ಈ ಕಾರಣಕ್ಕೆ ಸಾವಿರಾರು ಕಾರುಗಳನ್ನು ಗ್ರಾಹಕರಿಂದ ಹಿಂಪಡೆಯಲು ಮುಂದಾಗಿದೆ ಮಾರುತಿ ಸುಜುಕಿ

ದೇಶದ ಅತಿದೊಡ್ಡ ಕಾರು ತಯಾರಕ ಕಂಪನಿ ಮಾರುತಿ ಸುಜುಕಿ ಇಂಡಿಯಾ ಪೆಟ್ರೋಲ್​ನಿಂದ ಚಲಿಸುತ್ತಿರುವ ಕೆಲ ಸಿಯಾಜ್​, ಎರ್ಟಿಗಾ, ಬ್ರೆಜಾ, ಎಸ್​ ಕ್ರಾಸ್​​ ಹಾಗೂ ಎಕ್ಸ್​ಎಲ್​ 6 ವಾಹನಗಳನ್ನು ಗ್ರಾಹಕರಿಂದ ವಾಪಸ್​ ಪಡೆಯುವುದಾಗಿ ಘೋಷಣೆ ಮಾಡಿದೆ.

2018 ಮೇ 4 ರಿಂದ 2020 ರ ಅಕ್ಟೋಬರ್​ 27ರ ಒಳಗೆ ತಯಾರಾದ ಈ ಕಾರುಗಳಲ್ಲಿ 181,754 ಯುನಿಟ್‌ಗಳಲ್ಲಿ ಸಂಭಾವ್ಯ ದೋಷ ಇದೆಯೇ ಎಂದು ಪರೀಕ್ಷೆ ಮಾಡಲು ವಾಹನಗಳನ್ನು ಹಿಂಪಡೆಯುತ್ತಿರುವುದಾಗಿ ಕಂಪನಿ ಹೇಳಿದೆ.

ಗ್ರಾಹಕರ ಹಿತದೃಷ್ಟಿಯನ್ನು ಗಮನದಲ್ಲಿಟ್ಟುಕೊಂಡು ಮಾರುತಿ ಸುಜುಕಿ ಕಂಪನಿ ಸ್ವಯಂ ಪ್ರೇರಿತವಾಗಿ ಕೆಲ ಆಯ್ದ ವಾಹನಗಳ ಜನರೇಟರ್​ ಘಟಕದ ತಪಾಸಣೆ ಅಥವಾ ಮರುಜೋಡಣೆ ಕಾರ್ಯವನ್ನು ಉಚಿತವಾಗಿ ಮಾಡಿಕೊಡುವ ಸಲುವಾಗಿ ಗ್ರಾಹಕರಿಂದ ಕಾರುಗಳನ್ನು ಹಿಂಪಡೆಯುತ್ತಿದೆ. ಸಂಬಂಧಪಟ್ಟ ಗ್ರಾಹಕರು ಅಧಿಕೃತ ಶಾಖೆಗಳಿಂದ ಈ ಬಗ್ಗೆ ಸಂದೇಶ ಸ್ವೀಕರಿಸಲಿದ್ದಾರೆ ಎಂದು ಕಂಪನಿ ಹೇಳಿದೆ.

ನ್ಯೂನ್ಯತೆ ಹೊಂದಿರುವ ಭಾಗಗಳ ತಪಾಸಣೆ ಅಥವಾ ಮರುಜೋಡಣೆ ಕಾಯಕವು ನವೆಂಬರ್​ ಮೊದಲ ವಾರದಿಂದ ಆರಂಭಗೊಳ್ಳಲಿದೆ. ಅಲ್ಲಿಯವರೆಗೆ ಗ್ರಾಹಕರಿಗೆ ನೀರು ಹೆಚ್ಚಿರುವ ಜಾಗಗಳಲ್ಲಿ ವಾಹನ ಚಾಲನೆ ಹಾಗೂ ಕಾರಿನಲ್ಲಿರುವ ಎಲೆಕ್ಟ್ರಾನಿಕ್​ ಭಾಗಗಳ ಮೇಲೆ ನೀರು ಬೀಳದಂತೆ ನೋಡಿಕೊಳ್ಳಿ ಎಂದು ಎಚ್ಚರಿಕೆ ನೀಡಿದೆ.

ದೋಷವುಳ್ಳ ಕಾರುಗಳನ್ನು ಹೊಂದಿರುವ ಮಾಲೀಕರು www.marutisuzuki.com ( ಎರ್ಟಿಗಾ ಹಾಗೂ ಬ್ರೆಜಾ) ಹಾಗೂ www.nexaexperience.com ( ಸಿಯಾಜ್​​, ಎಕ್ಸ್​ಎಲ್​ 6 ಹಾಗೂ ಎಸ್​ ಕ್ರಾಸ್​​ ) ವೆಬ್​ಸೈಟ್​ಗೆ ತೆರಳಿ ಈ ಬಗ್ಗೆ ಹೆಚ್ಚಿನ ಮಾಹಿತಿ ಪಡೆದುಕೊಳ್ಳಬಹುದಾಗಿದೆ.