ಅಸುನೀಗಿದ ಬೀದಿ ನಾಯಿ ನೆನಪಿನಲ್ಲಿ ಪ್ರತಿಮೆ ನಿರ್ಮಾಣ…!

ಮಾನವನಿಗೆ ಅತ್ಯಂತ ಬೇಗ ಹತ್ತಿರವಾಗುವಂತಹ ಪ್ರಾಣಿಯೆಂದರೆ ಶ್ವಾನಗಳು. ಅವುಗಳ ನಿಸ್ವಾರ್ಥ ಪ್ರೀತಿ ಹಾಗೂ ಸ್ವಾಮಿನಿಷ್ಠೆ ಎಂತವರ ಮನಸ್ಸನ್ನ ಬೇಕಿದ್ದರೂ ಕರಗಿಸಿಬಿಡಬಹುದು.

ಇಷ್ಟೊಂದು ಪ್ರೀತಿಯಿಂದ ಸಾಕಿದ ಶ್ವಾನಗಳು ಸತ್ತು ಹೋದವು ಅಂದರೆ ಆ ಕುಟುಂಬಕ್ಕೆ ಆಗುವ ನೋವು ಅನುಭವಿಸಿದವರಿಗೇ ಗೊತ್ತು. ಅದೇ ರೀತಿ ಯುರೋಪ್​ನ ಎಸ್ಟೋನಿಯಾದ ನಗರವೊಂದರಲ್ಲಿ ಬರೋಬ್ಬರಿ 12 ವರ್ಷಗಳ ಅಲೆಯುತ್ತಾ ಸ್ಥಳೀಯರ ಪ್ರೀತಿ ಗಳಿಸಿದ್ದ ನಾಯಿಗಾಗಿ ಪ್ರತಿಮೆಯನ್ನ ನಿರ್ಮಿಸಲಾಗಿದೆ.

ಕಪ್ಪು ಹಾಗೂ ಬಿಳಿ ಬಣ್ಣದ ಝೋರಿಕ್​ ಎಂಬ ಹೆಸರಿನ ನಾಯಿ ಈ ನಗರದಲ್ಲಿ ಬಹಳ ವರ್ಷಗಳಿಂದ ವಾಸವಿತ್ತು. ಈ ನಗರದಲ್ಲಿದ್ದ ಪ್ರತಿಯೊಬ್ಬರೂ ಕೂಡ ಈ ಶ್ವಾನವನ್ನ ತಮ್ಮದೇ ಮನೆಯ ಅತಿಥಿ ಎಂಬಂತೆ ಉಪಚರಿಸುತ್ತಿದ್ದರು. ಹೀಗಾಗಿ ಈ ಶ್ವಾನ ತನ್ನೆಲ್ಲ ಪ್ರೀತಿಪಾತ್ರರ ಜೊತೆ ಬಹಳ ಸಂತೋಷವಾಗಿತ್ತು.

ಆದರೆ 12 ವರ್ಷದ ಶ್ವಾನ ಅಸುನೀಗಿದ ವಾರ್ತೆ ಕೇಳಿ ಇಲ್ಲಿನ ಜನತೆಗೆ ಆಕಾಶವೇ ಕಳಚಿಬಿದ್ದಂತಾಗಿತ್ತು. ಪ್ರೀತಿಯ ಶ್ವಾನದ ನೆನಪಿಗಾಗಿ ಏನಾದರೂ ಮಾಡಬೇಕೆಂದು ಚರ್ಚಿಸಿದ ನಿವಾಸಿಗಳು ಕೊನೆಗೂ ಝೋರಿಕ್​ ಶ್ವಾನದ ಪ್ರತಿಮೆಯನ್ನ ನಿರ್ಮಿಸಿದ್ದಾರೆ.

ನಗರಾದ್ಯಂತ ಪ್ರತಿಮೆಗಾಗಿ ಹಣ ಸಂಗ್ರಹಿಸಿದ ನಿವಾಸಿಗಳು ಆ ಹಣವನ್ನ ಸ್ಥಳೀಯ ಕುಶಲಕರ್ಮಿಗಳಿಗೆ ನೀಡಿ ಈ ಮೂರ್ತಿಯನ್ನ ಕೆತ್ತಿಸಿದ್ದಾರೆ. ಈ ನಾಯಿಯ ಜೊತೆಯಲ್ಲೇ ಒಂದು ಬೆಕ್ಕಿನ ಮೂರ್ತಿಯನ್ನೂ ಕೆತ್ತಲಾಗಿದೆ. ಈ ಶ್ವಾನ ಬೀದಿಯ ಬದಿಯಲ್ಲಿ ಅಲೆಯುತ್ತಿದ್ದ ಇತರೆ ಶ್ವಾನಗಳ ಜೊತೆಗೂ ಎಷ್ಟು ಖುಷಿಯಾಗಿತ್ತು ಅನ್ನೋದನ್ನ ಬಿಂಬಿಸುವ ಸಲುವಾಗಿ ಬೆಕ್ಕೊಂದರ ಮೂರ್ತಿಯನ್ನೂ ಕೆತ್ತಲಾಗಿದೆ.