ದೇಶಿ ನಿರ್ಮಿತ ಕೋವಿಶೀಲ್ಡ್​​, ಕೋ ವ್ಯಾಕ್ಸಿನ್​ಗೆ ವಿದೇಶಗಳಲ್ಲೂ ಡಿಮ್ಯಾಂಡ್​…!

ಭಾರತದಲ್ಲೂ ಕೊರೊನಾ ಲಸಿಕೆ ಹಂಚಿಕೆಗೆ ದಿನಗಣನೆ ಆರಂಭವಾಗಿದ್ದು ಸಕಲ ಸಿದ್ಧತೆ ನಡೆಯುತ್ತಿದೆ. ಈ ನಡುವೆ ದೇಶಿ ನಿರ್ಮಿತ ಕೊರೊನಾ ಲಸಿಕೆಗಾಗಿ ಬ್ರೆಜಿಲ್, ಮೊರಕ್ಕೋ, ಸೌದಿ ಅರೇಬಿಯಾ, ಮಯನ್ಮಾರ್, ಬಾಂಗ್ಲಾದೇಶ, ದಕ್ಷಿಣ ಆಫ್ರಿಕಾ ಸೇರಿ 9 ರಾಷ್ಟ್ರಗಳು ಲಸಿಕೆಗೆ ಬೇಡಿಕೆ ಇಟ್ಟಿವೆ.

ಕೊರೊನಾ ಲಸಿಕೆ ಹಂಚಿಕೆ ವಿಚಾರದಲ್ಲಿ ಕೇಂದ್ರ ಸರ್ಕಾರ ಬಾಂಗ್ಲಾದೇಶ, ಭೂತಾನ್​, ನೇಪಾಳ, ಶ್ರೀಲಂಕಾ ಹಾಗೂ ಅಪ್ಘಾನಿಸ್ತಾನದಂತಹ ನೆರೆಯ ರಾಷ್ಟ್ರಗಳ ಮೇಲೆ ಗಮನ ನೀಡಲಿದೆ. ಈ ವಿಚಾರವಾಗಿ ಮಾತನಾಡಿದ ಕೇಂದ್ರ ವಿದೇಶಾಂಗ ಇಲಾಖೆ ವಕ್ತಾರ ಅನುರಾಗ್​​ ಶ್ರೀ ವಾತ್ಸವ್ ಭಾರತ ಮೊದಲಿನಿಂದಲೂ ಕೊರೊನಾ ವಿರುದ್ಧದ ಹೋರಾಟದಲ್ಲಿ ಮುಂಚೂಣಿಯಲ್ಲಿದೆ ಎಂದು ಹೇಳಿದ್ರು.

ವಿಶ್ವದ ಅನೇಕ ರಾಷ್ಟ್ರಗಳು ಭಾರತದ ಬಳಿ ಜಿ 2 ಜಿ ಮೂಲಕ ಇಲ್ಲವೇ ನೇರವಾಗಿ ಲಸಿಕೆ ನಿರ್ಮಾಣ ಸಂಸ್ಥೆಗೆ ನಮ್ಮ ದೇಶಕ್ಕೂ ಲಸಿಕೆ ನೀಡುವ ಬಗ್ಗೆ ಆದೇಶ ನೀಡಿ ಎಂದು ಮನವಿ ಮಾಡಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಮೂಲಗಳ ಪ್ರಕಾರ ನೇಪಾಳ ಭಾರತದ ಬಳಿ 12 ಮಿಲಿಯನ್​ ಕೊರೊನಾ ಲಸಿಕೆಗಳಿಗೆ ಬೇಡಿಕೆ ಇಟ್ಟಿದೆ. ಭೂತಾನ್​​ ಸೀರಮ್​ ಇನ್ಸ್ಟಿಟ್ಯೂಟ್​ ನಿರ್ಮಿತ 1 ಮಿಲಿಯನ್​ ಕೊರೊನಾ ಲಸಿಕೆಗೆ ಮನವಿ ಮಾಡಿದೆ. ಮಯನ್ಮಾರ್​​ ಕೂಡ ಸೀರಮ್​ ಬಳಿ ಲಸಿಕೆ ವಿತರಣೆಯ ಒಪ್ಪಂದ ಮಾಡಿಕೊಂಡಿದೆ. ಇತ್ತ ಬಾಂಗ್ಲಾದೇಶ ಕೂಡ ಕೋವಿ ಶೀಲ್ಡ್ 30 ಮಿಲಿಯನ್​ ಡೋಸ್​ಗೆ ಬೇಡಿಕೆ ಇಟ್ಟಿದೆ ಎನ್ನಲಾಗಿದೆ.