ನೀವು ಬಯಸಿದ ಸಮಯದಲ್ಲಿ ಸಿಗಲಿದೆ ಸಿಲಿಂಡರ್: ಪಾವತಿಸಬೇಕು ಇಷ್ಟು ಶುಲ್ಕ

ಎಲ್ಪಿಜಿ ಸಿಲಿಂಡರ್ ಬುಕ್ ಮಾಡುವುದು ಈಗ ಮತ್ತಷ್ಟು ಸುಲಭವಾಗಿದೆ. ಮೊದಲು ಬುಕ್ ಮಾಡುವುದಕ್ಕೆ ಹೆಚ್ಚಿನ ಸಮಯ ಬೇಕಿತ್ತು. ಹಾಗೆ ಬುಕ್ಕಿಂಗ್ ಆದ ಒಂದು ವಾರಗಳ ನಂತ್ರ ಸಿಲಿಂಡರ್ ಮನೆಗೆ ಬರ್ತಿತ್ತು. ಆದ್ರೆ ಈಗ, ಬುಕ್ಕಿಂಗ್ ಮಾಡಿದ ಕೆಲವೇ ಗಂಟೆಗಳಲ್ಲಿ ಮನೆ ಬಾಗಿಲಿಗೆ ಸಿಲಿಂಡರ್ ಬರುತ್ತದೆ. ಆದ್ರೆ ಅದಕ್ಕೆ ವಿಶೇಷ ಶುಲ್ಕ ಪಾವತಿ ಮಾಡಬೇಕಾಗುತ್ತದೆ.

ಇಂಡೇನ್ ತನ್ನ ಗ್ರಾಹಕರಿಗೆ ಈ ವಿಶೇಷ ಸೌಲಭ್ಯ ನೀಡ್ತಿದೆ. ಗ್ರಾಹಕರು ಬಯಸಿದ ಸಮಯದಲ್ಲಿ ಸಿಲಿಂಡರ್ ಮನೆಗೆ ಬರುತ್ತದೆ. ಈ ಯೋಜನೆಯಡಿ ನೀವು ಸಿಲಿಂಡರ್ ಬುಕ್ ಮಾಡುವವರಾಗಿದ್ದರೆ ಬುಕಿಂಗ್ ಸಮಯದಲ್ಲಿ ದಿನ ಮತ್ತು ಸಮಯ ಎರಡನ್ನೂ ಆಯ್ಕೆ ಮಾಡಿಕೊಳ್ಳಬೇಕು.

ಸೋಮವಾರದಿಂದ ಶುಕ್ರವಾರದವರೆಗೆ ಯಾವುದೇ ಸಮಯದಲ್ಲಿ ಸಿಲಿಂಡರ್ ಬುಕ್ ಮಾಡಬಹುದು. ನೀವು ಹೇಳಿದ ಸಮಯಕ್ಕೆ ಸಿಲಿಂಡರ್ ಬರುತ್ತದೆ. ನೀವು ದಿನ ಹೇಳಿದ್ದು, ಸಮಯ ಹೇಳದೆ ಹೋದಲ್ಲಿ ಆ ದಿನ, ಯಾವ ಸಮಯದಲ್ಲಿಯಾದ್ರೂ ಸಿಲಿಂಡರ್ ಬರಬಹುದು. ನೀವು ಸಮಯ ನಗದಿ ಮಾಡಿದ್ದು, ದಿನ ಹೇಳಿಲ್ಲವೆಂದ್ರೆ ಸೋಮವಾರದಿಂದ ಶುಕ್ರವಾರದಲ್ಲಿ ಯಾವುದೇ ಒಂದು ದಿನ, ನೀವು ನಿಗದಿಪಡಿಸಿದ ಸಮಯದಲ್ಲಿ ಸಿಲಿಂಡರ್ ಬರುತ್ತದೆ. ಶನಿವಾರ ಮತ್ತು ಭಾನುವಾರ ಬೆಳಿಗ್ಗೆ 8ರಿಂದ ಸಂಜೆ 6ರವರೆಗೆ ಸೇವೆ ಪಡೆಯಬಹುದು.

ವಾರದ ದಿನಗಳಲ್ಲಿ ಬೆಳಿಗ್ಗೆ 8 ರಿಂದ ಸಂಜೆ 6 ರವರೆಗೆ ವಿತರಣೆಯನ್ನು ತೆಗೆದುಕೊಳ್ಳಲು ಬಯಸಿದರೆ, 25 ರೂಪಾಯಿಗಳನ್ನು ಪಾವತಿಸಬೇಕಾಗುತ್ತದೆ.

ವಾರದ ದಿನಗಳಲ್ಲಿ ಸಂಜೆ 6 ರಿಂದ ರಾತ್ರಿ 8 ರ ನಡುವೆ ಡಿಲೆವರಿ ಬಯಸಿದ್ರೆ, 50 ರೂಪಾಯಿಗಳನ್ನು ಪಾವತಿಸಬೇಕಾಗುತ್ತದೆ. ವಾರಾಂತ್ಯದಲ್ಲಿ ಬೆಳಿಗ್ಗೆ 8 ರಿಂದ ಸಂಜೆ 6 ರವರೆಗೆ ಡಿಲೆವರಿ ಬಯಸಿದರೆ, 25 ರೂಪಾಯಿಗಳನ್ನು ಪಾವತಿಸಬೇಕಾಗುತ್ತದೆ. ವಾರದ ದಿನದಂದು ಬೆಳಿಗ್ಗೆ 8 ಗಂಟೆಗೆ ಮೊದಲು ಡಿಲೆವರಿ ಬಯಸಿದ್ರೆ 50 ರೂಪಾಯಿ ಪಾವತಿಸಬೇಕು. ಸಮಯ, ದಿನಾಂಕ ಸೂಚಿಸದೆ ಹೋದಲ್ಲಿ ಯಾವುದೇ ಶುಲ್ಕ ನೀಡಬೇಕಾಗಿಲ್ಲ.