BIG NEWS: ದೇಶದ ಮಹಿಳಾ ಬಿಲಿಯೇನರ್​ ಪಟ್ಟಿಗೆ ನೈಕಾ ಸಂಸ್ಥಾಪಕಿ ಫಾಲ್ಗುಣಿ ನಾಯರ್​ ಸೇರ್ಪಡೆ

ನೈಕಾ ಕಂಪನಿ ಸಂಸ್ಥಾಪಕಿ ಫಾಲ್ಗುಣಿ ನಾಯರ್​​ ದೇಶ ಕಂಡ ಏಳನೇ ಮಹಿಳಾ ಬಿಲಿಯೇನರ್​ ಎಂಬ ಕೀರ್ತಿಗೆ ಇಂದು ಪಾತ್ರರಾಗಿದ್ದಾರೆ. ಇದು ಮಾತ್ರವಲ್ಲದೇ ಇನಿಷಿಯಲ್​ ಪಬ್ಲಿಕ್​​ ಆಫರಿಂಗ್​​ನಲ್ಲಿ ಸ್ವಯಂ ನಿರ್ಮಿತ ಬಿಲಿಯೇನರ್​ ಕೂಡ ಎನಿಸಿದ್ದಾರೆ.

ನೈಕಾದ ಮೂಲ ಕಂಪನಿ ಎಫ್ಎಸ್ಎನ್​​ ಮುಂಬೈ ಷೇರು ಮಾರುಕಟ್ಟೆಯಲ್ಲಿ ಗೂಳಿ ಓಟವನ್ನು ಮುಂದುವರಿಸಿದೆ. ಬುಧವಾರದಂದು ಮಾರುಕಟ್ಟೆ ಆರಂಭವಾಗುತ್ತಿದ್ದಂತೆಯೇ ನೈಕಾದ ಷೇರುಗಳು 80 ಪ್ರತಿಷತ ಪ್ರೀಮಿಯಂ ಸಂಪಾದಿಸಿದೆ.

ಬ್ಲೂಮ್​ ಬರ್ಗ್ ಏಜೆನ್ಸಿ ನೀಡಿದ ಮಾಹಿತಿಯ ಪ್ರಕಾರ, ಸೌಂದರ್ಯವರ್ಧಕ ಸೇರಿದಂತೆ ವಿವಿಧ ಚಿಲ್ಲರೆ ವ್ಯಾಪಾರದ ಮಾರುಕಟ್ಟೆಯಾದ ನೈಕಾ ಮೊದಲ ಐದು ನಿಮಿಷಗಳಲ್ಲೇ 1 ಟ್ರಿಲಿಯನ್ ಕೋಟಿ ಮೌಲ್ಯವನ್ನು ತಲುಪಿದೆ. ನೈಕಾದ ಮಾರ್ಕೆಟ್​ ಕ್ಯಾಪ್​​ ಈಗಾಗಲೇ ಕೈಗಾರಿಕಾ ದೈತ್ಯಗಳಾದ ಬ್ರಿಟಾನಿಯಾ, ಗೋದ್ರೇಜ್​ ಹಾಗೂ ಇಂಡಿಗೋ ಸಮೀಪಿಸಿದೆ.

ಅಂದಹಾಗೆ ನೈಕಾ, ದೇಶದಲ್ಲಿ ಮಹಿಳಾ ನೇತೃತ್ವದ ಮೊದಲ ಯೂನಿಕಾರ್ನ್​ ಆಗಿದೆ. ಫಾಲ್ಗುಣಿ ನಾಯರ್​ ಈ ಕಂಪನಿಯನ್ನು 2012ರಲ್ಲಿ ಆರಂಭಿಸಿದರು. ಇದೊಂದು ಮೊಬೈಲ್​ ಅಪ್ಲಿಕೇಶನ್​ ಹಾಗೂ ವೆಬ್​ಸೈಟ್​ ಆಗಿದ್ದು ಇಲ್ಲಿ ಸೌಂದರ್ಯವರ್ಧಕ, ವೈಯಕ್ತಿಕ ಆರೈಕೆಯ ಉತ್ಪನ್ನಗಳು ಮಾರಾಟಕ್ಕಿವೆ. ಕಂಪನಿ ಆರಂಭಿಸಿದ 8 ವರ್ಷಗಳಲ್ಲಿ 58 ವರ್ಷದ ಫಾಲ್ಗುಣಿ ನಾಯರ್​, ಬಿಲಿಯೇನರ್​ ಪಟ್ಟಿಗೆ ಸೇರಿದ್ದಾರೆ.