ನನಗೇನೂ ಗೊತ್ತಿಲ್ಲವೆಂದು ಕೂಗಾಡುತ್ತಿದ್ದ ನಟಿ ಸಂಜನಾಗೆ‌ ಸಿಸಿಬಿ ಶಾಕ್

ಸ್ಯಾಂಡಲ್‌ ವುಡ್‌ ಗೆ ಡ್ರಗ್ಸ್‌ ನಂಟು ಕುರಿತ ಸುದ್ದಿ ಕಳೆದ ಕೆಲ ದಿನಗಳಿಂದ ದೊಡ್ಡ ಮಟ್ಟದಲ್ಲಿ ಚರ್ಚೆಯಾಗುತ್ತಿದೆ. ಡ್ರಗ್ಸ್‌ ದಂಧೆಯ ಕಿಂಗ್‌ ಪಿನ್‌ ಬಂಧನವಾದ ಸಂದರ್ಭದಲ್ಲಿ ನಟಿಯರಾದ ರಾಗಿಣಿ ಹಾಗೂ ಸಂಜನಾರ ಮೇಲೆ ಎಲ್ಲರ ಅನುಮಾನ ಮೂಡಿದ್ದು, ಇದಕ್ಕೆ ಪುಷ್ಟಿ ನೀಡುವಂತೆ ನಟಿ ರಾಗಿಣಿಯವರನ್ನು ಸಿಸಿಬಿ ಪೊಲೀಸರು ಈಗಾಗಲೇ ಬಂಧಿಸಿದ್ದಾರೆ.

ಇನ್ನು ನಟಿ ಸಂಜನಾರನ್ನು ಮಾಧ್ಯಮದವರು ಡ್ರಗ್ಸ್‌ ನಂಟಿನ ಕುರಿತು ಪ್ರಶ್ನಿಸಿದ ಸಂದರ್ಭದಲ್ಲಿ ನನಗೇನೂ ಗೊತ್ತಿಲ್ಲ. ಸುಮ್ಮಸುಮ್ಮನೆ ನನ್ನ ಹೆಸರನ್ನು ಪ್ರಸ್ತಾಪಿಸಬೇಡಿ ಎಂದು ಸಂಜನಾ ರೇಗಾಡಿದ್ದರು. ಅಷ್ಟೇ ಅಲ್ಲ, ಈಗಾಗಲೇ ಸಿಸಿಬಿ ವಶದಲ್ಲಿರುವ ರಾಹುಲ್‌ ತುಂಬಾ ಒಳ್ಳೆ ಹುಡುಗ. ಆತ ನನ್ನ ರಾಖಿ ಬ್ರದರ್‌ ಎಂದು ಸಂಜನಾ ಹೇಳಿಕೊಂಡಿದ್ದರು.

ಆದರೆ ಸಂಜನಾರ ಮತ್ತೊಬ್ಬ ಆಪ್ತ ಪೃಥ್ವಿ ಶೆಟ್ಟಿಯನ್ನು ವಶಕ್ಕೆ ಪಡೆದಿರುವ ಸಿಸಿಬಿ ಪೊಲೀಸರು ಆತ ನೀಡಿದ ಮಾಹಿತಿ ಮೇರೆಗೆ ಸಂಜನಾ ಮನೆ ಮೇಲೆ ದಾಳಿ ನಡೆಸಿದ್ದಾರೆನ್ನಲಾಗಿದೆ. ಇಂದು ಬೆಳ್ಳಂಬೆಳಿಗ್ಗೆಯೇ ಇಂದಿರಾನಗರದಲ್ಲಿರುವ ಸಂಜನಾ ಮನೆ ಬಾಗಿಲು ತಟ್ಟಿದ ಸಿಸಿಬಿ ಅಧಿಕಾರಿಗಳು ಸಂಜನಾಗೆ ಶಾಕ್‌ ನೀಡಿದ್ದಾರೆ.

ಸಂಜನಾ ಮನೆಯಲ್ಲಿ ತೀವ್ರ ಶೋಧ ಕಾರ್ಯ ನಡೆಯುತ್ತಿದ್ದು, ಇದಾದ ಬಳಿಕ ಸಂಜನಾರನ್ನು ವಿಚಾರಣೆಗೆ ಹಾಜರಾಗುವಂತೆ ಸೂಚಿಸುವ ಸಾಧ್ಯತೆಯಿದೆ. ಒಂದೊಮ್ಮೆ ಅಗತ್ಯ ಬಿದ್ದರೆ ಸಂಜನಾರನ್ನು ಬಂಧನಕ್ಕೊಳಪಡಿಸಲೂ ಚಿಂತನೆ ನಡೆಸಲಾಗಿದೆ ಎನ್ನಲಾಗುತ್ತಿದೆ.