ನಿಗೂಢ ತ್ರಿವಳಿ ಆತ್ಮಹತ್ಯೆ: ಸಾಯುವ ಕುರಿತ ವಿಭಿನ್ನ ವಿಡಿಯೋ ವೀಕ್ಷಿಸಿದ್ದ ಮಹಿಳೆಯರು

ನವದೆಹಲಿ: ದೆಹಲಿಯ ವಸಂತ ವಿಹಾರ್‌ನಲ್ಲಿ ಮೂವರು ಮಹಿಳೆಯರು ಒಟ್ಟಿಗೆ ಆತ್ಮಹತ್ಯೆ ಮಾಡಿಕೊಂಡ ಪ್ರಕರಣ ಈಗ ದೇಶದ ಗಮನಸೆಳೆದಿದೆ. ಇದು ಅತ್ಯಂತ ನಿಗೂಢ ತ್ರಿವಳಿ ಆತ್ಮಹತ್ಯೆ ಪ್ರಕರಣವಾಗಿದೆ. ಸಾಯುವುದು ಹೇಗೆ ಎಂಬ ಕುರಿತಾದ ವಿಭಿನ್ನ ವಿಡಿಯೋಗಳನ್ನು ಈ ಮಹಿಳೆಯರು ಹಲವು ತಿಂಗಳ ಕಾಲ ವೀಕ್ಷಿಸಿದ್ದರು ಎಂಬ ಅಂಶ ಕುತೂಹಲವನ್ನು ಇನ್ನಷ್ಟು ಹೆಚ್ಚಿಸಿದೆ.

ಮೃತರನ್ನು ಮಂಜು ಶ್ರೀವಾಸ್ತವ (55) ಮತ್ತು ಅವರ ಪುತ್ರಿಯರಾದ ಅಂಕಿತಾ (30) ಮತ್ತು ಅಂಶುತಾ (26) ಎಂದು ಗುರುತಿಸಲಾಗಿದೆ. ಮರಣೋತ್ತರ ಪರೀಕ್ಷೆಯ ವರದಿಗಾಗಿ ಕಾಯುತ್ತಿರುವುದರಿಂದ ಸಾವಿಗೆ ನಿಖರವಾದ ಕಾರಣ ಇನ್ನೂ ತಿಳಿದುಬಂದಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.

ಪೊಲೀಸರು ಸಂಗ್ರಹಿಸಿದ ಪ್ರಾಥಮಿಕ ಮಾಹಿತಿ ಪ್ರಕಾರ, ಕಳೆದ ವರ್ಷ ಕುಟುಂಬದ ಮುಖ್ಯಸ್ಥ ಉಮೇಶ್ ಶ್ರೀವಾಸ್ತವ ಕೋವಿಡ್‌ ಸೋಂಕಿಗೆ ಒಳಗಾಗಿ ಮೃತಪಟ್ಟಿದ್ದರು. ಇದಾದ ಬಳಿಕ ಈ ಮಹಿಳೆಯರು ಖಿನ್ನತೆಗೆ ಒಳಗಾಗಿದ್ದರು. ಹಣಕಾಸಿನ ಸಂಕಷ್ಟ ಅವರ ಜೀವನವನ್ನು ಇನ್ನಷ್ಟು ಶೋಚನೀಯಗೊಳಿಸಿದವು. ಶನಿವಾರ ರಾತ್ರಿ, ಮಂಜು ಮತ್ತು ಅವರ ಇಬ್ಬರು ಪುತ್ರಿಯರು ಮನೆಯ ಕೊಠಡಿಯೊಂದನ್ನು ಸೇರಿ ಎಲ್ಲೂ ಗಾಳಿಯಾಡದಂತೆ ಮಾಡಿಕೊಂಡು ಗ್ಯಾಸ್‌ ಸಿಲಿಂಡರ್‌ನಿಂದ ಗ್ಯಾಸ್‌ ಸೋರುವಂತೆ ಮಾಡಿದ್ದಾರೆ. ಕಿಟಕಿಗಳನ್ನು ಫಾಯಿಲ್‌ನಿಂದ ಮುಚ್ಚಿದ್ದರು. ಹೀಗೆ ಸ್ವತಃ ಉಸಿರುಗಟ್ಟಿಸಿಕೊಂಡು ಮೃತಪಟ್ಟಿದ್ದಾರೆ.

BIG NEWS: ಪರಿಷತ್ ಚುನಾವಣೆ; ಕಾಂಗ್ರೆಸ್ ಟಿಕೆಟ್ ಘೋಷಣೆ ಬೆನ್ನಲ್ಲೇ ಭುಗಿಲೆದ್ದ ಅಸಮಾಧಾನ

ಸತ್ತವರಲ್ಲಿ ಒಬ್ಬರು ಬರೆದು ಗೋಡೆಯ ಮೇಲೆ ಅಂಟಿಸಿದ ಸೂಸೈಡ್ ನೋಟ್‌ನಲ್ಲಿ, “ಇಂಗಾಲದ ಮಾನಾಕ್ಸೈಡ್ ಒಳಗೆ ಇದೆ. ನಮಗೆ ಬದುಕಲು ಇಷ್ಟವಿಲ್ಲ. ನಮ್ಮನ್ನು ಉಳಿಸಲು ಪ್ರಯತ್ನಿಸಬೇಡಿ. ಉಳಿಸುವುದರಿಂದ ನಮಗೆ ಮಿದುಳಿನ ಹಾನಿಯನ್ನುಂಟುಮಾಡುತ್ತದೆ. ಇದು ಬದುಕುವುದಕ್ಕಿಂತ ಕೆಟ್ಟದು. ಬದಲಿಗೆ ನಿಮ್ಮನ್ನು ಉಳಿಸಿಕೊಳ್ಳಿ ಎಂದು ನಾವು ಬೇಡಿಕೊಳ್ಳುತ್ತೇವೆ” ಎಂದು ಬರೆದಿತ್ತು.

ಘಟನಾ ಸ್ಥಳದಿಂದ ವಶಪಡಿಸಿಕೊಂಡ ಎರಡು ಮೊಬೈಲ್ ಫೋನ್‌ಗಳನ್ನು ಪರೀಕ್ಷೆಗಾಗಿ ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದೆ. ನಾವು ಘಟನಾ ಸ್ಥಳದಿಂದ ವಶಪಡಿಸಿಕೊಂಡಿರುವ ಎಂಟು-ಒಂಬತ್ತು ಆತ್ಮಹತ್ಯೆ ಟಿಪ್ಪಣಿಗಳನ್ನು ಮೂವರಲ್ಲಿ ಯಾರು ಬರೆದಿದ್ದಾರೆ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಕೈಬರಹವನ್ನು ಹೊಂದಿಸಲು ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ಕಳುಹಿಸುತ್ತೇವೆ ಎಂದು ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.