ಶ್ರೀ ಕ್ಷೇತ್ರ ಕಮಲಶಿಲೆಯಲ್ಲಿ ಸೇವೆ ಸಲ್ಲಿಸಿದ ಶ್ರೀಮಂತ ವ್ಯಕ್ತಿ

ನವರಾತ್ರಿ ಹಬ್ಬದ ಸಂಭ್ರಮ ಆರಂಭವಾಗಿದೆ. ದೇಶಾದ್ಯಂತ ದೇವಿಯ ದೇಗುಲಗಳು ಅಲಂಕೃತಗೊಂಡು ಭಕ್ತರ ದರ್ಶನಕ್ಕಾಗಿ ಕಾಯುತ್ತಿವೆ. ಉಡುಪಿ ಜಿಲ್ಲೆಯ ಕುಂದಾಪುರ ತಾಲೂಕಿನಿಂದ ಕೇವಲ 35 ಕಿಲೋಮೀಟರ್​ ದೂರದಲ್ಲಿರುವ ಶ್ರೀ ಕ್ಷೇತ್ರ ಕಮಲಶಿಲೆಯಲ್ಲೂ ನವರಾತ್ರಿ ಸಂಭ್ರಮ ಜೋರಾಗಿದೆ.

ಲಿಂಗ ರೂಪದಲ್ಲಿ ದೇವಿಯನ್ನ ಆರಾಧಿಸೋ ಏಕೈಕ ಸ್ಥಾನವಾಗಿರೋ ಕಮಲ ಶಿಲೆಗೆ ರಾಜ್ಯ ಮಾತ್ರವಲ್ಲದೇ ನೆರೆ ರಾಜ್ಯಗಳಿಂದಲೂ ಭಕ್ತರು ಬರುತ್ತಾರೆ. ಅದೇ ರೀತಿ ತಮಿಳುನಾಡಿನಲ್ಲಿ ಆಡಿಟರ್​ ಆಗಿರುವ ರಾಜಶೇಖರ್​ ಎಂಬವರೂ ಕೂಡ ದೇಗುಲಕ್ಕೆ ಭೇಟಿ ನೀಡಿ ಅಮ್ಮನ ಸೇವೆ ಮಾಡಿದ್ದಾರೆ. ಬಿಎಂಡಬ್ಲೂ ನಂತಹ ಐಶಾರಾಮಿ ಕಾರು ಹೊಂದಿರುವ ಈ ಶ್ರೀಮಂತ ವ್ಯಕ್ತಿ, ಬ್ರಾಹ್ಮಿ ಅನ್ನ ಕುಟೀರದಲ್ಲಿ ಅನ್ನ ಪ್ರಸಾದ ಮುಗಿದ ಬಳಿಕ ಎಲೆ ತೆಗೆಯೋ ಮೂಲಕ ಸರಳತೆ ಮೆರೆದಿದ್ದಾರೆ. ಪ್ರತಿ ವರ್ಷ ನವರಾತ್ರಿಯ 9 ದಿನ ರಾಜಶೇಖರ್​ ಈ ಸೇವೆಯನ್ನ ಮಾಡ್ತಾರಂತೆ.

ಸ್ಥಳೀಯರಾದ ಉಮೇಶ್​ ಶೆಟ್ಟಿ​ ಎಂಬವರು ಫೇಸ್​ಬುಕ್​ನಲ್ಲಿ ಈ ವಿಚಾರವನ್ನ ಹಂಚಿಕೊಂಡಿದ್ದಾರೆ. ಪ್ರತಿದಿನದಂತೆ ದೇವಸ್ಥಾನಕ್ಕೆ ಬಂದ ಉಮೇಶ್​ ದೇಗುಲದ ಮುಂದೆ ನಿಂತಿದ್ದ ಐಷಾರಾಮಿ ಕಾರನ್ನ ಕಂಡಿದ್ದಾರೆ, ಬಳಿಕ ಕಾರಿನ ಯಜಮಾನರ ಬಗ್ಗೆ ವಿಚಾರಿಸಿದಾಗ ಅವರ ಸರಳತೆ ಕಂಡು ಉಮೇಶ್​ ಖುಷಿ ಆಗಿದ್ದಾರೆ.