ಫಿಫಾ ವಿಶ್ವಕಪ್ ಉದ್ಘಾಟನಾ ಸಮಾರಂಭಕ್ಕೆ ಝಾಕಿರ್ ನಾಯಕ್ ಗೆ ಯಾವುದೇ ಅಧಿಕೃತ ಆಹ್ವಾನವಿರಲಿಲ್ಲ: ಕತಾರ್

ನವದೆಹಲಿ: ಪರಾರಿಯಾದ ಇಸ್ಲಾಮಿಕ್ ಬೋಧಕ ಝಾಕಿರ್ ನಾಯಕ್‌ ಗೆ ದೋಹಾದಲ್ಲಿ ಫಿಫಾ ವಿಶ್ವಕಪ್‌ ನ ಉದ್ಘಾಟನೆಗೆ ಹಾಜರಾಗಲು ಯಾವುದೇ ಅಧಿಕೃತ ಆಹ್ವಾನ ನೀಡಲಾಗಿಲ್ಲ ಎಂದು ಕತಾರ್ ರಾಜತಾಂತ್ರಿಕ ಮಾರ್ಗಗಳ ಮೂಲಕ ಭಾರತಕ್ಕೆ ತಿಳಿಸಲಾಗಿದೆ.

ಭಾರತ-ಕತಾರ್ ದ್ವಿಪಕ್ಷೀಯ ಸಂಬಂಧಗಳ ಮೇಲೆ ಪ್ರತಿಕೂಲ ಪರಿಣಾಮ ಬೀರಲು ಮೂರನೇ ರಾಷ್ಟ್ರಗಳು ಉದ್ದೇಶಪೂರ್ವಕವಾಗಿ ಹರಡುತ್ತಿರುವ “ತಪ್ಪು ಮಾಹಿತಿ” ಎಂದು ಕತಾರ್ ಹೇಳಿದೆ.

ವಿವಿಐಪಿ ಬಾಕ್ಸ್‌ ನಿಂದ ಈವೆಂಟ್‌ನ ಭವ್ಯ ಉದ್ಘಾಟನೆಯನ್ನು ವೀಕ್ಷಿಸಲು ಇಸ್ಲಾಮಿಸ್ಟ್ ಝಾಕಿರ್ ನಾಯ್ಕ್ ಅವರನ್ನು ಔಪಚಾರಿಕವಾಗಿ ಆಹ್ವಾನಿಸಿದ್ದರೆ, ಉಪರಾಷ್ಟ್ರಪತಿ ಜಗದೀಪ್ ಧನಕರ್ ಅವರ ಭೇಟಿಯನ್ನು ರದ್ದುಪಡಿಸಲಾಗುವುದು ಎಂದು ಭಾರತ ತಿಳಿಸಿದ ನಂತರ ಈ ಹೇಳಿಕೆ ಬಂದಿದೆ.

ವಿವಾದಿತ ಟೆಲಿವಾಂಜೆಲಿಸ್ಟ್ ಝಾಕಿರ್ ನಾಯ್ಕ್ ಭಾರತದಲ್ಲಿ ಹಣ ವರ್ಗಾವಣೆ ಮತ್ತು ದ್ವೇಷ ಭಾಷಣದ ಅನೇಕ ಪ್ರಕರಣಗಳನ್ನು ಎದುರಿಸುತ್ತಿದ್ದಾರೆ. ಅವರ ಸಂಘಟನೆಯಾದ ಇಸ್ಲಾಮಿಕ್ ರಿಸರ್ಚ್ ಫೌಂಡೇಶನ್ ಅನ್ನು ದೇಶದಲ್ಲಿ ನಿಷೇಧಿಸಲಾಗಿದೆ.

ವಿವಿಧ ಧಾರ್ಮಿಕ ಸಮುದಾಯಗಳು ಮತ್ತು ಗುಂಪುಗಳ ನಡುವೆ ದ್ವೇಷ, ಕೆಟ್ಟ ಭಾವನೆಗಳನ್ನು ಉತ್ತೇಜಿಸುವ ಆರೋಪ ಅವರ ಮೇಲಿದೆ. ನಾಯಕ್ ಬಲವಂತದ ಮತಾಂತರದಲ್ಲಿ ತೊಡಗಿದ್ದರು. ಸಾಕ್ಷ್ಯಾಧಾರಗಳ ಆಧಾರದ ಮೇಲೆ, ಇತರ ಧರ್ಮದ ಜನರನ್ನು ಇಸ್ಲಾಂಗೆ ಪರಿವರ್ತಿಸಿದ್ದಕ್ಕಾಗಿ ಅವರ ವಿರುದ್ಧ ಆರೋಪಪಟ್ಟಿ ಸಲ್ಲಿಸಲಾಯಿತು.

ಝಾಕಿರ್ ನಾಯ್ಕ್ ವಿರುದ್ಧ ಭಾರತವು ಅಕ್ರಮ ಹಣ ವರ್ಗಾವಣೆ ಆರೋಪದ ನಂತರ ಪರಾರಿಯಾಗಿ 2017 ರಿಂದ ಮಲೇಷ್ಯಾದಲ್ಲಿ ದೇಶಭ್ರಷ್ಟರಾಗಿ ವಾಸಿಸುತ್ತಿದ್ದಾರೆ.

ನಾಯಕ್ ಅವರು ಮಲೇಷ್ಯಾದಲ್ಲಿ ಶಾಶ್ವತ ನಿವಾಸ ಹೊಂದಿದ್ದರೂ, “ರಾಷ್ಟ್ರೀಯ ಭದ್ರತೆ” ಹಿತದೃಷ್ಟಿಯಿಂದ 2020 ರಲ್ಲಿ ದೇಶದಲ್ಲಿ ಭಾಷಣ ಮಾಡುವುದನ್ನು ನಿಷೇಧಿಸಲಾಯಿತು.