ಕಾರಲ್ಲೇ ಕುಳಿತು ಸಂಗೀತ ಕಛೇರಿ ಆನಂದಿಸಿದ ಪ್ರೇಕ್ಷಕರು

ಕೊರೊನಾದ ಬಳಿಕ ವಿಶ್ವದ ಹಲವು ವಿಚಾರಗಳು ಬದಲಾಗಿವೆ. ಇದೀಗ ಲೈವ್ ಸಂಗೀತ ಕಛೇರಿಗಳ ಕಲ್ಪನೆಯೂ ಬದಲಾಗಿದೆ.

ಹೌದು, ಆ.29 ರಂದು ಇಂಡೋನೇಷ್ಯಾದ ಜಕರ್ತಾದಲ್ಲಿ ಸಂಗೀತ ಕಛೇರಿ ನಡೆದಿದೆ. ಪಾಪ್ ಗಾಯಕ ಎನ್ಸೆಬಲ್ ಕಹಿತ್ನಾ ಅವರ ಕಾರ್ಯಕ್ರಮ ನಡೆದಿದೆ. ಬಯಲಲ್ಲಿ ನಡೆದಿರುವ ಈ ಕಾರ್ಯಕ್ಕೆ ಆಗಮಿಸುವವರೂ ಕಾರಿನಲ್ಲಿಯೇ ಕುಳಿತು ಕಛೇರಿ ಆಲಿಸಬೇಕು.

ಈ ವಿನೂತನ ಪ್ರಯೋಗಕ್ಕೆ ಉತ್ತಮ ಸ್ಪಂದನೆ ವ್ಯಕ್ತವಾಗಿದ್ದು, ಸುಮಾರು 300 ಕಾರ್ ‌ಗಳಲ್ಲಿ 900ಕ್ಕೂ ಹೆಚ್ಚು ಜನ ಆಗಮಿಸಿದ್ದಾರೆ‌. ಹಾಡು ಸವಿದ ಬಳಿಕ ತಮ್ಮ ಖುಷಿಯನ್ನು ಹಂಚಲು ಕಾರಿನ ಮುಂಭಾಗದ ಲೈಟ್‌ ನ್ನು ಡಿಮ್ ಅಂಡ್ ಡಿಪ್ ಮಾಡುತ್ತಿದ್ದರು.

ಆಯೋಜಕರೊಬ್ಬರು ಈ ಬಗ್ಗೆ ಮಾತನಾಡಿ,‌‌ ಕಳೆದ ಐದು ತಿಂಗಳಿನಿಂದ ವರಮಾನ ಇಲ್ಲದೇ ಕಲಾವಿದರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಆದ್ದರಿಂದ ಇದೀಗ ಒಂದೊಂದೇ ಕಾರ್ಯಕ್ರಮ ಆರಂಭಿಸಲಾಗುತ್ತಿದೆ‌. ಆಗಮಿಸುವವರು ಎಲ್ಲ ಮಾಸ್ಕ್ ಧರಿಸಬೇಕಿದ್ದು , ಕೊರೊನಾ ನೆಗೆಟಿವ್ ರಿಪೋರ್ಟ್ ಸಲ್ಲಿಸುವುದು ಕಡ್ಡಾಯವಾಗಿದೆ.