ಸಿನಿಮೀಯ ರೀತಿಯಲ್ಲಿ ಮುರಿದುಬಿದ್ದ ಮದುವೆ..!

ಸಿನಿಮಾಗಳಲ್ಲಿ ಮದುವೆ ನಡೀತಾ ಇರೋ ವೇಳೆ ಯಾರಾದ್ರೂ ಬಂದು ಮದುವೆ ನಿಲ್ಲಿಸೋದನ್ನ ನೀವು ನೋಡೀರ್ತಿರಾ. ಇಂತಹದ್ದೇ ಒಂದು ಡ್ರಾಮಾ ಝಾಂಬಿಯಾ ದೇಶದ ರಾಜಧಾನಿ ಲುಸಾಕಾ ಪಟ್ಟಣದ ಕ್ಯಾಥೋಲಿಕ್​ ಚರ್ಚ್​ನಲ್ಲಿ ನಡೆದಿದೆ.

ಚರ್ಚ್​ನಲ್ಲಿ ಮದುವೆಯಾಗಲು ನಿಂತಿದ್ದ ನವಜೋಡಿಗೆ ಫಾದರ್​ ಉಪದೇಶವನ್ನ ನೀಡ್ತಾ ಇದ್ದರು. ಇದೇ ವೇಳೆ ಬೆನ್ನಿಗೆ ಮಗುವನ್ನ ಕಟ್ಟಿಕೊಂಡು ಬಂದ ಮಹಿಳೆ ಈತ ನನ್ನ ಪತಿ ಎಂದು ಹೇಳುವ ಮೂಲಕ ನೆರೆದವರ ಹುಬ್ಬೇರುವಂತೆ ಮಾಡಿದ್ದಾಳೆ.

ಮಗುವಿನ ಸಮೇತ ಫಾದರ್​ ಬಳಿ ಹೋದ ಮಹಿಳೆ ಇಲ್ಲಿ ವರನ ರೂಪದಲ್ಲಿ ನಿಂತಿರೋ ಈತ ನನ್ನ ಪತಿ. ಅಲ್ಲದೇ ನನ್ನ ಮಗುವಿನ ತಂದೆ ಕೂಡ. ನಮ್ಮಿಬ್ಬರ ನಡುವೆ ಡಿವೋರ್ಸ್ ಕೂಡ ಆಗಿಲ್ಲ. ಹೀಗಾಗಿ ಈ ಮದುವೆ ನಡೆಯಕೂಡದು ಅಂತಾ ಹೇಳಿದ್ದಾಳೆ.

ಇನ್ನು ಈ ಘಟನೆಯನ್ನ ಅಲ್ಲಿನ ಸ್ಥಳೀಯ ಮಾಧ್ಯಮಗಳು ಪ್ರಸಾರ ಮಾಡಿದ್ದು ವರನ ರೂಪದಲ್ಲಿ ನಿಂತಿದ್ದ ಈ ಪುಣ್ಯಾತ್ಮನಿಗೆ ಮೂವರು ಮಕ್ಕಳಿದ್ದಾರೆ ಅಂತಾ ವರದಿ ಬಿತ್ತರಿಸಿವೆ, ಈ ಎಲ್ಲ ಘಟನೆಯ ಬಳಿಕ ಸ್ಥಳಕ್ಕಾಗಮಿಸಿದ ಪೊಲೀಸರು ವರನನ್ನ ಬಂಧಿಸಿದ್ದಾರೆ ಎನ್ನಲಾಗಿದೆ.