವಿಶಿಷ್ಟ ಸಾಧನೆಗಳಿಂದ ಗಮನ ಸೆಳೆದಿದ್ದಾರೆ. ನೇಪಾಳದ ಏಕೈಕ ಶತಕೋಟ್ಯಾಧಿಪತಿಯಾಗಿರುವ ಬಿನೋದ್ ಚೌಧರಿ, ‘ವೈ ವೈ’ ನೂಡಲ್ಸ್ ಮೂಲಕ ಮನೆ ಮಾತಾಗಿದ್ದಾರೆ.

ಬಿನೋದ್ ಚೌಧರಿ ಅವರ ‘ವೈ ವೈ’ ನೂಡಲ್ಸ್ ಬ್ರ್ಯಾಂಡ್ ಭಾರತ ಸೇರಿದಂತೆ ಅನೇಕ ದೇಶಗಳಲ್ಲಿ ಜನಪ್ರಿಯವಾಗಿದೆ. ಫೋರ್ಬ್ಸ್ ಪ್ರಕಾರ, ಅವರ ಒಟ್ಟು ಆಸ್ತಿ ಮೌಲ್ಯ 1.8 ಬಿಲಿಯನ್ ಡಾಲರ್ (ಸುಮಾರು 15 ಸಾವಿರ ಕೋಟಿ ರೂ.). ಫೋರ್ಬ್ಸ್‌ನ ಶ್ರೀಮಂತ ವ್ಯಕ್ತಿಗಳ ಪಟ್ಟಿಯಲ್ಲಿ ಅವರು 1794 ನೇ ಸ್ಥಾನದಲ್ಲಿದ್ದಾರೆ. 2026 ರ ವೇಳೆಗೆ ತಮ್ಮ ಭಾರತೀಯ ಆಹಾರ ಘಟಕವನ್ನು ಪಟ್ಟಿ ಮಾಡುವ ಯೋಜನೆ ಹೊಂದಿದ್ದಾರೆ.

ಬಿನೋದ್ ಚೌಧರಿ, ಕಾಠ್ಮಂಡುವಿನ ಮಾರ್ವಾಡಿ ಕುಟುಂಬದಲ್ಲಿ ಜನಿಸಿದರು. ಅವರ ಕುಟುಂಬದ ಬೇರುಗಳು ಭಾರತದಲ್ಲಿವೆ. ಅವರ ತಾತ ಭಾರತದಲ್ಲಿ ವಾಸಿಸುತ್ತಿದ್ದರು. ನಂತರ ನೇಪಾಳಕ್ಕೆ ತೆರಳಿ ಬಟ್ಟೆ ವ್ಯಾಪಾರ ಆರಂಭಿಸಿದ್ದು, ಬಿನೋದ್ ಚೌಧರಿ ಅವರು ತಮ್ಮ ಕುಟುಂಬದ ವ್ಯವಹಾರವನ್ನು ವಿಸ್ತರಿಸಿದರು.

ಥೈಲ್ಯಾಂಡ್ ಪ್ರವಾಸದಲ್ಲಿದ್ದಾಗ, ಬಿನೋದ್ ಚೌಧರಿ ಅವರಿಗೆ ನೂಡಲ್ಸ್ ವ್ಯವಹಾರದ ಕಲ್ಪನೆ ಬಂತು. ನೇಪಾಳಕ್ಕೆ ಹಿಂದಿರುಗಿದ ನಂತರ, ಅವರು ‘ವೈ ವೈ’ ಬ್ರ್ಯಾಂಡ್‌ನ ನೂಡಲ್ಸ್ ಉತ್ಪಾದನೆ ಆರಂಭಿಸಿದರು.

ಬಿನೋದ್ ಚೌಧರಿ ಅವರ ಉದ್ಯಮ ನೂಡಲ್ಸ್‌ಗೆ ಸೀಮಿತವಾಗಿಲ್ಲ. 1990 ರಲ್ಲಿ, ಅವರು ಸಿಂಗಾಪುರದಲ್ಲಿ ಸಿನೋವೇಷನ್ ಗ್ರೂಪ್ ಸ್ಥಾಪಿಸಿದರು. 1995 ರಲ್ಲಿ, ನೇಪಾಳದ ನಬಿಲ್ ಬ್ಯಾಂಕ್‌ನಲ್ಲಿ ದುಬೈ ಸರ್ಕಾರದ ನಿಯಂತ್ರಣ ಪಾಲನ್ನು ಖರೀದಿಸಿದರು. ಬಿನೋದ್ ಚೌಧರಿ ಅವರು ಅಮಿತಾಭ್ ಬಚ್ಚನ್ ಮತ್ತು ಜೆ.ಆರ್.ಡಿ ಟಾಟಾ ಅವರ ಅಭಿಮಾನಿ. ಬಿನೋದ್ ಚೌಧರಿ ಅವರ ಯಶೋಗಾಥೆ ಅನೇಕ ಯುವ ಉದ್ಯಮಿಗಳಿಗೆ ಸ್ಫೂರ್ತಿಯಾಗಿದೆ.