ಬಾಲಸೋರ್: ಒಡಿಶಾದ ಬಾಲಸೋರ್ ಜಿಲ್ಲೆಯ ದಂಪತಿಗಳು ತಮ್ಮ ನವಜಾತ ಗಂಡು ಮಗುವನ್ನು ನೆರೆಯ ಮಯೂರ್‌ ಭಂಜ್ ಜಿಲ್ಲೆಯಲ್ಲಿ ಮಕ್ಕಳಿಲ್ಲದ ದಂಪತಿಗಳಿಗೆ ಮಾರಾಟ ಮಾಡಿದ್ದಾರೆ ಎಂದು ಭಾನುವಾರ ತಿಳಿಸಿದ್ದಾರೆ.
ಬಸ್ತಾ ಪೊಲೀಸ್ ಠಾಣಾ ವ್ಯಾಪ್ತಿಯ ಹದಮೌಡಾ ಗ್ರಾಮದ ಧರ್ಮು ಬೆಹೆರಾ ಮತ್ತು ಅವರ ಪತ್ನಿ ಶಾಂತಿಲತಾ ಅವರ ಮನೆಯಲ್ಲಿ ಒಂಬತ್ತು ದಿನದ ಮಗುವನ್ನು ಕಾಣದಿದ್ದಾಗ ಸ್ಥಳೀಯರು ಪ್ರಶ್ನಿಸಿದ್ದು, ಆಗ ಈ ವಿಷಯ ಬೆಳಕಿಗೆ ಬಂದಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಡಿಸೆಂಬರ್ 19 ರಂದು ಬರಿಪಾಡಾದಲ್ಲಿರುವ ಪಂಡಿತ್ ರಘುನಾಥ್ ಮುರ್ಮು ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಯಲ್ಲಿ ಶಾಂತಿಲತಾ ಗಂಡು ಮಗುವಿಗೆ ಜನ್ಮ ನೀಡಿದ್ದು, ಮೂರು ದಿನಗಳ ನಂತರ ಆಕೆಯನ್ನು ಬಿಡುಗಡೆ ಮಾಡಲಾಗಿತ್ತು.
ನವಜಾತ ಶಿಶು ಕಾಣದಿದ್ದಾಗ ಪ್ರಶ್ನಿಸಿದ ಗ್ರಾಮಸ್ಥರು “ಬಡತನ”ದಿಂದಾಗಿ ದಂಪತಿಗಳು ಮಧ್ಯವರ್ತಿ ಮೂಲಕ ಮಗುವನ್ನು ಮಾರಾಟ ಮಾಡಿದ್ದಾರೆ ಎಂದು ಶಂಕಿಸಿದ್ದಾರೆ. ದೂರಿನ ಆಧಾರದ ಮೇಲೆ, ಪೊಲೀಸರು ಮತ್ತು ಮಯೂರ್ಭಂಜ್ ಮಕ್ಕಳ ಕಲ್ಯಾಣ ಸಮಿತಿ ಜಂಟಿ ತನಿಖೆ ಪ್ರಾರಂಭಿಸಿವೆ. ಮಯೂರ್ಭಂಜ್ ಜಿಲ್ಲೆಯ ಸೈಂಕೋಲಾ ಬ್ಲಾಕ್‌ನ ಮಣಿಚಾ ಗ್ರಾಮದಲ್ಲಿ ಮಕ್ಕಳಿಲ್ಲದ ದಂಪತಿಗಳ ಬಳಿ ಇದ್ದ ಮಗುವನ್ನು ಶನಿವಾರ ರಕ್ಷಿಸಲಾಗಿದೆ.
ನವಜಾತ ಶಿಶುವಿನ ಯಾವುದೇ ಮಾರಾಟ ಅಥವಾ ಖರೀದಿಯ ಆರೋಪವನ್ನು ಶಾಂತಿಲತಾ ನಿರಾಕರಿಸಿದ್ದು, ಮಕ್ಕಳಿಲ್ಲದ ದಂಪತಿಗೆ ಮಗುವನ್ನು ದಾನ ಮಾಡಿರುವುದಾಗಿ ಹೇಳಿಕೊಂಡಿದ್ದಾರೆ.
Loading ...