ಭಾರತೀಯ ವಿಮಾನಯಾತ್ರಿಗಳಿಗೆ ಥೈಲ್ಯಾಂಡ್​ ನಿರ್ಬಂಧ: ಲಸಿಕೆ ಪಡೆದವರು ಮಾತ್ರ ದೇಶಕ್ಕೆ ಬನ್ನಿ ಎಂದ ಸೀಶೆಲ್ಸ್ ರಾಷ್ಟ್ರ

ಹೆಚ್ಚುತ್ತಿರುವ ಕೊರೊನಾ ಕೇಸ್​ಗಳನ್ನ ಗಮನದಲ್ಲಿಟ್ಟುಕೊಂಡು ಪಶ್ಚಿಮ ಆಫ್ರಿಕಾದ ಸೀಶೆಲ್ಸ್ ರಾಷ್ಟ್ರ ಕೊರೊನಾ ಲಸಿಕೆಯ 2 ಡೋಸ್​ ಪಡೆದು 2ವಾರಗಳನ್ನ ಪೂರೈಸಿದ ಹಾಗೂ ಕೊರೊನಾ ನೆಗೆಟಿವ್​ ವರದಿ ಹೊಂದಿರುವ ಭಾರತ, ಪಾಕಿಸ್ತಾನ ಹಾಗೂ ಬಾಂಗ್ಲಾದೇಶದ ಪ್ರಯಾಣಿಕರಿಗೆ ಮಾತ್ರ ದೇಶ ಪ್ರವೇಶಕ್ಕೆ ಅನುಮತಿ ನೀಡಿದೆ.

ಇತ್ತ ಥೈಲ್ಯಾಂಡ್​ ತನ್ನ​ ರಾಷ್ಟ್ರದ ಪ್ರಜೆಗಳಲ್ಲದವರಿಗೆ ಮೇ 1ರಿಂದ ಭಾರತದಿಂದ ಆಗಮಿಸಲು ನಿರ್ಬಂಧ ಹೇರಿದೆ. ಸೀಶೆಲ್ಸ್ ಭಾರತದ ಜೊತೆ ಏರ್​ ಬಬಲ್ಸ್​ ಒಪ್ಪಂದವನ್ನ ಹೊಂದಿದೆ. ಆದರೆ ಭಾರತದ ಜೊತೆ ಥೈಲ್ಯಾಂಡ್​ ಈ ಯಾವುದೇ ಒಪ್ಪಂದವನ್ನ ಹೊಂದಿಲ್ಲ.

ಈ ಸಂಬಂಧ ಬುಧವಾರ ಮಾಹಿತಿ ಒದಗಿಸಿದ ಸೀಶೆಲ್ಸ್​ ಪ್ರವಾಸೋದ್ಯಮ ಬೋರ್ಡ್ ಕೊರೊನಾ ಲಸಿಕೆಯ ಎರಡೂ ಡೋಸ್​ಗಳನ್ನ ಪಡೆದ 2 ವಾರ ಕಳೆದ ಹಾಗೂ ಕೊರೊನಾ ನೆಗೆಟಿವ್​ ರಿಪೋರ್ಟ್ ಹೊಂದಿರುವ ಬಾಂಗ್ಲಾ, ಭಾರತ ಹಾಗೂ ಪಾಕಿಸ್ತಾನದ ಪ್ರಜೆಗಳಿಗೆ ಮಾತ್ರ ದೇಶಕ್ಕೆ ಎಂಟ್ರಿ ನೀಡಲು ಅವಕಾಶ ನೀಡಲಾಗುತ್ತೆ ಎಂದು ಪ್ರಕಟಣೆ ಹೊರಡಿಸಿದೆ.

ವಿಮಾನದಿಂದ ಹೊರಡುವ 72 ಗಂಟೆಗಳ ಮುನ್ನ ನಡೆಸಲಾದ ಆರ್​ಟಿ ಪಿಸಿಆರ್​ ಪರೀಕ್ಷೆಯಲ್ಲಿ ನೆಗೆಟಿವ್​ ವರದಿ ಹೊಂದಿರುವುದು ಕಡ್ಡಾಯವಾಗಿದೆ. ಇದಾದ ಬಳಿಕ ಪ್ರಯಾಣಿಕರಿಗೆ ಯಾವುದೇ ಕ್ವಾರಂಟೈನ್​ ನಿರ್ಬಂಧ ಇರೋದಿಲ್ಲ.