ಡ್ರೋನ್ ದಾಳಿಯಿಂದ ಹೊತ್ತಿ ಉರಿಯುತ್ತಿದ್ದ ಹಡಗಿನಲ್ಲಿದ್ದ 13 ಭಾರತೀಯರು ಸೇರಿ 23 ಮಂದಿ ರಕ್ಷಿಸಿದ ನೌಕಾಪಡೆ

ಗಲ್ಫ್ ಆಫ್ ಏಡನ್‌ ಕೊಲ್ಲಿಯಲ್ಲಿ ಡ್ರೋನ್ ದಾಳಿಗೆ ಒಳಗಾದ ನಂತರ ಅಪಾಯಕಾರಿ ಸ್ಥಿತಿಯಲ್ಲಿದ್ದ ಹಡಗಿನಲ್ಲಿದ್ದ 13 ಭಾರತೀಯರು ಸೇರಿದಂತೆ 23 ಜನರನ್ನು ಭಾರತೀಯ ನೌಕಾಪಡೆ ರಕ್ಷಿಸಿದೆ.

ನೌಕಾಪಡೆಯು ಮಾರ್ಚ್ 4 ರಂದು ಡ್ರೋನ್ ದಾಳಿಯಿಂದಾಗಿ ಲೈಬೀರಿಯನ್ ಧ್ವಜದ ವಾಣಿಜ್ಯ ಹಡಗು MSCSkyII ಬೆಂಕಿಯಲ್ಲಿದೆ ಎನ್ನುವ ಮಾಹಿತಿ ಬಂದಿದೆ. ಸಮುದ್ರದ ಭದ್ರತಾ ಕಾರ್ಯಾಚರಣೆಗಳಿಗಾಗಿ ಪ್ರದೇಶದಲ್ಲಿ ನಿಯೋಜಿಸಲಾಗಿರುವ ಐಎನ್‌ಎಸ್ ಕೋಲ್ಕತ್ತಾ ತಕ್ಷಣವೇ ಪ್ರತಿಕ್ರಿಯಿಸಿತು. ರಾತ್ರಿ 10.30 ರ ಹೊತ್ತಿಗೆ ಘಟನೆಯ ಸ್ಥಳಕ್ಕೆ ಆಗಮಿಸಿತು ಎಂದು ನೌಕಾಪಡೆ ತಿಳಿಸಿದೆ.

ಅಡೆನ್‌ನ ಸುಮಾರು 90 ನಾಟಿಕಲ್ ಮೈಲು ಆಗ್ನೇಯಕ್ಕೆ ಲೈಬೀರಿಯನ್ -ಧ್ವಜದ MV #MSCSkyII ಹಡಗು ಡ್ರೋನ್/ಕ್ಷಿಪಣಿ ದಾಳಿಗೊಳಗಾಗಿ ಬೆಂಕಿ ಕಾಣಿಸಿಕೊಂಡಿದೆ. ಐಎನ್‌ಎಸ್ ಕೋಲ್ಕತ್ತಾದಿಂದ 12 ಸಿಬ್ಬಂದಿಗಳ ವಿಶೇಷ ಅಗ್ನಿಶಾಮಕ ತಂಡವು ಮಾರ್ಚ್ 5 ರ ಮುಂಜಾನೆ ಹಡಗನ್ನು ಅಗ್ನಿಶಾಮಕ ಪ್ರಯತ್ನಗಳಲ್ಲಿ ಸಹಾಯ ಮಾಡಲು ಪ್ರಾರಂಭಿಸಿ ಪರಿಣಿತ ಇಒಡಿ ತಂಡವು ರಕ್ಷಣಾ ಕಾರ್ಯಾಚರಣೆ ನಡೆಸಿದೆ. ನೌಕೆಯು 23 ಸಿಬ್ಬಂದಿಯೊಂದಿಗೆ ಕಾರ್ಯನಿರ್ವಹಿಸುತ್ತಿತ್ತು, ಇದರಲ್ಲಿ 13 ಭಾರತೀಯರು ಸೇರಿದ್ದಾರೆ. ಅವರೆಲ್ಲರನ್ನೂ ಸುರಕ್ಷಿತ ಸ್ಥಳಕ್ಕೆ ಕರೆತರಲಾಗಿದೆ ಎಂದು ನೌಕಾಪಡೆ ತಿಳಿಸಿದೆ.

ಹೌತಿ ಉಗ್ರಗಾಮಿಗಳಿಂದ ಕೆಂಪು ಸಮುದ್ರದಲ್ಲಿ ವಿವಿಧ ವಾಣಿಜ್ಯ ಹಡಗುಗಳ ಮೇಲೆ ದಾಳಿಗಳು ಹೆಚ್ಚುತ್ತಿರುವ ಜಾಗತಿಕ ಕಳವಳಗಳ ನಡುವೆ ಸೋಮವಾರದ ತಾಜಾ ಘಟನೆ ನಡೆದಿದೆ.