ಮನೆ ಮುಂದೆ ಚಲಿಸಿದ ವಾಮಾಚಾರದ ನಿಂಬೆಹಣ್ಣು…! ಭಯಭೀತರಾದ ಕುಟುಂಬಸ್ಥರು

ಶಿವಮೊಗ್ಗ: ವಾಮಾಚಾರ ಮಾಡಿ ಎಸೆದ ನಿಂಬೆಹಣ್ಣು ಚಲಿಸಿದ್ದನ್ನು ನೋಡಿ ಕುಟುಂಬಸ್ಥರು ಭಯಭೀತರಾದ ಘಟನೆ ಶಿವಮೊಗ್ಗ ನಗರದ ಕಾಶಿಪುರದ ಎರಡನೇ ತಿರುವಿನಲ್ಲಿ ನಡೆದಿದೆ.

ಕಾಶಿಪುರದ ನಿವಾಸಿ ರವಿಕುಮಾರ್ ಅವರ ಮನೆ ಮುಂದೆ ವಾಮಾಚಾರ ಮಾಡಿ ತಂದ ನಿಂಬೆಹಣ್ಣನ್ನು ಬೈಕ್ ನಲ್ಲಿ ಬಂದಿದ್ದವರು ಎಸೆದು ಹೋಗಿದ್ದಾರೆ. ಒಬ್ಬ ಪುರುಷ ಹಾಗೂ ಮಹಿಳೆ ಎಸೆದು ಹೋದ ದೃಶ್ಯ ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿದೆ. ರವಿಕುಮಾರ್ ಪುತ್ರಿ ತುಳಸಿ ಪೂಜೆ ಮಾಡುವ ವೇಳೆ ವಾಮಾಚಾರ ಮಾಡಿದ ಎಸೆದಿದ್ದ ಬೆಲ್ಲ ಹಾಗೂ ನಿಂಬೆಹಣ್ಣು ಇದ್ದ ಪೊಟ್ಟಣ ಚಲಿಸಿದ ದೃಶ್ಯವೂ ಸೆರೆಯಾಗಿದೆ.

ಕುಟುಂಬಸ್ಥರಲ್ಲಿ ಈ ಘಟನೆ ಆತಂಕ ಮೂಡಿಸಿದ್ದು, ದೃಶ್ಯ ಗಮನಿಸುತ್ತಿದ್ದಂತೆ ವಿನೋಬನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.

ವಾಮಾಚಾರ ಮಾಡಿವವರನ್ನು ಬಂಧಿಸಿ ತನಿಖೆ ನಡೆಸಬೇಕು. ಕಾನೂನು ರೀತಿ ನ್ಯಾಯ ಕೊಡಿಸಬೇಕೆಂದು ಪೊಲೀಸ್ ಇಲಾಖೆಯಲ್ಲಿ ಕುಟುಂಬಸ್ಥರು ಮನವಿ ಮಾಡಿದ್ದಾರೆ.