ಪಿಯಾನೋದಲ್ಲಿ ಜನ ಗಣ ಮನ ನುಡಿಸಿದ ಇಸ್ರೇಲ್‌ ಕಾನ್ಸುಲ್ ಜನರಲ್: ಎಲ್ಲೆಡೆ ಶ್ಲಾಘನೆ

ಭಾರತದಲ್ಲಿ ಪ್ರತಿ ವರ್ಷ ಜನವರಿ 26 ಅನ್ನು ಗಣರಾಜ್ಯ ದಿನವನ್ನಾಗಿ ಆಚರಿಸಲಾಗುತ್ತದೆ. ಜನವರಿ 26, 1950 ರಂದು ಜಾರಿಗೆ ಬಂದ ಮತ್ತು ರಾಷ್ಟ್ರವನ್ನು ಗಣರಾಜ್ಯವನ್ನಾಗಿ ಮಾಡಿದ ಭಾರತದ ಸಂವಿಧಾನದ ಸ್ಮರಣಾರ್ಥ ಇದು 74 ನೇ ವರ್ಷವಾಗಿದೆ. ಪ್ರಪಂಚದಾದ್ಯಂತದ ರಾಜತಾಂತ್ರಿಕರು ವಿಶೇಷ ದಿನದಂದು ಗೌರವ ಸಲ್ಲಿಸಲು ಸಾಮಾಜಿಕ ಮಾಧ್ಯಮ ವೇದಿಕೆಗಳನ್ನು ಬಳಸಿಕೊಂಡಿದ್ದಾರೆ.

ಭಾರತಕ್ಕೆ ಇಸ್ರೇಲ್‌ನ ಕಾನ್ಸುಲ್ ಜನರಲ್ ಕೊಬ್ಬಿ ಶೋಶಾನಿ ಅವರು ಪಿಯಾನೋ ನುಡಿಸುತ್ತಿರುವ ವಿಡಿಯೋ ವೈರಲ್​ ಆಗಿದೆ. ಅವರು ಪಿಯಾನೋದಲ್ಲಿ ಭಾರತದ ರಾಷ್ಟ್ರಗೀತೆ ಜನ ಗಣ ಮನವನ್ನು ಸಂಪೂರ್ಣವಾಗಿ ನುಡಿಸಿದ್ದನ್ನು ಕೇಳಬಹುದು. “ಭಾರತಕ್ಕೆ ಸಂಬಂಧಿಸಿದಂತೆ, ನಾನು ಭಾರತದ ಸುಂದರ ಗೀತೆಯಾದ ‘ಜನ ಗಣ ಮನ’ ಅನ್ನು ನುಡಿಸಲು ನನ್ನ ಕೈಲಾದಷ್ಟು ಪ್ರಯತ್ನಿಸಿದೆ” ಎಂದು ಶೀರ್ಷಿಕೆಯನ್ನು ಅವರು ನೀಡಿ ಅದನ್ನು ಶೇರ್​ ಮಾಡಿಕೊಂಡಿದ್ದಾರೆ.

ವಿಡಿಯೋ 97k ವೀಕ್ಷಣೆಗಳನ್ನು ಗಳಿಸಿದೆ ಮತ್ತು ಅನೇಕ ಪ್ರತಿಕ್ರಿಯೆಗಳನ್ನು ಗಳಿಸಿದೆ. ಜನರು ವಿಡಿಯೋವನ್ನು ಇಷ್ಟಪಟ್ಟಿದ್ದಾರೆ ಮತ್ತು ಭಾರತೀಯ ಸಂಸ್ಕೃತಿಯನ್ನು ಅಳವಡಿಸಿಕೊಂಡಿದ್ದಕ್ಕಾಗಿ ಮತ್ತು ಗಣರಾಜ್ಯೋತ್ಸವವನ್ನು ಇಂತಹ ಸುಂದರವಾದ ಗೌರವದೊಂದಿಗೆ ಆಚರಿಸಿದ್ದಕ್ಕಾಗಿ ಧನ್ಯವಾದಗಳನ್ನು ಅರ್ಪಿಸಿದರು.