ರಾಜ್ಯದಲ್ಲಿ ಕೊರೊನಾ ಲಾಕ್ಡೌನ್ ಅವಧಿಯನ್ನ ಸಿಎಂ ಬಿ.ಎಸ್. ಯಡಿಯೂರಪ್ಪ ಜೂನ್ 14ನೇ ತಾರೀಖು ಬೆಳಗ್ಗೆ ಆರು ಗಂಟೆಯವರೆಗೆ ವಿಸ್ತರಿಸಿದ್ದಾರೆ. ಈ ಸಂಬಂಧ ವಿಧಾನಸೌಧದಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು ರಾಜ್ಯದಲ್ಲಿ ಪ್ರಸ್ತುತ ಇರುವ ಕೊರೊನಾ ಪರಿಸ್ಥಿತಿಯನ್ನ ಗಮನಿಸಿ ಆರೋಗ್ಯ ತಜ್ಞರು ನೀಡಿರುವ ಸಲಹೆಗಳನ್ನ ಪರಿಗಣಿಸಿ ಈ ತೀರ್ಮಾನ ಕೈಗೊಂಡಿದ್ದೇವೆ ಎಂದು ಹೇಳಿದ್ರು.
500 ಕೋಟಿ ರೂಪಾಯಿ ಮೊತ್ತದ ವಿಶೇಷ ಪ್ಯಾಕೇಜ್ ಘೋಷಣೆ ಮಾಡಿದ ಸಿಎಂ ಯಡಿಯೂರಪ್ಪ ನೇಕಾರರು, ಮೀನುಗಾರರು ಹಾಗೂ ಚಿತ್ರರಂಗದವರಿಗೆ ಸೇರಿದಂತೆ ಹಲವು ಸಮುದಾಯದವರಿಗೆ 2ನೇ ಪ್ಯಾಕೇಜ್ನಲ್ಲಿ ಅನುದಾನ ನೀಡಿದ್ದಾರೆ. ನೇಕಾರರು, ಪವರ್ ಲೂಮ್ಗೆ 3 ಸಾವಿರ ರೂಪಾಯಿ ಪರಿಹಾರ, ಮೀನುಗಾರರಿಗೆ ತಲಾ 3 ಸಾವಿರ ರೂಪಾಯಿ ಪರಿಹಾರ ಘೋಷಣೆಯಾಗಿದೆ. ಇದರಿಂದ 18 ಸಾವಿರ ಮೀನುಗಾರರಿಗೆ ಲಾಭವಾಗಿದೆ. ಚಲನಚಿತ್ರ ರಂಗದ ಕಾರ್ಮಿಕರು ಹಾಗೂ ಅಸಂಘಟಿತ ಕಾರ್ಮಿಕರಿಗೂ ಮೂರು ಸಾವಿರ ರೂಪಾಯಿ ಅನುದಾನ ಘೋಷಣೆಯಾಗಿದೆ.
ದೋಣಿ ಮಾಲೀಕರಿಗೆ, ಆಶಾಕಾರ್ಯಕರ್ತೆಯರು, ಮುಜರಾಯಿ ಇಲಾಖೆ ಸಿಬ್ಬಂದಿ, ಮಸೀದಿಯ ಕೇಶ್ ಇಮಾಮ್ಗಳಿಗೆ, ಅಡುಗೆ ಸಿಬ್ಬಂದಿಗೆ 3 ಸಾವಿರ ರೂಪಾಯಿ, ಅನುದಾನ ಘೋಷಣೆಯಾಗಿದೆ, ಅಂಗನವಾಡಿ ಕಾರ್ಯಕರ್ತೆಯರು ಹಾಗೂ ಸಹಾಯಕಿಯರಿಗೆ 2 ಸಾವಿರ ರೂಪಾಯಿ ಪರಿಹಾರ ಸಿಗಲಿದೆ.
ನ್ಯಾಯವಾದಿಗಳ ಕಲ್ಯಾಣ ನಿಧಿಗೆ 5 ಕೋಟಿ ಪರಿಹಾರ ನಿಧಿ, ಅನುದಾನ ರಹಿತ ಪ್ರಾಥಮಿಕ ಶಾಲಾ ಶಿಕ್ಷಕರಿಗೆ 5 ಸಾವಿರ ರೂಪಾಯಿ ಪರಿಹಾರ, ಸಣ್ಣ ಕೈಗಾರಿಕೆಗಳಿಗೆ ವಿದ್ಯುತ್ ಶುಲ್ಕ ಪಾವತಿಯಿಂದ ವಿನಾಯ್ತಿ ಸಿಗಲಿದೆ.
ಶಾಲಾ ಮಕ್ಕಳಿಗೆ ಜೂನ್-ಜುಲೈ ತಿಂಗಳಲ್ಲಿ ಹಾಲಿನ ಪುಡಿ ನೀಡುವುದು ಹಾಗೂ ಹೋಟೆಲ್ಗಳನ್ನ ಸಂಜೆಯವರೆಗೂ ತೆರೆಯಬಹುದು. ಆದರೆ ಪಾರ್ಸೆಲ್ಗೆ ಮಾತ್ರ ಅವಕಾಶ ಇರಲಿದೆ ಎಂದು ಸಿಎಂ ಯಡಿಯೂರಪ್ಪ ಹೇಳಿದ್ದಾರೆ.
Loading ...