ಬಸ್​ ಹತ್ತಿ ಪ್ರಯಾಣಿಕರ ದರೋಡೆ ಮಾಡ್ತಿದ್ದ ಮೂವರು ಖತರ್ನಾಕ್​ ಯುವಕರು ಅರೆಸ್ಟ್​

ನವದೆಹಲಿ: ಪೂರ್ವ ದೆಹಲಿಯ ಕಲ್ಯಾಣಪುರಿ ಪ್ರದೇಶದಲ್ಲಿ ಚಲಿಸುತ್ತಿದ್ದ ಬಸ್‌ನಲ್ಲಿ ಪ್ರಯಾಣಿಕರನ್ನು ದರೋಡೆ ಮಾಡಿದ ಆರೋಪದ ಮೇಲೆ ಮೂವರನ್ನು ಬಂಧಿಸಲಾಗಿದೆ.

ಆರೋಪಿಗಳನ್ನು ಕಲ್ಯಾಣಪುರಿ ನಿವಾಸಿಗಳಾದ ಪ್ರದೀಪ್ (28), ಸುಗಮ (23) ಮತ್ತು ಅಭಿಷೇಕ್ (23) ಎಂದು ಗುರುತಿಸಲಾಗಿದೆ. ಶುಕ್ರವಾರ ಸಂಜೆ 7 ಗಂಟೆ ಸುಮಾರಿಗೆ ಆರ್‌ಟಿವಿ ಬಸ್‌ನಲ್ಲಿ ಚಾಂದ್ ಸಿನಿಮಾ ರಸ್ತೆಯ ಬಳಿ ದರೋಡೆ ನಡೆದಿರುವ ಬಗ್ಗೆ ಪೊಲೀಸರಿಗೆ ಮಾಹಿತಿ ಬಂದಿತ್ತು.

ಪ್ರಯಾಣಿಕರಲ್ಲಿ ಒಬ್ಬರಾದ ದೀಪಕ್ (25) ಅವರು ಇತರ ಪ್ರಯಾಣಿಕರೊಂದಿಗೆ ಚಾಂದ್ ಚಿತ್ರಮಂದಿರದಿಂದ ಸೂಪರ್ ಶೈನ್ ಚೌಕ್‌ಗೆ ಬಸ್‌ ಏರಿದ್ದರು. ಸಂಜೆ 6.30 ರ ಸುಮಾರಿಗೆ, ಕಲ್ಯಾಣಪುರಿ 21 ಬ್ಲಾಕ್ ಬಳಿ ಬಸ್ ತಲುಪಿದಾಗ, ಮೂವರು ವ್ಯಕ್ತಿಗಳು ಚಾಕುಗಳನ್ನು ಹಿಡಿದುಕೊಂಡು ಬಸ್‌ನಲ್ಲಿ ಹತ್ತಿ ಹಲವಾರು ಪ್ರಯಾಣಿಕರ ಮೊಬೈಲ್ ಫೋನ್‌ಗಳು, ಪರ್ಸ್, ಬ್ಯಾಗ್‌ಗಳು ಇತ್ಯಾದಿಗಳನ್ನು ದೋಚಿದ್ದರು. ಈ ಬಗ್ಗೆ ದೂರು ದಾಖಲಾಗಿತ್ತು.

ದರೋಡೆ ಮಾಡಿದ ನಂತರ ಬಸ್ಸಿನಿಂದ ಇಳಿದು ಪರಾರಿಯಾಗಿದ್ದ ಆರೋಪಿಗಳನ್ನು ತಾಂತ್ರಿಕ ಕಣ್ಗಾವಲು ಮತ್ತು ಅವರ ನೆಟ್‌ವರ್ಕ್‌ ಆಧಾರದಿಂದ ಬಂಧಿಸಲಾಗಿದೆ. ಬಂಧಿತರ ಬಳಿಯಿಂದ ಮೂರು ಚಾಕುಗಳು, ಮೊಬೈಲ್ ಫೋನ್‌ಗಳು, ನಗದು, ಪರ್ಸ್ ಮತ್ತು ಇತರ ದರೋಡೆ ಮಾಡಿದ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಉಪ ಪೊಲೀಸ್ ಆಯುಕ್ತ (ಪೂರ್ವ) ಅಮೃತ ಗುಗುಲೋತ್ ತಿಳಿಸಿದ್ದಾರೆ.