ಹಣದ ಆಸೆಗಾಗಿ ಪೋಷಕರ ಎದುರು ಕಿಡ್ನಾಪ್​ ನಾಟಕವಾಡಿದ ಭೂಪ….!

ಹಣದ ಆಸೆಗಾಗಿ ಪೋಷಕರ ಎದುರು ಪುತ್ರ ಕಿಡ್ನಾಪ್​ ನಾಟಕವಾಡಿದ ವಿಚಿತ್ರ ಘಟನೆಯೊಂದು ವರದಿಯಾಗಿದೆ. ತಾನು ಕಿಡ್ನಾಪ್​ ಆಗಿದ್ದೇನೆ ಎಂದು ಸುಳ್ಳು ಸುದ್ದಿ ಹಬ್ಬಿಸುವ ಮೂಲಕ ತಂದೆಯಿಂದ ಹಣ ಪೀಕಲು ಪುತ್ರ ಪ್ಲಾನ್​ ಮಾಡಿದ್ದ ಎನ್ನಲಾಗಿದೆ.

ಉತ್ತರ ಪ್ರದೇಶದ ಬಿಜನೂರು ಎಂಬಲ್ಲಿ ದೇಶ್​ಬಂಧು ಗುಪ್ತಾ ಪೊಲೀಸ್​ ಠಾಣೆಯಲ್ಲಿ ತಮ್ಮ ಪುತ್ರ ಸುಶಾಂತ್​ ಕಿಡ್ನಾಪ್​ ಆಗಿರುವ ಬಗ್ಗೆ ದೂರನ್ನು ನೀಡಿದ್ದರು. 20 ವರ್ಷದೊಳಗಿನ ಪ್ರಾಯದ ಸುಶಾಂತ್​​ ಮೊಬೈಲ್​ ಸೆಪ್ಟೆಂಬರ್​ 19ರಿಂದ ಸ್ವಿಚ್​ ಆಫ್​ ಆಗಿದೆ ಎಂದು ಪೊಲೀಸರಿಗೆ ಮಾಹಿತಿ ನೀಡಿದ್ದರು.

ಸಪ್ಟೆಂಬರ್​ 27ರಂದು ಪುತ್ರನ ಮೊಬೈಲ್ ನಂಬರ್​ನಿಂದ ಗುಪ್ತಾರಿಗೆ ಒಂದು ಮೆಸೇಜ್​ ಬಂದಿತ್ತು. ಇದರಲ್ಲಿ ಸುಶಾಂತ್​​ ತಮ್ಮ ಬಳಿ 75 ಸಾವಿರ ರೂಪಾಯಿ ಸಾಲ ಪಡೆದಿದ್ದು ಅದನ್ನು ನೀವು ಹಿಂತಿರುಗಿಸದೇ ಹೋದಲ್ಲಿ ನಾವು ಆತನನ್ನು ಕೊಲೆ ಮಾಡುತ್ತೇವೆ ಎಂದು ಬೆದರಿಕೆಯೊಡ್ಡಲಾಗಿತ್ತು.

ಯುವಕ ಕಣ್ಮರೆಯಾದ ಬಗ್ಗೆ ತನಿಖೆ ಆರಂಭಿಸಿದ ಪೊಲೀಸರಿಗೆ ಸುಶಾಂತ್​ ಕಳ್ಳಾಟ ತಿಳಿದುಬಂದಿದೆ. ಸಾಕಷ್ಟು ವಿಚಾರಣೆಯ ಬಳಿಕ ಸುಶಾಂತ್​ ಹಣದ ಆಸೆಗಾಗಿ ತಾನೇ ಕಿಡ್ನಾಪ್​ ನಾಟಕ ಆಡಿದ್ದಾಗಿ ಒಪ್ಪಿಕೊಂಡಿದ್ದಾನೆ.