ಕಾರಿನಲ್ಲಿ ಹೂಸು ಬಿಟ್ಟವನೀಗ ಜೈಲು ಪಾಲು…!

ಕಾರಿನಲ್ಲಿ ಹೂಸು ಬಿಟ್ಟ ಎಂಬ ಕಾರಣಕ್ಕೆ 35 ವರ್ಷದ ವ್ಯಕ್ತಿಯೊಬ್ಬರನ್ನು ಜೈಲಿಗೆ ಹಾಕುವವರೆಗೂ ಮುಂದುವರೆದ ಪ್ರಸಂಗವೊಂದು ಬ್ರಿಟನ್‌ನಲ್ಲಿ ಘಟಿಸಿದೆ.

ಈ ಘಟನೆ ಕಳೆದ ವರ್ಷ ನಡೆದಿದ್ದು, ಊಬರ್‌ ಟ್ಯಾಕ್ಸಿ ಚಾಲಕ ಅಲೆಕ್ಸಂಡರ್‌ ಬಾಂಕೆವ್‌ ತಮ್ಮ ಗಿರಾಕಿ ಜೇಮ್ಸ್‌ ಮಾಲ್ಲೆಟ್‌ರನ್ನು ದಕ್ಷಿಣ ಗ್ಲೌಸೆಸ್ಟರ್‌ಶೈರ್‌ನಲ್ಲಿರುವ ನೈಟ್‌ ಕ್ಲಬ್‌ ಒಂದಕ್ಕೆ ಕರೆದೊಯ್ಯುವವರಿದ್ದರು. ಮೊದಲೇ ದಿನಪೂರ್ತಿ ತಲೆಕೆಟ್ಟ ಗ್ರಾಹಕರೊಂದಿಗೆ ಸಂಭಾಳಿಸಿ ರೋಸಿ ಹೋಗಿದ್ದ ಬಾಂಕೆವ್‌ಗೆ ಮಾಲ್ಲೆಟ್‌ ಕೊಟ್ಟ ಈ ವಿಚಿತ್ರ ಟಾರ್ಚರ್‌ನಿಂದ ಸಿಟ್ಟು ನೆತ್ತಿಗೇರಿದೆ.

ತನ್ನ ಟ್ಯಾಕ್ಸಿಯಿಂದ ಮೊದಲು ಕೆಳಗಿಳಿಯುವಂತೆ ಗಿರಾಕಿ ಮಾಲ್ಲೆಟ್‌ಗೆ ತಾಕೀತು ಮಾಡಿದ್ದಾರೆ ಬಾಂಕೆವ್‌. ಈ ಮಾತನ್ನು ಕೇಳಿದ ಗ್ರಾಹಕ ಚಾಲಕನಿಗೆ ಪಂಚ್‌ ಕೊಟ್ಟಿದ್ದಾನೆ. ಕೂಡಲೇ ಇಬ್ಬರ ನಡುವೆ ಮಾರಾಮಾರಿ ನಡೆದಿದೆ. ಘಟನೆಯ ವಿಚಾರಣೆ ಬಳಿಕ ಮಾಲ್ಲೆಟ್‌ಗೆ ಆರು ತಿಂಗಳು ಜೈಲು ಹಾಗೂ $650ಗಳ ದಂಡ ವಿಧಿಸಲಾಗಿದೆ.