ನೃತ್ಯ ಮಾಡಲು ಬಂದಿದ್ದವರಿಗೆ ಹೆಚ್ಐವಿ ಪರೀಕ್ಷೆ; ಭಾರೀ ವಿವಾದಕ್ಕೀಡಾಯ್ತು ಜಿಲ್ಲಾಡಳಿತದ ನಡೆ

ಮಧ್ಯಪ್ರದೇಶದ ಪ್ರಸಿದ್ಧ ‘ಕರಿಲ ಮಾಟ ಮೇಳ’ಕ್ಕೆ ಆಗಮಿಸಿದ್ದ ನೃತ್ಯಗಾರ್ತಿಯರನ್ನು ಜಿಲ್ಲಾ ಆರೋಗ್ಯ ಇಲಾಖೆ ಎಚ್‌ಐವಿ ಪರೀಕ್ಷೆಗೆ ಒಳಪಡಿಸಿದ ವಿಲಕ್ಷಣ ಘಟನೆ ಅಶೋಕನಗರದಲ್ಲಿ ಬೆಳಕಿಗೆ ಬಂದಿದೆ.

ರಾಷ್ಟ್ರೀಯ ಮಹಿಳಾ ಆಯೋಗವು (ಎನ್‌ಸಿಡಬ್ಲ್ಯು) ಈ ವಿಷಯವನ್ನು ಪರಿಗಣಿಸಿದೆ. ಈ ಘಟನೆಯನ್ನು ನರ್ತಕಿಯರ ಘನತೆಯಿಂದ ಬದುಕುವ ಹಕ್ಕಿನ ಘೋರ ಉಲ್ಲಂಘನೆ ಎಂದು ವಿಶ್ಲೇಷಿಸಿದೆ.

ಅಶೋಕನಗರದ ಮುಂಗೋಲಿ ತಹಸಿಲ್‌ನಿಂದ ಘಟನೆ ವರದಿಯಾಗಿದ್ದು, 10 ನರ್ತಕಿಯರಿಗೆ ಹೆಚ್ಐವಿ ಪರೀಕ್ಷೆ ಮಾಡಲಾಗಿದೆ ಎಂದು ವರದಿಯಾಗಿದೆ.

ಜಿಲ್ಲೆಯಲ್ಲಿ ಪ್ರತಿ ವರ್ಷ ರಂಗ ಪಂಚಮಿಯಂದು ಕರಿಲ ಮೇಳವನ್ನು ಆಯೋಜಿಸಲಾಗುತ್ತದೆ. ಈ ವರ್ಷ, ಇದನ್ನು ಭಾನುವಾರ ಆಯೋಜಿಸಲಾಗಿತ್ತು, ಇದರಲ್ಲಿ ವಿವಿಧ ಸ್ಥಳಗಳಿಂದ ಮಹಿಳಾ ನೃತ್ಯಗಾರರು ‘ರೈ’ ನೃತ್ಯ (ಬುಂದೇಲಖಂಡಿ ಜಾನಪದ ನೃತ್ಯ) ಪ್ರದರ್ಶಿಸಲು ಬಂದಿದ್ದರು.

ರಾಷ್ಟ್ರೀಯ ಮಹಿಳಾ ಆಯೋಗದ ಗಮನಕ್ಕೆ ಈ ವಿಚಾರ ಬಂದ ತಕ್ಷಣ, ಜಿಲ್ಲಾಡಳಿತ ಮತ್ತು ಆರೋಗ್ಯ ಇಲಾಖೆ ಕ್ರಮ ಕೈಗೊಂಡು ಈ ವಿಷಯದಲ್ಲಿ ಸ್ಪಷ್ಟೀಕರಣವನ್ನು ನೀಡುವ ಪತ್ರಿಕಾ ಟಿಪ್ಪಣಿಯನ್ನು ನೀಡಿತು.

ಎರಡು ದಿನಗಳ ಹಿಂದೆ 10 ನೃತ್ಯಗಾರರ ಪರೀಕ್ಷೆ ನಡೆಸಿರುವುದಾಗಿ ಹೇಳಿಕೊಂಡಿದ್ದ ಅಶೋಕನಗರದ ಮುಖ್ಯ ವೈದ್ಯಕೀಯ ಆರೋಗ್ಯ ಅಧಿಕಾರಿ (CMHO), ಡಾ. ನೀರಜ್ ಛಾರಿ ವಿಷಯ ಬೆಳಕಿಗೆ ಬಂದ ನಂತರ ತಮ್ಮ ಹೇಳಿಕೆಗೆ ಯು-ಟರ್ನ್ ತೆಗೆದುಕೊಂಡಿದ್ದಾರೆ.

ವಿಷಯ ಉಲ್ಬಣಗೊಂಡ ನಂತರ ಪ್ರತಿಪಕ್ಷ ಕಾಂಗ್ರೆಸ್ ಕೂಡ, ಸರ್ಕಾರವು ಮಹಿಳೆಯರ ಘನತೆಗೆ ಧಕ್ಕೆ ತಂದಿದೆ ಎಂದು ಆರೋಪಿಸಿದೆ.