ಐ ಫೋನ್ ಖರೀದಿ ಮಾಡಬೇಕು ಅಂತಾ ಆಸೆ ಇದ್ರು ಸಹ ಅದರ ದರವನ್ನ ನೋಡ್ತಿದ್ರೆ ಬೆವರಿಳಿಯುತ್ತೆ. ತನ್ನ ದುಬಾರಿ ಬೆಲೆಯ ಮೂಲಕವೇ ಹೆಸರು ಮಾಡಿರುವ ಈ ಫೋನ್ಗಳನ್ನ ಖರೀದಿ ಮಾಡೋದು ಎಲ್ಲರಿಂದಲೂ ಸಾಧ್ಯವಾಗುವಂತಹ ಕೆಲಸವಲ್ಲ. ಆದರೆ ಇಲ್ಲೊಬ್ಬ ವ್ಯಕ್ತಿಗೆ 1 ಕೆಜಿ ಸೇಬು ಹಣ್ಣಿನ ಬದಲಾಗಿ ಐ ಫೋನ್ ಮೊಬೈಲ್ ದಕ್ಕಿದೆ..!
50 ವರ್ಷದ ನಿಕ್ ಜೇಮ್ಸ್ ಎಂಬವರು ಇಂಗ್ಲೆಂಡ್ನ ಟೆಸ್ಕೊ ಸೂಪರ್ ಮಾರ್ಕೆಟ್ನಲ್ಲಿ 1 ಕೆಜಿ ಸೇಬು ಹಣ್ಣನ್ನ ಆರ್ಡರ್ ಮಾಡಿದ್ದರು. ಆದರೆ ಈ ಸೇಬುಹಣ್ಣನ್ನ ನೀಡುವ ವೇಳೆ ಸಿಬ್ಬಂದಿ ನಿಮಗೊಂದು ಆಶ್ಚರ್ಯ ಕಾದಿದೆ ಎಂದು ಹೇಳಿದ್ದಾರೆ. ಕುತೂಹಲದಿಂದ ಜೇಮ್ಸ್ ಬ್ಯಾಗ್ ತೆರೆದು ನೋಡಿದಾಗ ಅದರಲ್ಲಿ ಐ ಫೋನ್ ಎಸ್ಇ ಇರೋದನ್ನ ಕಂಡು ಶಾಕ್ ಆಗಿದ್ದಾರೆ.
ಟೆಸ್ಕೊ ಹಾಗೂ ಟೆಸ್ಕೊ ಮೊಬೈಲ್ಗೆ ಧನ್ಯವಾದಗಳು. ನಾನು ಬುಧವಾರ ಸಂಜೆ ನನ್ನ ಆರ್ಡರ್ ತೆಗೆದುಕೊಳ್ಳಲು ಹೋದ ವೇಳೆ ನನಗೆ ಈ ಉಡುಗೊರೆ ಸಿಕ್ಕಿದೆ. ನಾನು ಸೇಬುಹಣ್ಣನ್ನ ಬುಕ್ ಮಾಡಿದ್ದೆ. ನನಗೆ ಈ ದುಬಾರಿ ಬೆಲೆಯ ಮೊಬೈಲ್ ಸಿಕ್ಕಿದೆ. ನನ್ನ ಮಗನಂತೂ ಫುಲ್ ಖುಶ್ ಆಗಿದ್ದಾನೆ ಎಂದು ಜೇಮ್ಸ್ ಟ್ವೀಟ್ ಮಾಡಿದ್ದಾರೆ.
ಟೆಸ್ಕೋ ಮೊಬೈಲ್ ಪ್ರಚಾರದ ಭಾಗವಾಗಿ ಸೂಪರ್ ಮಾರ್ಕೆಟ್ನಲ್ಲಿ ಈ ರೀತಿಯ ಆಫರ್ ಇಡಲಾಗಿದೆ. ಆಯ್ದ ಗ್ರಾಹಕರಿಗೆ ಉಚಿತವಾಗಿ ಐ ಫೋನ್, ಏರ್ಪೋಡ್ ಹಾಗೂ ಸ್ಯಾಮ್ಸಂಗ್ನ ವಿವಿಧ ಸಾಧನಗಳು ಸಿಗುತ್ತಿವೆ.
ಅಂದಹಾಗೆ ಜೇಮ್ಸ್ ಆರ್ಡರ್ ಮಾಡಿದ ಸೇಬು ಹಣ್ಣಿನ ಕತೆ ಏನಾಯ್ತು ಅಂದುಕೊಂಡ್ರಾ..? ಮೊಬೈಲ್ನ ಜೊತೆಗೆ ಸೂಪರ್ ಮಾರ್ಕೆಟ್ ಸೇಬು ಹಣ್ಣುಗಳನ್ನೂ ಕಳುಹಿಸಿಕೊಟ್ಟಿದೆ.
Loading ...