ಗೇಮರ್ ಲೈವ್​ ನಲ್ಲಿದ್ದಾಗಲೇ ಸೆರೆಯಾಯ್ತು ಎದೆ ನಡುಗಿಸುವ ದೃಶ್ಯ

ಟರ್ಕಿಯ ಪಶ್ಚಿಮ ಕರಾವಳಿ ಭಾಗದಲ್ಲಿ ಶುಕ್ರವಾರ 7.0 ತೀವ್ರತೆಯ ಭೂಕಂಪ ಸಂಭವಿಸಿದೆ, ಇಸ್ತಾನ್​ಬುಲ್​ನಿಂದ ಅಥೆನ್ಸ್​ವರೆಗೂ ಭೂಕಂಪನದ ಅನುಭವವಾಗಿದೆ.

ಏಜಿಯನ್​ ಸಮುದ್ರದಲ್ಲಿ ಭೂಕಂಪ ಅಪ್ಪಳಿಸಿದ್ದು ರಿಕ್ಟರ್​ ಮಾಪಕದಲ್ಲಿ ತೀವ್ರತೆ 7.0ರಷ್ಟು ದಾಖಲಾಗಿದೆ. ಟರ್ಕಿಯ ನಗರಗಳಾದ ಇಜ್ಮಿರ್​, ಬೊರ್ನೋವಾ ಹಾಗೂ ಬೈರಕ್ಲಿಯಲ್ಲಿ ಭಾರೀ ಭೂಕಂಪದಿಂದಾಗಿ ಅನೇಕ ಕಟ್ಟಡಗಳು ಕುಸಿದಿವೆ, ಇತ್ತೀಚಿನ ವರದಿ ಪ್ರಕಾರ ಭೂಕಂಪನದಿಂದಾಗಿ ಸಾವನ್ನಪ್ಪಿದ್ದವರ ಸಂಖ್ಯೆ 46ಕ್ಕೆ ಏರಿಕೆಯಾಗಿದೆ ಹಾಗೂ 900ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ .

ಭೂಕಂಪ ನಡೆಯುತ್ತಿದ್ದ ವೇಳೆ ಟರ್ಕಿಯ ಗೇಮರ್​ ಒಬ್ಬ ಸೋಶಿಯಲ್​ ಮೀಡಿಯಾದಲ್ಲಿ ಲೈವ್​ ಇದ್ದ ಎನ್ನಲಾಗಿದ್ದು ಭೂಕಂಪದ ದೃಶ್ಯಗಳು ಲೈವ್​ನಲ್ಲಿ ಸೆರೆಯಾಗಿದೆ. ಲೈವ್​ನಲ್ಲಿದ್ದ ಗೇಮರ್​ ವೀವರ್ಸ್​ಗಳ ಪ್ರಶ್ನೆಗೆ ಉತ್ತರ ನೀಡ್ತಾ ಇದ್ದರು. ಆದರೆ ಕೆಲವೇ ಸೆಕೆಂಡ್​ಗಳಲ್ಲಿ ಗೇಮರ್​ ಕೂತಿದ್ದ ರೂಮ್​ ಅಲುಗಾಡಲು ಆರಂಭಿಸಿದ್ದು ಗಾಬರಿಗೊಂಡ ಗೇಮರ್​ ಸ್ಥಳದಿಂದ ಕಾಲ್ಕಿತ್ತಿದ್ದಾರೆ. ಈ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ.