ಪ್ರಯಾಣಿಕರಿಗೆ ಕೊರೊನಾ ಕುರಿತ ಚೀನಾ ಆರೋಪಕ್ಕೆ ಏರ್ ಇಂಡಿಯಾ ಸ್ಪಷ್ಟನೆ

ವಂದೇ ಭಾರತ್​ ಮಿಷನ್​ ಅಡಿಯಲ್ಲಿ ದೆಹಲಿಯಿಂದ ಚೀನಾದ ವುಹಾನ್​ಗೆ ಹಾರಿದ 19 ಮಂದಿ ಭಾರತೀಯರಿಗೆ ಕೊರೊನಾ ದೃಢಪಟ್ಟಿದೆ ಎಂಬ ಚೀನಾದ ವರದಿಗೆ ಏರ್​ ಇಂಡಿಯಾ ಪ್ರತಿಕ್ರಿಯೆ ನೀಡಿದೆ.

ಏರ್​ ಇಂಡಿಯಾ ಕೊರೊನಾ ಸಂಬಂಧಿ ಮಾರ್ಗಸೂಚಿಗಳನ್ನ ಕಟ್ಟುನಿಟ್ಟಾಗಿ ಪಾಲಿಸುತ್ತಿದೆ. ವುಹಾನ್​ ವಿಮಾನದಲ್ಲಿದ್ದ ಎಲ್ಲ ಪ್ರಯಾಣಿಕರು ಪ್ರಮಾಣೀಕೃತ ಲ್ಯಾಬ್​ಗಳಿಂದ ನೆಗೆಟಿವ್​ ವರದಿ ಹೊಂದಿದ್ದರು ಅಂತಾ ಸ್ಪಷ್ಟನೆ ನೀಡಿದೆ.

ಭಾರತೀಯ ಪ್ರಯಾಣಿಕರು ಪ್ರಮಾಣೀಕೃತ ಲ್ಯಾಬ್​ನಿಂದ ಕೊರೊನಾ ನೆಗೆಟಿವ್​ ವರದಿ ಪಡೆದುಕೊಂಡೇ ದೆಹಲಿಯಿಂದ ವಿಮಾನ ಹತ್ತಿದ್ದಾರೆ. ಕೋವಿಡ್ 19 ನೆಗೆಟಿವ್​ ವರದಿ ಇಲ್ಲದೇ ಏರ್​ ಇಂಡಿಯಾದ ಯಾವುದೇ ವಿಮಾನವನ್ನ ಹತ್ತುವ ಮಾತೇ ಇಲ್ಲ. ಭಾರತೀಯ ಪ್ರಯಾಣಿಕರು ವಿಮಾನ ಹತ್ತುವ ಮುನ್ನ 2 ಬಾರಿ ಕೋವಿಡ್​ ಪರೀಕ್ಷೆಗೆ ಒಳಗಾಗಿರುತ್ತಾರೆ ಅಂತಾ ಏರ್​ ಇಂಡಿಯಾ ತಿಳಿಸಿದೆ.

ಏರ್​ ಇಂಡಿಯಾ ಮೇಲೆ ಇಂತಹ ಆರೋಪ ಇದೇ ಮೊದಲೇನಲ್ಲ. ಏರ್​ ಇಂಡಿಯಾದಲ್ಲಿದ್ದ ಪ್ರಯಾಣಿಕರಲ್ಲಿ ಕೊರೊನಾ ಸೋಂಕು ಕಾಣಿಸಿಕೊಂಡ ಹಿನ್ನೆಲೆ ದುಬೈ ಹಾಗೂ ಹಾಕಾಂಗ್​ ಏರ್​ ಇಂಡಿಯಾ ಪ್ರವೇಶಕ್ಕೆ ನಿರ್ಬಂಧ ಹೇರಿತ್ತು.