ಫೇಸ್​ ಮಾಸ್ಕ್​ ಸುರಕ್ಷತೆ ಕುರಿತಾದ ಮಹತ್ವದ ಮಾಹಿತಿ ಬಹಿರಂಗ

ಕೊರೊನಾದಿಂದ ದೂರ ಇರಬೇಕು ಅಂದರೆ ಫೇಸ್​ಮಾಸ್ಕ್​ಗಳನ್ನ ಧರಿಸೋದು ಅನಿವಾರ್ಯ ಎಂಬಂತಾಗಿದೆ. ಹೀಗಾಗಿ ಜಾರ್ಜಿಯಾ ಇನ್​ಸ್ಟಿಟ್ಯೂಟ್​ ಆಫ್​ ಟೆಕ್ನಾಲಜಿ ಮಾಸ್ಕ್​ಗಳ ಮೇಲೆಯೇ ಹೊಸ ಅಧ್ಯಯನವೊಂದನ್ನ ಮಾಡಿದ್ದು ಯಾವ ಬಟ್ಟೆಯ ​ಹಾಗೂ ಎಷ್ಟು ಪದರಗಳನ್ನ ಹೊಂದಿರುವ ಮಾಸ್ಕ್​​ಗಳನ್ನ ಬಳಕೆ ಮಾಡೋದು ಸೂಕ್ತ ಅನ್ನೋದನ್ನ ಹೇಳಿದೆ.

ಈ ಅಧ್ಯಯನದಲ್ಲಿ ಯಾವ್ಯಾವ ಬಟ್ಟೆಗಳು ಎಷ್ಟು ಮೈಕ್ರೋನ್ಸ್ ಗಾತ್ರದ ರಂಧ್ರವನ್ನ ಹೊಂದಿದೆ ಎಂಬುದನ್ನ ಹೇಳಿದೆ. ಮನುಷ್ಯನ ತಲೆಗೂದಲು 50 ಮೈಕ್ರೋನ್ಸ್ ವ್ಯಾಸ ಹೊಂದಿದೆ. 1 ಮಿಲಿಮೀಟರ್​ ಅಂದರೆ 1000 ಮೈಕ್ರೋನ್ಸ್ ಎಂದು ಅರ್ಥ.

ಸಬ್​ ಮೈಕ್ರಾನ್​ ಗಾತ್ರದ ಕಣವು ಗಾಳಿ ಇಲ್ಲದ ಜಾಗದಲ್ಲಿ ಬಹಳ ದಿನಗಳವರೆಗೆ ಇರಬಲ್ಲದು. ಹೀಗಾಗಿ ಗಾಳಿ ಸೌಕರ್ಯ ಸೂಕ್ತವಿಲ್ಲದ ಕೋಣೆಗಳಲ್ಲಿ ದೀರ್ಘಕಾಲದವರೆಗೆ ಇಂತಹ ಕಣಗಳು ಇರುತ್ತವೆ ಅಂತಾ ಪ್ರಾಧ್ಯಾಪಕ ಲೀ ಹೇಳಿದ್ದಾರೆ.

2020ರಲ್ಲಿ ಲಾಕ್​​ಡೌನ್​ ಸಂದರ್ಭದಲ್ಲಿ ಎಲ್ಲಾ ವಿಶ್ವವಿದ್ಯಾಲಯಗಳು ಬಂದ್​ ಆಗಿದ್ದ ವೇಳೆಯಲ್ಲಿ ಈ ಅಧ್ಯಯನವನ್ನ ನಡೆಸಲಾಯ್ತು. ಈ ಸಂದರ್ಭದಲ್ಲಿ ಜನತೆ ಮಾಸ್ಕ್​​, ಸ್ಯಾನಿಟೈಸರ್​ ಸೇರಿದಂತೆ ವೈಯಕ್ತಿಕ ರಕ್ಷಣಾ ಸಾಧನಗಳ ಕೊರತೆಯನ್ನ ಅನುಭವಿಸುತ್ತಿದ್ದರು. ಹೀಗಾಗಿ ಅನೇಕರು ಮನೆಯಲ್ಲಿಯೇ ಮಾಸ್ಕ್​ ತಯಾರು ಮಾಡೋಕೆ ಶುರು ಮಾಡಿದ್ರು. ಇದನ್ನ ಗಮನಿಸಿದ ಜಾರ್ಜಿಯಾ ಇನ್​ಸ್ಟಿಟ್ಯೂಟ್​​ ಇಂತಹದ್ದೊಂದು ಅಧ್ಯಯನ ನಡೆಸಿತು.

ಕಳೆದ ಏಪ್ರಿಲ್​​​ ತಿಂಗಳಲ್ಲಿ ಮನೆಯಲ್ಲಿ ತಯಾರಿಸಿದ ಫೇಸ್ ಮಾಸ್ಕ್​​ಗಳನ್ನ ಅಧ್ಯಯನದಲ್ಲಿ ಬಳಸಲಾಯ್ತು. ಇದರಲ್ಲಿ ಪಾಲಿಸ್ಟರ್​ನಿಂದ ಮಾಡಿದ ಏಕ ಪದರದ ಬಟ್ಟೆ, ನಾನ್​ವೊವೆನ್​ ಬಟ್ಟೆ, ಸೆಲ್ಯೂಲೋಸ್​ ಬಟ್ಟೆ , ಆಸ್ಪತ್ರೆಗಳಲ್ಲಿ ಕಂಡು ಬರುವ ಬಟ್ಟೆ ಸೇರಿದಂತೆ ವಿವಿಧ ಬಟ್ಟೆಗಳಿಂದ ತಯಾರಾದ ಮಾಸ್ಕ್​​ಗಳನ್ನ ಬಳಕೆ ಮಾಡಲಾಯ್ತು.

ಈ ಅಧ್ಯಯನದಲ್ಲಿ ಏಕ ಪದರದ ಮಾಸ್ಕ್​​ಗಿಂತ ಬಹುಪದರಗಳ ಮಾಸ್ಕ್​ಗಳು ಹೆಚ್ಚು ಪರಿಣಾಮಕಾರತ್ವವವನ್ನ ತೋರಿಸಿವೆ. ಎರಡು ಹಾಗೂ ಮೂರು ಪದರವುಳ್ಳ ಮಾಸ್ಕ್​​ಗಳು 50 ಪ್ರತಿಶತ ಪರಿಣಾಮಕಾರತ್ವವನ್ನ ತೋರಿಸುತ್ತವೆ. ಇದು ಮಾತ್ರವಲ್ಲದೇ ಮಾಸ್ಕ್​ ಎಷ್ಟು ಫಿಟ್​ ಆಗಿದೆ ಅನ್ನೋದು ಮುಖ್ಯವಾಗುತ್ತೆ. ಏಕಂದರೆ ಮಾಸ್ಕ್​ಗಳು ಸಡಿಲವಾಗಿದ್ದರೆ ಸೂಕ್ಷ್ಮವಸ್ತುಗಳು ಸುಲಭವಾಗಿ ಹರಿದಾಡುತ್ತದೆ. ಎರಡು ಪದರಗಳುಳ್ಳ ಫಿಟ್​ ಆಗಿರುವ ಮಾಸ್ಕ್​ಗಳು 84 ಪ್ರತಿಶತ ಸೂಕ್ಷ್ಮ ವಸ್ತುಗಳನ್ನ ತಡೆಹಿಡಿಯುವ ಸಾಮರ್ಥ್ಯ ಹೊಂದಿವೆ ಎಂದು ಅಧ್ಯಯನ ಹೇಳಿದೆ.