ಶ್ವಾನದ ಚಿಕಿತ್ಸೆಗಾಗಿ ಪೋಕೆಮನ್​ ಕಾರ್ಡ್ ಮಾರಿದ ಬಾಲಕನಿಗೆ ಸಿಗ್ತು ಭರ್ಜರಿ ಗಿಫ್ಟ್..!

ಪೋಕೆಮನ್​ ಎಂಬ ಕಾರ್ಟೂನ್​ ಮಾತ್ರ ಮಕ್ಕಳಿಗೆ ಅದರಲ್ಲೂ ಹೆಚ್ಚಾಗಿ ಬಾಲಕರಿಗೆ ತುಂಬಾನೇ ಇಷ್ಟವಾಗುವಂತಹ ಪಾತ್ರ. ಅನೇಕ ಮಕ್ಕಳು ಪೋಕೆಮನ್​ ಕಾರ್ಡ್​ಗಳನ್ನ ಸಂಗ್ರಹಿಸುವ ಅಭ್ಯಾಸವನ್ನೂ ಇಟ್ಟುಕೊಂಡಿರ್ತಾರೆ. ಇದೇ ರೀತಿ ಅಭ್ಯಾಸವನ್ನ ಹೊಂದಿದ್ದ ಅಮೆರಿಕದ 8 ವರ್ಷದ ಬಾಲಕನೊಬ್ಬ ಒಂದೊಳ್ಳೆ ಉದ್ದೇಶಕ್ಕಾಗಿ ತನ್ನ ಕಾರ್ಡುಗಳನ್ನ ಮಾರಾಟ ಮಾಡುವ ಮೂಲಕ ದೊಡ್ಡ ಮಟ್ಟದಲ್ಲಿ ಸುದ್ದಿಯಾಗಿದ್ದಾನೆ.

ಬ್ರೈಸನ್​ ಕೈಲ್​ಮನ್​ ಎಂಬ ಬಾಲಕ ಪೋಕೆಮನ್​ ಪಾತ್ರವನ್ನ ನೆಚ್ಚಿಕೊಂಡಿದ್ದ. ಈತನ ಬಳಿ ಪೋಕೆಮನ್​ ಕಾರ್ಡ್​ಗಳ ಅಗಾಧ ಸಂಗ್ರಹವಿತ್ತು. ಆದರೆ ಆತನ ಶ್ವಾನವು ಒಂದು ವಿಚಿತ್ರ ಕಾಯಿಲೆಯಿಂದ ಬಳಲುತ್ತಿದ್ದರಿಂದ ಅದರ ಪ್ರಾಣವನ್ನ ಉಳಿಸಲು 700 ಡಾಲರ್​ ಮೌಲ್ಯದ ಚಿಕಿತ್ಸೆ ಮಾಡಬೇಕಾದ ಅನಿವಾರ್ಯತೆ ಬ್ರೈಸನ್​ಗೆ ಎದುರಾಯ್ತು. ಮನೆಯಲ್ಲಿ ಇಷ್ಟು ಹಣವನ್ನ ಹೊಂದಿಸೋಕೆ ಶಕ್ತರಿಲ್ಲದ ಕಾರಣ ಈತ ತನ್ನ ಪೋಕೆಮನ್​ ಕಾರ್ಡುಗಳನ್ನ ಮಾರಾಟ ಮಾಡಲು ನಿರ್ಧರಿಸಿದ್ದ. ತನ್ನ ಮನೆಯ ಮುಂದೆ ಪೋಕೆಮನ್​ ಮಾರಾಟಕ್ಕಿದೆ ಎಂದು ಬೋರ್ಡ್ ಹಾಕಿ ತನ್ನ ಪ್ರೀತಿಯ ಕಾರ್ಡ್​ಗಳನ್ನ ಮಾರಾಟ ಮಾಡಲು ಮುಂದಾಗಿದ್ದಾನೆ.

ಈ ರೀತಿ ಕಾರ್ಡುಗಳನ್ನ ಮಾರಾಟ ಮಾಡಿ 800 ಡಾಲರ್​ ಹೊಂದಿಸೋದು ಬಾಲಕನ ಗುರಿಯಾಗಿತ್ತು. ಆದರೆ ಆತ ಈಗ ಬರೋಬ್ಬರಿ 5490 ಡಾಲರ್​ಗಳನ್ನ ಗಳಿಸುವಲ್ಲಿ ಯಶಸ್ವಿಯಾಗಿದ್ದಾನೆ. ಈ ವಿಚಾರ ಪೋಕೆಮನ್​ ಕೇಂದ್ರ ಕಚೇರಿಗೂ ಹೋಗಿ ತಲುಪಿದ್ದು ಬಾಲಕನಿಗೆ ಅತ್ಯಂತ ದುಬಾರಿ ಅತೀ ವಿರಳವಾದ ಪೋಕೆಮನ್​ ಕಾರ್ಡುಗಳನ್ನ ಉಡುಗೊರೆಯಾಗಿ ನೀಡಿದೆ.

ಬೈಸನ್​ ನಿಮ್ಮ ಕತೆಯನ್ನ ಕೇಳಿ ನಾವು ಸ್ಪೂರ್ತಿಗೊಂಡಿದ್ದೇವೆ. ಶ್ವಾನದ ಚಿಕಿತ್ಸೆಗಾಗಿ ನೀವು ಪೋಕೆಮನ್​ ಕಾರ್ಡುಗಳನ್ನ ಮಾರಾಟ ಮಾಡಿ ಹಣ ಹೊಂದಿಸಿದ್ದೀರಾ. ಹೀಗಾಗಿ ಈ ಕಾರ್ಡುಗಳ ಸಹ ನಿಮ್ಮ ಅನಿವಾರ್ಯ ಸ್ಥಿತಿಯಲ್ಲಿ ಸಹಾಯಕ್ಕೆ ಬರಬಹುದು ಎಂದು ಭಾವಿಸಿದ್ದೇವೆ ಎಂದು ಪೋಕೆಮನ್​ ಸಿಬ್ಬಂದಿ ಹೇಳಿದ್ದಾರೆ.